Foa’i Neil’s Home Center $26,000 i le Community Cancer Coalition


O le taimi o le fa'afetai a le Sui Taitaifono a le ASCCC, Taotasi Archie Soliai i le Neil's Ace Home Center ona o le foa'i e $26,000+ lea ua mae'a taua'aoina mo i latou e fa'asoasoa atu i le vasega o gasegase Kanesa ua mae'a talosagaina se fesoasoani. [ata: TG]

Teniseli Ma'ae o le Ace ua ia saunoa fa'afeiloa'i i sui mamalu o le ASCCC na o'o atu e talia le fesoasoani a le latou Kamupani ma latou pa'aga sa fa'atau i lo latou faleoloa o oloa eseese i le vaitau o le Kerisimasi ma le tausaga fou, lea ua tu'ufa'atasia ai le aofaiga e $26,000+ mo i latou o talosagaina se fesoasoani tau tupe ona ua pagatia i le Kanesa. [ata: TG]

O le aso Gafua na taua'aoina ai e le Neil's ACE Home Center le latou foa'i e $26,333.72 i le American Samoa Community Center Coalition.

 

O lenei foa'i sa maua mai i le mamalu lautele o le atunu'u sa foa'i ma le agaalofa i le vaitau o fa'atauga o le Kerisimasi 2017 ma le Tausaga Fou lenei.

 

"O lenei fo'i foa'i ua sili atu nai lo se isi lava foa'i ua faia e tagata fa'atau e ala i lenei taumafaiga i tausaga ta'itasi mo le 8 ai lenei o tausaga,” o se tala lea a Nadine Solofa-Taufa'asau CEO o le Neil's Home Center.

 

O le fa'atulagaga o lenei lava foa'i, o le aofaiga o le tupe e maua mai tagata fa'atau a le Neil's Home Center, e toe fa'aluaina e le kamupani ona fa'ato'a taua'aina ai lea o le aotelega atoa i le Community Cancer Coalition ina ia taua'aoina ia i latou na talosaga mai mo se fesoasoani.

 

I le tausaga ua te'a, na tu'ufa'atasia ai le foa'i a tagata fa'atau ma maua ai le $13,166.86.

 

O le susuga Taotasioatua Archie Soliai, Sui Taitaifono o le Community Cancer Coalition ma Christinna Lutu Sanchez, o se isi fo'i totino o lea lava asosi, na o'o ane i le Neil's Home Center i le aso Gafua e talia lea meaalofa tele ua latou maua, e mafai ona fesoasoani atu ai i le mamalu o e o talosaga mai, o sui fo'i ua maua i le Kanesa o so'o se ituaiga, ae ua lutia ini fa'afitauli e ala ai le tulaga mana'omia o se fesaosoani tau tupe.

 

O Solofa-Taufa'asau sa avea ma sui o le Kamupani fa'atasi ai ma le vasega o le pulega ma le aufaigaluega e fa'ao'o lea foa'i i le Community Cancer Coalition.

 

E ese mai nei sui totino o le asosi na auai atu sa i ai ma nisi o sui fou ua auai ma o nisi fo'i ua mae'a tauina lea taua ma le Kanesa. O i la'ua ia sa matua iloga ona fa'afetai aua o lenei foa'i e aoga sina vaega ia i la'ua fo'i.

 

O se tala mai se tasi o sui o le Community Cancer Coalition, ua fa'ailoa mai ai, "Pe afai e mana'omia e so'o se tasi ua mae'a maua i le Kanesa se fesoasoani e fa'ao'o mai lana tusi talosaga fa'atasi ai ma le fa'amaoniga o le ituaiga Kanesa ua maua ai o ia. E fa'amaonia mai lava e le foma'i o lo'o va'aia o ia i le falema'i sa faia ai lana talavai, po'o iinei po'o fafo fo'i."

 

I le taimi nei e tusa ma le 10 talosaga ua mae'a fa'ao'o mai i le Community Cancer Coalition i le masina o Ianuari 2018, ma o i latou fo'i nei e aofia ia i latou o le a fesoasoani i ai.

 

Mai fa'amaumauga o le tausaga 2017 e silia i le to'a 35 i latou na fesaosoani i ai le Community Cancer Coalition ma fa'asoa atu i ai le seleni sa latou mauaina e ala i le foa'i fa'apenei a le Neil's Home Center, o le latou Ta'amilosaga Tapolo sa saili tupe ai.

 

O nisi o totino o le Community Cancer Coalition, ua aofia ai le tama'ita'i Peresetene Rochelle Reid o le ta'ita'ifono, Sui Ta'ita'i Nadine Solofa -Taufa'asau, Failautusi o Si'itia Lemusu, Teutupe o Christinna Lutu-Sanchez.

 

O nisi sui iloga o le ASCCC e aofia ai Silia Feliciano, Tuli Fruean ma Moseniolo Viane Etuale.

 

Saunoa ia Solofa-Taufa'asau sa ia fa'ailoa mai ai i lana fe'au fa'afetai, "O le faia o se galuega alofa mo se tasi, o se mea matagofie i le fa'alagona alofa o se tasi o mafatia. Afai fo'i ua le mafai ona tatou fesoasoani malosi atu ia i latou, a'o avatu ia i latou le lagona o le fesoasoani i se isi lava itu e tau'ave fa'atasi ai o latou tiga, o se mea sili lea ua mafai ona tatou faia fa'atasi ona o lo outou alofa fa'atino e ala i le seleni ua maua nei mo le meaalofa e fa'auia i le ASCCC. Fa'afetai i e uma na fa'atau ma foa'i, o i latou fo'i e le'i foa'i, e toe oso le la ma e tele fo'i avanoa lelei e faia e le Atua mo i tatou uma e fa'auia ai sau fesoasoani."

 

Na fa'ailoa mai fo'i e faia le ta'amilosaga Tapolo i se vaitau o lenei fo'i tausaga, ma e fa'aiauiloa lava. O i latou fo'i e auai e tauva i lea ta'amilosaga, o le latou sao lava fo'i lea mo le fa'amoemoe aua o le isi lea ala o saili ai tupe mo le fa'amoemoe e taua'aoina mo sui uma o lo'o mana'omia le fesoasoani tau tupe e pasese ai mo talavai, pe totogia ai fo'i latou talavai.

 

 O i latou uma e fia talosaga mo ni fesoasoani nei e mafai ona e talosaga i luga o laina feso'ota'i a le Initeneti:  #HelpingthepeopleofAmericanSamoafightcancer

Comment Here