Foa’i BlueSky meaalofa mo fanau taofia Falema’i


Le Taitai o le vaega a le Bluesky ia Filifotu Vaai-Tinitali (itu taumatau) i le taimi na sauni ai e tauaao atu ai le siaki tupe e $1,000 i sui o le LBJ fa’atasi ai ma isi meaalofa na ofo atu e le kamupani a le Bluesky mo fanau o loo taofia i le potu o fanau i le falema’i i Fagaalu i le aso ananafi. [ata AF]

Le taimi na tauaao ai e le Peresetene o le Asosi o Tausima’i i Amerika Samoa ia Tofiga Tufele le siaki tupe e $1,000, o le foa’i a le BlueSky faatasi ai ma isi meaalofa eseese mo fanau o loo taofia i le potu a fanau i le falema’i o le LBJ i Fagaalu i le taeao ananafi. [ata AF]
ausage@samoanews.com

O le taeao ananafi na tauaao ai e le Pulega a le Falema’i o le LBJ i Fagaalu ni meaalofa eseese mai le Kamupani Telefoni a le Bluesky, e fai meaalofa atu ai i fanau uma lava o lo o taofia i le vaega o le Pediatric Ward, ao alo atu ai le atunu’u i le fa’amanatuina o aso fiafia o le kerisimasi ma le tausaga fou i le fa’aiuga o lenei tausaga.

 

Talu ai le fetaui lelei o le taimi na tauaao ai le foa’i a le Bluesky ma le i ai o le afioga i le Lutena Kovana i le asiasiga masani a le malo i le Falema’i, o le mafua’aga lea na saunoa ai le afioga Lemanu Peleti Mauga e fai ma sui o le falema’i ma le malo o Amerika Samoa, e fa’afetaia ai le pulega a le kamupani telefoni a le Bluesky ona o lenei foma’i.

 

Na taua e le Pule o le lala o le BlueSky i Amerika Samoa ia Filifotu Vaai-Tinitali e fa’apea, e pei ona masani ai le Pulega a le Kamupani mo le fa’atinoina o a latou foa’i fa’apenei, e filifili i latou poo fea se poloketi e ave i ai la latou fesoasoani i lenei tausaga, ma pasia ai loa le ave o le latou foa’i mo le potu o loo taofia ai fanau laiti o le atunu’u i le falema’i, e fa’ailoga ai le agaga o aso fiafia o lenei tausaga.

 

“E le gata matou te fia fai meaalofa atu i fanau uma a le atunu’u o lo o taofia i le falema’i i le faaiuga o lenei tausaga, ae o se meaalofa fa’atauva’a fo’i lea i le pulega a le falema’i, ona o lo outou tausiaina ma le alofa o alo ma fanau a le atunu’u”, o le saunoaga lea a Vaai-Tinitali.

 

O meaalofa sa foa’i e le Bluesky e aofia ai se siaki tupe e $1,000 fa’apea ai meaalofa e pei o api aoga, tusi faitau, ma vaega eseese uma e fa’aaoga e fanau i aoga, aemaise ai o taumafa e fa’ailoa ai lo latou agaga fai meaalofa mo i latou.

 

Na fa’ai’u fo’i la latou foa’i i le usuina lea o se pese kerisimasi e aualofa atu ai i fanau uma a le atunu’u o lo o taofia i le maota gasegase i Faga’alu.

 

Na  faafetaia e le afioga a Lemanu le Pulega a le BlueSky ona o le meaalofa ua mafai ona latou tauaaoina i lenei vaitau o le tausaga mo fanau a le atunuu.

 

“Ou te iloa e le o se taimi muamua lenei ua outou foa’i ai mo le malo ma le atunu’u, ua le tasi pe lua a outou foa’i ua faia, ae ua tele ma faula’i, avea ai a’u e fai ma sui o le afioga i le ali’i kovana ma le malo o Amerika Samoa, e fa’afetai atu ai i le Pulega a le Bluesky ona o la outou fesoasoani i aso e tele”, o le saunoaga lea a Lemanu.

 

Saunoa fo’i Lemanu fo’i e faapea, o le ofoina atu o meaalofa i aso faapenei, e atagia mai ai le agaga o le fealofani ma le felagolagoma’i o le atunu’u i soo se taimi.

 

O le Peresetene o le Asosi o Tausima’i i Amerka Samoa ia Tofiga Tufele na saunoa e fai ma sui o le LBJ, e fa’afetaia ai le foa’i a le Buesky.

 

“Fa’afetai tele i lo outou amanaiaina o la matou tautua fa’atauva’a, matou te le faia lenei tautua ona o se manatu ia maua mai ai ni taui, ae o loo fa’ataunu’uina lea ina ia mautinoa ai o loo maua e le atunu’u atoa aemaise nai fanau le soifua maloloina ma le ola manuia”, o le saunoaga lea a Tofiga.

 

Na taua e se tasi o Tina o lo o taofia lana tama e 8 tausaga i le potu taofia a le fanau lona agaga fa’afetai ina ua maua e si ana tama se meaalofa mo le kerisimasi.

 

“Ua avea lava ma’i o le fanau ma auala ua le ano ai le mafaufau e fa’atau se meaalofa mo le fanau, ae fa’afetai i le Bluesky i lo latou amanaiaina o fanau a le atunu’u i lenei tausaga”, o le saunoaga lea a le Tina.

Comment Here