E to'a 12 i latou o totino o le Ekalesia CCJS i Pago Pago na alofaina e le latou Ekalesia, le Komiti Fa'afoe na fono ma faia le fa'ai'uga, o le a a'apa atu e tapena ni pusa mea'ai ma nisi o mea e fa'aaogaina i totonu o le lotoifale o aiga, e molita'i i o latou sui ua afaina galuega ona o le tapunia o le Kamupani I'a mo le 5 vaiaso.

O le fa'amoemoe na mua'i si'itia ai le fa'afetai ma le taulaga i le Atua, ina ia fa'aatoa e le Agaga le taua o le foa'i sili mo nai aiga, ua fai si umi talu ona taofia galuega, ma ua iloga fo'i i a latou faitaulaga, ua vaivai a latou tupe maua.

"O le agaga o le Atua e musuia ta'ita'i i mea lelei, e aga i ai le Eklesia e fesoasoani i aiga ua a'afia le tamaoaiga tausi i o latou lotoifale. O le foa'i fo'i, ia faia ma le loto fiafia,” o se tala lea a se tasi o tina matua o le Ekalesia ina ua fesiligia i sona taofi e tusa o le foa'i.

O le CCJS i Pago Pago o lo'o tausia e le susuga le Faife'au Rev. Patolo Mageo ma le Faletua o Mae, ma e ui ina sa fa'atupe mai lenei fesoasoani e le Ekalesia, ae na tu'uina i a'ao o le Mafutaga a Tina e fa'atautaia fa'atauga ma tu'ufa'atasia le fesoasoani mo tagata uma ina ia tofusia ma tutusa lelei le fa'asoa.

"Ua tatou iloa le upu a le Fa'aola e tusa o le foa'i. O sina mea itiiti e talia ma le agaga fa'afetai e i matou nei, ua soloa'i mai ai fa'amanuiaga a le Atua ia te outou o sui uma o le Ekalesia. E moni e lagona le o'otia, ae ona ua tafa le finagalo o le Tama ma le Tina o le galuega ae maise la outou komiti mamalu e foa'i mo i matou, o le fa'afetai ua silafia e le Atua. Fa'afetai tele."

O i latou na fa'amanuiaina e aofia ai: Uale Mulipola, Agamalu Mulipola, Tepora Peaario, Sunema Peaario, Sosefina Uilelea, Naito Paseko, Siera Valo, Anthony Pulu, Loini Availili, Rodenno Tarviay ma Ameki Perenise.

O le lua aso To'onai ua te’a sa faia ai se fa'atasiga tele a i latou uma na mafai ona o'o ane i le Malae o Suigaula a le Atuvasa i Utulei, lea sa taua'aoina atu ai le anoanoa'i o oloa si'iatoa na maua mai le sailiga a le susuga Tapumanaia Galu Satele.

O le agaga lava o le foa'i ma le loto fesaosoani, lea ua fua mai ai lenei galuega lelei ma e fa'afetaia ai fo'i lea atali'i talavou o le atunu'u.

Mai le afio'aga o Faleniu o lo'o fa'aauau ai pea fale'aiga matagofie mo le mamalu lautele o i latou o saili ni tupe mai a latou umu fa'atau atu, po'o mea'ai Samoa moni lava o gaosia ma fa'atau i le mamalu fegasoloa'i po'o le afio'aga lava.

Ua le gata i le Ekalesia a Iesu Keriso o le Au Pa'ia o Aso e Gata Ai, ae ua fa'atautaia fo'i le fale'aiga o le Ekalesia Fa'apotopotoga Kerisiano i Amerika Samoa i Faleniu lava, ma ua fa'aaogaina ai le Maota o Malufau i Faleniu.

O se va’aiga matagofie i taeao o aso To'ona'i ta'itasi e faia ai lea fale'aiga ma ua sili atu ona pisi na'ua lea faletalimalo, aua e matua tumu lelei i fale'aiga ona vaipou.

Ua va'aia le aoga o lenei taumafaiga, ina ua tali le tina, "E ta ane 12:00 po'o le 1:00 ua le toe i ai se mea'ai, ua uma lelei umu a nai aiga, o ulu po'o talo ma fa'i ona fa'atau. Uma ma palusami o fa'alifu ufi ma fa'i ma talo, ua le toe taofia lava se mea latou. O sua moa samoa ua le toe fa'atafa. Ua aoga i nai aiga o sailia se seleni mo mea masani i totonu o aiga."