Ads by Google Ads by Google

Finau Faipule pe talia pili fa’aulu ua tuana’i taimi fa’atulafonoina

ausage@samoanews.com

Na umi se taimi o faia fa’afinauga a afioga i Faipule i le aso Faraile na te’a nei, pe talia le tulafono taufa’aofi lea na fa’aulufale atu i luma o le maota ae ua tuana’i taimi fa’atulafono e tatau ai ona toe fa’aulu se pili fou.

 

O lenei tulafono taufa’aofi sa fa’aulufaleina lea e le afioga i le tama’ita’i faipule ia Atalina Asifoa, o se pili e fa’avae ai le Tulafono o Tausima’i i Amerika Samoa, fa’atu ai se mataupu fou 09 i lalo o le Ulatala 31 o le Tulafono Toe Teuteuina a Amerika Samoa.

 

O le mae’a ai ona faitau e le Failautusi o le maota o sui o le numera o le tulafono fou a le maota o sui (P.M.S NU. 34_37), na tula’i ai loa le afioga a Atalina ma talosaga i le maota mo se avanoa e faia ai sa latou talanoaga pu’upu’u pe a mae’a le tauaofiaga, e talanoaina ai le pili taua lea fa’atoa fa’aulufale mai ae ua tuana’i taimi o lo o fa’atulafono e le maota e tatau ai ona fa’aulu ni pili fou i luma o le maota.

 

Saunoa le sui fofoga fetalai o le malta sa fai ma ta’ita’i, afioga Fetu Fetui Jr e fa’apea, e ui o lea ua soli tulafono a le maota ina ua fa’aulu le pili fou ae ua tuana’i le taimi ua fa’atulafonoina, peita’i e faigata ona teena lenei tulafono, ona o se tulafono taua tele, e tatau fo’i ona fa’aalu i ai se taimi o le maota e talanoaina ai.

 

Saunoa atili le sui fofoga fetalai e fa’apea, ua leva tele ona ia fa’alogo o ta’u ta’u le pili lenei e fa’atatau i le fa’atulafonoina o galuega a Tausima’i i Amerika Samoa, a o lea fa’atoa ulufale atu i le maota ae ua tuana’i le taimi fa’atulafono e tatau ona toe fa’aulu ai ni tulafono fou.

 

Na tula’i le afioga i le faipule ia Vaetasi Tuumolimoli Saena Moliga ma fa’auilavea i le finagalo ua taoto i luma o le maota, ona e le tatau lava ona toe talanoaina se pili e tuai ona fa’aulu i luma o le maota.

 

“Lau afioga i le sui fofoga fetalai, o lo o manino tulafono a le maota, o le 30 o aso mai le aso e fa’amuta ai se tauaofiaga, e le toe taliaina ai se tulafono fou ona toe fa’aulu i luma o le maota, e fa’afetai atu i le afioga i le faipule sa ia fa’aulufaleina lenei pili taua ma le aoga, ae o la’u fautuaga, e sili pe a taoto lenei pili taua seia aulia le isi nofoaiga o lo o muamua mai, o ai lava e toe tula’i mai i lena tausaga, o i latou ia o le a talanoaina lenei tulafono, ae le aoga ona tatou fa’anatinati i ai, ona e tele naua galuega e tatau ona fa’atinoina, e le gata e faia iloiloga ae aami fo’i molimau e tele”, o le saunoaga lea a Vaetasi sa fa’aluaina fo’i e le afioga i le tama’ita’i faipule ia Vui Florence Saulo.

 

Saunoa Vui e fa’apea, e alofa atu i le tama’ita’i faipule sa ia fa’atula’i lenei mataupu, ae i lona taofi, ua soli le tulafono ona ua tuai ona fa’aulu le pili, ae mafua mai i le le lava o loia o lo o galulue e tusi ma tu’u fa’atasi tulafono mo galuega a faipule i le maota fono.

 

Na faagasolo isi mataupu sa lalafo i ai afioga i faipule, ae ina ua oo i le taimi o le a fa’amae’a ai galuega a le maota, na toe talosaga ai loa le sui fofoga fetalai i afioga i faipule, ina ia fa’amuli atu pe a mae’a le tauaofiaga, se’i o latou talanoaina le pili lea ua fa’atoai atu i totonu o le maota.

 

“O le pili lenei sa ou talosagaina mai lava i le amataga o le tausaga, a o lea fa’atoa tu’uina mai ua o o i le fa’aiuga o le tauaofiaga, o se pili taua fo’i ma aoga mo le vaega Tausima’i, ina ia mafai ai ona fa’atulaga a latou tiute ma tautua i lalo o le tulafono, ina ia mafai ai ona foia fa’afitauli o lo o masani ona tula’i mai i la outou pito laau”, o le saunoaga lea a Atalina.