Ads by Google Ads by Google

Folasia finagalo o AS tulaga o lona faigamalo fono malo Aufa’atasi


Afioga Tapaau Dr. Daniel F. Aga, Fa’atonu o le Ofisa o Tulaga Fa’amalo, le Toe Iloiloina o le Fa’avae, ma So’otaga tau Feterale o Amerika Samoa. [ata AF]
ausage@samoanews.com

O le fonotaga e talanoaina ai le lumana’i o atunu’u o le lalolagi e aofia ai ma Amerika Samoa, lea na usuia i le masina na te’a nei i le malo o St. Vincent and the Grenadines, na fa’aleo ai e le afioga a Tapaau Dr. Daniel F. Aga le finagalo o le atunu’u ma ona ta’ita’i i le tulaga tonu o lo o taoto ai le faigamalo a Amerika Samoa i le va feagai ai ma atunu’u o le lalolagi aemaise ai le malo tele o Amerika.

 

O le afioga a Tapaau, o ia lea o le Fa’atonu o le Ofisa o Tulaga Fa’amalo, le Toe Iloloina o le Fa’avae, ma Sootaga tau Feterale o Amerika Samoa, lea na fai ai o ia ma sui o le afioga i le ali’i kovana ia Lolo Matalasi Moliga ma le atunu’u e atoa, mo le fa’aleoina lea o le finagalo o le atunu’u i luma o le Taitaifono ia Rafael Dario Ramirez Carreno ma le mamalu o le Komiti Faapitoa e To’a 24 (Committee of 24 - Decolonization Committee), lea sa latou iloiloina le tulaga o le faigamalo a Amerika Samoa ma isi atunu’u o le lalolagi e le o tutoatasi.

 

E tele vaega o le folasaga a Tapaau e fa’atatau i le tulaga o le faigamalo a Amerika Samoa i le taimi nei, peita’i o le vaega sa tomua i ai lana folasaga, o le fesili e fa’atatau ia Amerika Samoa, poo ia o se malo Kolone pe leai fo’i.

 

Ae i le fa’atauaina ai o le anavatau na fa’atula’i i se I’ugafono mai le Fonotagatele a Malo Aufa’atasi, e fa’atatau i le tofu lea o tagata ta’ito’atasi ma le aia tatau e fa’aleo ai o latou lagona fa’aalia, na fa’atula’i ai loa e Tapaau le fesili i le Taitaifono ma lana Komiti, poo Amerika Samoa ma ona tagata o se malo Kolone.

 

I le tu’uina atu ai o le tali “e leai” i lea fesili e pei ona folasia e Tapaau, sa ia fa’amanino ai le Fa’avae Toe Teuteu a Amerika Samoa o lo o fa’amanino mai ai le olaga saoloto o lo o soifua ma ola ai tagata Amerika Samoa, atoa ai ma aia ua mafai ona latou ausia e o o mai i aso nei, e pei o le aia e palota ai, o le aia e ola fiafia ai i ona laufanua ma faia ai soo se filifiliga sa’oloto e finagalo i ai.

 

“E na o Amerika Samoa lava le teritori o le malo tele [o Amerika] o lo o pulea lava e ia ana tulafono tau femalagaaiga, o lo o i ai fo’i ana tulafono e puipuia ai ana measina ma ana agaifanua, e pei ona i ai le 90% o fanua e umia e totino o aiga o lo o puipuia i lalo o tulafono fa’alotoifale, atoa ai ma le tusa o le 90% o le faitau aofa’i o ona tagatanu’u o tagata Samoa”, o se vaega lea o le folasaga a Tapaau.

 

O le puipuia o le soifua ma le ola lelei mo tagata Samoa, o lo o aiaia lea i totonu o Feagaiga e 2 sa osia i le ulua’i taimi na tu’uina atu ai Amerika Samoa i lalo o le vaavaaiga a le malo tele o Amerika. I totonu o ia Feagaiga, o lo o tu’u mai ai lava le malosi i tagatanu’u o Amerika Samoa e umia sa’oloto ai ona lava atumotu, ae i lalo uma o le puipuiga ma le fa’amalumaluga o le olaga fa’a Samoa moni.

 

Na fa’aalia fo’i e Tapaau i lana folasaga se vaega o le fa’aiuga a le Fa’amasinoga Fa’aitumalo a le setete o Hawaii sa tu’uina mai i le tausaga nei, lea na fa’amausali atili mai ai e le fa’amasinoga le taua o vaega o le Feagaiga sa osia e Amerika Samoa ma le Iunaite Setete, e tu’uina mai ai le aia i ona tagatanu’u e puipui ma fa’aauauina ai tulaga o ana Tu ma Agaifanua e aofia ai ma Faiga Faiva.

 

I su’esu’ega sa faia i le tulaga o le Fa’avae o le atunu’u sa faia i le 1970 ma le 2006-2007, na filifili ai tagatanu’u o Amerika Samoa ina ia fa’atumauina pea le sootaga ma le Iunaite Setete o Amerika, ona o le manatu ia fa’auau pea tulaga o penefiti tau i le tamaoaiga mo le atunu’u.

 

“Ua matou vaai ma aloaia tulaga fa’a malo o ni isi o atumotu tuto’atasi o loo matou tuaoi e pei o Samoa, Fiti ma Tonga. Ae ui i le tulaga taua o le avea ma malo tuto’atasi, o tulaga tau atina’e fa’a malo, tamaoaiga atoa ai ma le soifua lelei, o ni isi ia o itu sa silasila toto’a i ai o matou tagatanu’u”, o se vaega lea o le folasaga a Tapaau.

 

E tele isi vaega na aofia i le folasaga a le afioga a Tapaau e fa’atatau i le tulaga fa’a malo o Amerika Samoa, ma ua fa’amoemoe e fa’aauau atu i le lomiga o le aso a taeao.