Ads by Google Ads by Google

Finau pea ni isi o Faipule ina ia auai Fa’atonusili i taimi o iloiloga


Nisi o sui o le Kapeneta a le afioga i le ali’i Kovana [ata AF]
ausage@samoanews.com

E ui o lea ua taoto se talosaga mai le afioga i le ali’i Kovana o le malo, e fautuaina ai Ta’ita’i o le Fono ina ia fa’aagafua Fa’atonusili mai le auai i iloiloga a Komiti taitasi, ona o loo tuatuagia i latou i galuega a le FEMA i le taimi nei, peita’i na finau pea ni isi o afioga i Faipule i luma o le maota o sui i le vaiaso nei, e tatau pea ona auai Fa’atonusili i taimi o iloiloga.

 

O le taimi o folafolaga a le maota o sui i le latou tauaofiaga i le aso Gafua na te’a nei, na fa’ailoa ai e le Sui Fofoga Fetalai sa ta’itaia galuega a le maota, afioga Fetu Fetui Jr lona tauaaoina o se tusi mai le afioga i le Kovana, e fa’ailoa mai ai le le avanoa mai o Fa’atonusili mo iloiloga a Komiti, se’i vagana ai sui fa’atonusili lea ua filifilia e oo mai e molimau i iloiloga.

 

Na saunoa le afioga a Gafatasi Afalava ma ia taua ai lona le lagolagoina o le faaiuga a le Kovana, ona e tatau lava ona oo atu Faatonusili e molimau i iloiloga, o i latou ia e lava lo latou silafia i faaiuga ma mea o loo tutupu i totonu o Matagaluega eseese.

 

Saunoa atili Afalava e fa’apea, afai o loo pisi Faatonusili i galuega asiasi a le FEMA, e i ai lona talitonuga e mafai lava ona sui tulaga atu i ai sui fa’atonusili e galulue ma sui o le FEMA, ae fa’aavanoa mai Fa’atonusili e tali i fesili a le Fono.

 

O le afioga i le Faipule Tama’ita’i ia Vui Florece Saulo na lagolagoina le finagalo o Gafatasi. Saunoa Vui e fa’apea, o le tele o asiasiga a le FEMA i totonu o lona itumalo o loo ia auai atu i ai, e na o le afioga lava i le tama’ita’i Faatonusili o le Matagaluega o Galuega Lautele ia Faleosina Voigt o loo ia vaaia o loo pisi ma galue ai, ae o isi uma Fa’atonusili e le o vaaia i latou i le tele o asiasiga nei.

 

I lona taofi, na te lagolagoina le finagalo o Gafatasi, e tatau lava ona auai afioga i Faatonusili i taimi o iloiloga, ae tofi sui fa’atonusili e o e galulue ma le FEMA.

 

Na faapupula atili e Fetu e fa’apea, e tatau i le maota ona fa’autagia le finagalo o le Kovana, ona o le tulaga pisi ma le le avanoa o Fa’atonusili i le taimi nei, e mafua mai i galuega fesoasoani mo le atunu’u na a’afia i le ‘afa o Gita o loo pisi ai latou.

 

“E mafai fo’i ona tali e sui faatonusili atugaluga ma fesili a le maota, ae i lo’u taofi, e tatau ona tatou aloaia le finagalo ma le fautuaga a le afioga i le ali’i kovana”, o le saunoaga lea a Fetu.

 

O le aso Gafua na te’a nei na tauaao ai e ta’ita’i o le Fono se tusi mai ia Lolo e fa’ailoa mai ai sana talosaga fa’aaloalo, ina ia fa’aagafua Fa’atonusili mai le auai i iloiloga a komiti taitasi a maota e lua, ona o loo pisi i latou i galuega a le FEMA, mo le ofoina atu o fesoasoani mo le atunu’u.

 

Saunoa Lolo e fa’apea, o Faatonusili o loo naunau le Fono e auai i a latou iloiloga, o i latou tonu ia o loo fai ma poutu i fesootaiga a le malo ma le FEMA. E mafua ona auai Faatonusili i soo se taimi e alu ai asiasiga a le FEMA e pei ona saunoa Lolo, e mana’omia lo latou auai mo le faia o fa’aiuga i le taimi lava e mana’omia ai.

 

Saunoa atili le ali’i Kovana e fa’apea, o loo avanoa sui fa’atonusili e mafai ona tali i fesili a le Fono, o loo tele fo’i lo latou silafia i mataupu o loo atugalu i ai Senatoa ma Faipule, aua o lo o auai fo’i i latou i taimi uma e faia ai fa’aiuga mo le manuia o matagaluega taitasi a le malo.