Ads by Google Ads by Google

Finau Afalava ua tatau ona Tumaoti le Fale Televise a le malo

ausage@samoanews.com

Na fa’aalia e le afioga i le ali’i Faipule mai Leasina/Aitulagi ia Gafatasi Afalava e fa’apea, afai o le tulaga lea ua i ai le fa’atinoina o le tautua a le Fale Televise a le malo, le KVZK-TV, o le fa’asalalau na o faigalotu a le malo fa’atuatuana’i Ekalesia ma le atunu’u, ua sili ai loa le tu’uina atu o le Fale Televise e fa’atautaia e se pisinisi Tumaoti, atonu e mafai ai ona tali manaoga o le atunu’u lautele.

 

E lei nofo lelei i finagalo o le to’atele o afioga i Faipule le saunoaga a le Sui Fa’atonu o le Fale Televise i se iloiloga sa faia i le aso Faraile na te’a nei, le tulaga e pei ona fa’aalia, o le fa’atonuga mai le afioga i le ali’i Kovana lea ua mafua ai ona pu’e na o faigalotu a le malo i tua i nu’u ma afioaga, ae o faigalotu a afioaga e aumai uma lava i le nofoaga autu a le Fale Televise i Utulei e pu’e ai.

 

Saunoa Afalava e fa’apea, o le tulaga sa sau ai le polokalame o faigamalotu a ekalesia ma afioaga, sa pu’e lava i tua i malumalu, e le gata e mamalu ma aloaia, ae aofia uma ai fo’i le nu’u i le sauniga lotu o le a pu’eina, peita’i o le suiga e pei ona fa’asea ai le to’atele o afioaga ma ekalesia, ua le toe pueina sauniga lotu i tua i afioaga, ae ua pu’e tasi uma i Utulei i le nofoaga autu a le Fale Televise.

 

O le fa’afitauli o le nofoaga lea, e le gata e laititi, ae le ofi uma ai fo’i le afioaga atoa poo le ekalesia, sei vagana ai lava se vaega toaititi.

 

Na taua e le sui faatonu ia Tautinei Misioka Olo e fa’apea, o le faatonuga mai le Kovana sili lea ua mafua ai ona i ai suiga e pei ona aloaia e le aufaigaluega. E na o sauniga lotu fo’i a le malo e pei o aso Tama, aso Tina, sauniga tatalo a le Toa o Samoa, ma isi lava sauniga lotu faapitoa a le malo, pau ia o sauniga lotu ua fa’ataga le pu’e pea i tua i afioaga.

 

O isi uma sauniga lotu e ekalesia ma afioaga ua faatonuina ina ia pu’e uma i le nofoaga autu a le Fale Televise.

 

E mafua lea tulaga e pei ona saunoa Olo, e faigata ona fesiita’i solo masini e pu’e ai polokalame, ona ua silia ma le 50 tausaga le matutua o masini, ua fa’aeteete gata fo’i i le soona fesiita’i ina ne’i fa’aletonu ona le toe maua lea o ni masini.

 

O le isi mafua’aga e pei ona saunoa Olo, e sili atu le pu’e o sauniga lotu i le ofisa autu, afai ae i ai se fa’aletonu i le pu’eina o le polokalame, o loo mafai lava ona toe pu’e fa’alua, ae afai e pu’e i tua i afioaga ae oo mai i le ofisa ae siaki atu le polokalame e i ai le faaletonu, e leai se taimi vave e mafai ai ona toe talosagaina le ekalesia ina ia toe pu’e le sauniga lotu.

 

Saunoa Gafatasi e fa’apea, e le taliaina e lona sui faipule alofaga ua fa’aalia e le molimau e tusa ai o suiga ua faia. Sa ia taua fo’i e fa’apea, na te fa’aaloalo i le finagalo o le Kovana, ae le taofia ai fo’i le fa’aalia o lona manatu e tusa ai o lenei mataupu.

 

Saunoa le faipule mai le afioaga i Pago Pago, afioga Veevalu Meauta Lauoi Mageo, e le tatau i le Fale Televise ona nofonofo ai lava ma nei masini tuai, ae ua tatau ona fai se gaioiga e fa’afou ai a latou masini e pu’e ai polokalame mo le maimoa a le atunu’u.

 

Saunoa le afioga i le ali’i faipule ia Vailiuama S. Leasiolagi e fa’apea, na te le lagolagoina le fa’amatalaga a le molimau, e faapea o le fautuaga a le kovana lea ua mafua ai ona faia suiga i le latou tautua. I lona talitonuga, e le tatau ona oo fua le malosi o le Kovana e fai ai faaiuga mo le Fale Televise, o le tiute lena a le Fono Faitulafono ma le Faatonusili.

 

Ae na saunoa le afioga a Vaetasi Tuumolimoli Saena Moliga e fa’apea, e sili atu le lelei o ata e pu’e i totonu o le nofoaga autu a le Fale Televise, nai lo ata e pu’e i tua i afioaga ma ekalesia.

 

I le faaiuga o le iloiloga, na malilie ai loa le Komiti, i lalo o le ta’ita’iga a le afioga i le Taitai Komiti ia Faimealelei Anthony Fu’e Allen, o le a saunia se iugafono e tuuina atu i le Kovana, e talosagaina ai le tatau lea ona toe fa’afo’i le pu’eina o sauniga lotu a Ekalesia i tua i afioaga e pei ona masani mai ai i aso ua mavae.