Fuafua aoaoga fa’apitoa mo pagota i le tausaga fou


Se vaaiga i se tasi o nofoaga tuai sa taofia ai pagota i le toese i Tafuna, lea ua tapunia nei ina ua se’e atu pagota i le nofoaga fou o le toese i Tafuna. [ata AF]

Foliga fiafia o ni isi o pagota o lo o taofia i le toese i Tafuna. [ata AF]
ausage@samoanews.com

O le tausaga fou lea ua fa’amoemoe le Matagaluega o le Puipuiga o le Saogalemu Lautele e amata aloaia ai aoaoga faapitoa mo pagota o loo taofia i le toese i Tafuna, e ala i le fa’aaoga lea o fale tuai sa taofia ai pagota e fa’atino ai aoaoga e pei o glauega fa’a kamuta, galuega fa’a inisinia, tusiata, elei, atoa ai ma isi lava ituaiga matata eseese e fa’aaoga i ai le tomai e tele ma taleni o loo maua e ni isi o pagota o loo taofia i le toese i Tafuna.

 

I se vaega o le saunoaga a le afioga i le Komesina o Leoleo ia Save Liuato Tuitele i le aso na asia ai e Ta’ita’i o le malo le nofoaga o le toese i Tafuna i le vaiaso na te’a nei, na taua ai e le afioga a Save le tele o atina’e o loo fuafua e fa’atinoina mo le nofoaga o le toese i Tafuna.

 

“O se tasi o atina’e ua leva ona moemiti i ai le matagaluega e fa’atinoina mo le nofoaga i Tafuna, o le saili lea o auala e fa’aaoga i ai taleni eseese o loo agava’a ai le to’atele o pagota”, o le saunoaga lea a Save.

 

Sa ia taua atili ina ua fesiligia e le Samoa News e fa’apea, ua i ai le fa’amoemoe o le tausaga fou lea o le a amata ai le polokalame mo aoaoga faapitoa mo ali’i pagota, e fa’aaoga i ai lo latou taleni o loo i ai, ina ia mae’a ane le tuliina o fa’asalaga ae ua maua ni galuega lelei e saili i ai lumana’i o latou aiga.

 

I se fa’atalatalanoaga a le Samoa News ma le afioga a Save i ni nai masina e lei mamao atu, sa ia talanoa ai i le polokalame lea ua ia fuafua e amataina i le tausaga fou, o le fa’aaoga lea o fale tuai ia sa taofia ai pagota i totonu o le toese, e avea o se nofoaga e fa’ataunu’u ai ni aoaoga mo matata eseese mo pagota, ina ia mafai ai ona fa’aaoga taleni ma tomai eseese o loo i ai i pagota e fesoasoani atu ai i isi pagota e le o i ai lea taleni.

 

Na taua e se sui sinia o le Pulega o le toese i Tafuna i le Samoa News le amata ona latou galulue e fa’aleleia fale tuai sa taofia ai pagota mo le fa’ataunu’uina ai o le polokalame ua fuafuaina e le Komesina o Leoleo, ae o isi fale ua tuai ma fa’aletonu o le a tatala i lalo.

 

Na fa’ailoa e le afioga i le ali’i kovana ia Lolo Matalasi Moliga i lana saunoaga i ali’i ma tama’ita’i pagota i le vaiaso na te’a nei e fa’apea, o le fa’aaoga lelei o taleni ma meaalofa a le Atua ua tu’uina atu ia te i latou, o se auala lea e avatu ai le isi fa’amoemoe fou i o latou mafaufau ao tuli ai a latou fa’asalaga.

 

Na fautuaina e le ali’i kovana pagota ina ia onosa’i i le tuliina o a latou fa’asalaga, ma mafaufau i mea lelei latou te fa’atinoina pe a fo’i atu i tua i o latou aiga, e ala i le fa’aaogaina o taleni eseese ua foa’i atu e le Atua ia tei latou, atoa ai ma aoaoga lelei ua latou maua mai ao taofia ai i latou i totonu o le toese.

Comment Here