Finagalo Toeaina e fa’amanino lelei tiute tauave Ofisa Mataupu Tau Samoa


[ata: foa'i]
ausage@samoanews.com

Ua talosagaina e le afioga i le ali’i Faipule mai Manu’a #2 ia Toeaina Faufano Autele se avanoa e valaauina ai se iloiloga a le Komiti o Fa’amasinoga ma Tulafono ma le Failautusi o le Ofisa o Mataupu Tau Samoa, mo le fa’amaninoina o le auaunaga a lea Ofisa i le va feagai ai ma afioaga ma itumalo i le atunu’u.

 

O le afioga i le Maoputasi ia Mauga Tasi Asuega lea ua fa’amoemoe e avea ma molimau autu mo lenei iloiloga.

 

Na taua e Toeaina i sana saunoaga i le vaiaso na te’a nei i luma o le maota o sui e fa’apea, talu ai o Amerika Samoa o le teritori o le malo tele o Amerika, e tatau ai fo’i ona tutusa lelei auala e fa’afoe ai faigamalo a le malo tele ma ana teritori.

 

I le auala o lo o fa’afoe ai faigamalo a le malo tele e pei ona saunoa Toeaina, e maioio lava tiute tauave a vaega eseese e pei o Setete, aai, atoa ai ma itumalo. Ae o le tulaga o loo maitauina ia Amerika Samoa, e le o le auala lea o loo fa’afoe ai le Ofisa o le Malo Faalotoifale.

 

“E le gata ua fefiloi fa’atasi uma matafaioi a afioaga ma itumalo i lalo o le vaavaaiga a le Ofisa o Mataupu Tau Samoa, ae ua aveese mai ai fo’i le ‘aia atoa ai ma le malosi o loo tuuina atu i afioaga ma itumalo e fa’afoe ai lava a latou faigamalo. Ua ufiufi uma i lalo o le malo o le faigamalo”, o le saunoaga lea a Toeaina.

 

Saunoa atili Toeaina e fa’apea, o se tasi o fa’afitauli ua ia maitauina i le taimi nei, ua mafua ona tutupu nei mau suiga, o le to’atele o tamali’i ma i latou o loo umia suafa matai maualuluga i afioaga ma Itumalo, ua o mai uma e galulue i le malo ae tuu afioaga ma itumalo e tatau ona ave i ai la latou fa’amuamua.

 

O se tasi o mataupu na aofia i le saunoaga a Toeaina, o le taulimaina e le Ofisa o Mataupu Tau Samoa o mataupu tau suafa matai a aiga o le atunu’u.

 

O le fa’afitauli ua maitauina e pei ona saunoa Toeaina, ua tu’u tia’i e le Ofisa o Mataupu Tau Samoa la latou matafaioi e iloilo ai ma fai faaiuga i mataupu e fa’atatau i suafa matai o aiga, ae ua latou lafo atu i le Faamasinoga o Fanua ma Suafa e faia le fa’aiuga.

 

Na taua e Toeaina e fa’apea, afai ua aapa le Ofisa o Mataupu Tau Samoa e fai faaiuga i totonu o afioaga ma itumalo o le atunu’u, e le tatau fo’i la ona latou toe tuuina atu faaiuga i suafa o aiga e fai mai e le fa’amasinoga se fa’aiuga, ae tatau lava ona fa’atino e i latou.

 

O le isi faafitauli ua maitauina, ua tele naua suafa matai tetele o aiga ma le atunu’u o loo avanoa, e mafua mai i le tuai ona faia o fa’aiuga i mataupu i suafa o aiga.

 

A mae’a le iloiloga ma le Ofisa o Mataupu Tau Samoa, ona fuafua ai loa lea o se iloiloga ma Faamasino Lagolago mo le fesiligiaina o le mataupu i suafa matai o aiga.

Comment Here