O le masina ua te’a sa fa’atino ai le foa’i a le Sosaiete a le Fanau Aoga e Maualuluga Togi i Mataupu Tau’ave i Tafuna High [NHS] mo le Hope House i Fatuoaiga.

“O le aotelega o le matou foa’i e $4,000. na maua mai le matou sailiga e ala lea i le matou Color Run” na fa’atautaia faapitoa lava mo lenei fa’amoemoe,” o se saunoaga lea a le ali’i peresetene o le NHS Tafuna.

O le tama’itai faia’oga Tutuila Nauer, lea o lo’o faufautua i lea sosaiete a le a’oga i Tafuna sa ia fa’ailoa mai, “O le isi lea vaega o loo saili agava’a ai le fanau au ausia togi maualuluga i a latou mataupu ma o lo ua avea ma totino o le NHS, ina ia fai i latou ma tagata e tautua i le atunu’u ma ia faia ma le lagona alofa ma le lima foa’i.”

Ona o lenei se vaega tupe tele ua taua’aoina e le fanau a’oga, sa latou fa’ailoa mai, “Matou te fiafia e fa’atino lenei auaunaga, aua o le agaga tonu lea o aiga Samoa, ia alolofa i e gasegase ma tausia lelei i latou, peita’i, o lea ua le  tausia i latou i totonu o aiga, ae ua fa’amautu i lenei nofoaga taua, o lea e fiafia ai e foa’i mo le tausiga fa’apitoa o matua, uso ma tuafafine o lo’o i ai le mana’omia fa’apitoa ona o gasegase po’o le tino matutua foi.”

E tusa ai ma se fa’amatalaga a le tama’ita’i au va’aia nei le aufaigaluega ma le nofoaga i le Hope House ia Beatrice Block, sa ia fa’ailoa ai lona agaga fa’afetai i le lima foa’i o le fanau a’oga, ae maise le vasega o faia’oga o lo’o latou una’ia lea ituaiga o galuega fa’atino mo le fanau a’oga, ona ua avea fo’i le Hope House ma nofoaga e foa’i atu i ai lo latou agalelei.

“Ia avea a’u ma sui e fa’afetai tele atu ai i le NHS Tafuna faapea fo’i ma le isi anoanoa’i o Sosaiete, A’oga, Ekalesia, Aiga ma Fa’alapotopotoga sa latou asia ma fa’ato’ai mai alofa’aga i ala eseese mo le Hope House ma i latou uma o tausia fa’apitoa ai, ae maise fo’i o le matou taupulega ma le aufaigaluega i lo outou fa’amama avega i ala e fa’atino ai lenei tautua.”