E 2 aso o le fonotaga fa’apitoa a fanau aoga ma sui o le Ofisa o loo iloiloina mataupu e fa’atatau i le Fa’avae ma le lumana’i o le faigamalo a Amerika Samoa, lea ua fa’amoemoe e usuia i le taeao o le aso Gafua ma le aso Lua o le vaiaso nei i le Fale Laumei i Utulei, mo le fa’atalatalanoaina o mataupu e aofia ai le Fa’avae, tulaga o le faigamalo, atoa ai ma le soifuaga o tagatanu’u o Amerika Samoa.

E pei ona taua e le afioga a Tapaau Dr. Dan Aga o lo o fa’auluulu i ai le Ofisa a le malo e iloiloina mataupu o le Fa’avae, i se iloiloga sa faia i luma o le maota o sui i le vaiaso na te’a nei, e to’a 120 le aofa’i o fanau aoga mai aoga maualuluga uma i le atunu’u e aofia ai ma Manu’a, o le a auai i le fa’atalatalanoaina o lenei mataupu taua.

Ina ua fesiligia e afioga i faipule le ali’i foma’i e fa’atatau i le autu ma le taua o lenei fonotaga ua fa’amoemoe e usuia mo le 2 aso, na saunoa ai Tapaau e fa’apea, o le taua o lenei fonotaga, ia amata ai ona fa’amanino i fanau a le atunu’u le uiga moni o le sootaga i le va o Amerika Samoa ma le malo tele o Amerika.

O le autu o le iloiloga e pei ona valaauina e le maota o sui i le vaiaso na te’a nei, o le fia malamalama lea i le aano tonu o fonotaga o loo faagasolo e Tapaau ma lona Ofisa, ma fanau aoga mai aoga maualuluga i le atunu’u.

E pei ona silafia, ua toeitiiti atoa le tausaga talu ona fa’avae le Ofisa o loo galue ai le afioga a Tapaau, i lalo o se poloaiga mai le afioga i le alii kovana ia Lolo Matalasi Moliga, ina ia toe silasila toto’a i mataupu e aofia ai le tulaga fa’amalo o Amerika Samoa, o le tulafono ma le fa’avae o le atunu’u, atoa ai ma mataupu e fa’atatau i le sootaga o Amerika Samoa ma le malo tele o Amerika.

Saunoa Tapaau e fa’apea, e 3 vaega tetele o loo galulue i ai lona Ofisa e fa’ataunu’u, ina ia tusa ai ma le poloaiga a le kovana na fa’avae ai le Ofisa, ma o vaega e 3 e aofia ai le faia o suesuega e fa’atatau i le va feagai o le faavae o le atunu’u ma le malo tele o Amerika, faia o ni gaioiga e fa’amalamalama ai i le atunu’u atoa tulaga o le fa’avae, ma ia faia se taunuuga e atagia mai ai le fa’atinoina o lenei fa’amoemoe taua.

Na fa’amanino e Tapaau i luma o le maota o sui, e le o lona Ofisa e faia suiga o le Fa’avae e pei ona manatu i ai le to’atele, ae o lona Ofisa e galulue e sailiili fautuaga ma fa’amatalaga eseese e fa’atatau i le va feagai o Amerika Samoa ma Amerika, ae o suiga o le Fa’avae e galulue ai ta’ita’i o le atunu’u e aofia ai le Fono Faitulafono, ma tu’uina atu ai loa i le atunu’u i le taimi o le palota mo sa latou faaiuga.

“O le tele o fesili ua mae’a ona fesiligia ai a’u e fanau aoga i fonotaga ua mavae atu, ua foliga mai ai e le o malamalama lelei fanau i le eseesega o le Fa’avae ma le Tulaga Fa’amalo o Amerika Samoa. O le tele la o fonotaga ma aoaoga o loo matou fa’atinoina i le atunu’u, o loo taumafai ai e fa’amalamalama le eseesega o le Fa’avae ma le Tulaga Fa’amalo”, o le saunoaga lea a Tapaau.

“O se tasi o mataupu o loo fa’aauau pea ona fa’amanino i fanau ma le atunu’u, e mafai ona suia la tatou Fa’avae ae le suia ai lo tatou tulaga Fa’amalo ma le malo tele o Amerika”.

“O le taua la o fonotaga fa’aauau nei, o le a mafai ai pea ona fa’amalamalama i fanau le uiga moni o le eseesega o tulaga ia e lua, ina ia fa’a faigofie ai ona faia a latou fa’aiuga pe a avea i latou ma ta’ita’i o le malo i le lumana’i”.

Na fa’amanino atili fo’i e Tapaau e fa’apea, afai e malamalama atoatoa le atunu’u i le eseesega o vaega ia e lua, o le Fa’avae ma le Tulaga Fa’amalo o Amerika Samoa, ona faigofie ai loa lea ona faia a latou fa’aiuga i soo se taumafaiga e galulue i ai ta’ita’i o le malo.