Filifilia Tilo Vasaga Tilo avea ma Senatoa fou mo Aua ma Leloaloa


Le taimi na lulu aao ai le afioga i le Maoputasi ia Mauga Tasi Asuega i le afioga i le ali’i Senatoa ia Uti Petelo, ina ua mae’a ane le se’i ma manino ai le mataupu, o le afioga a Tilo Vasaga Tilo lea ua filifilia nei e avea ma Senatoa o Aua ma Leloaloa, e atoa i ai le to’atolu o Senatoa o le itumalo o le Maoputasi i le maota maualuga a le Senate. [ata AF]
ausage@samoanews.com

O le fonotaga a le Itumalo o le Maoputasi i le vaiaso na te’a nei mo le sailia o tofi a le itumalo mo le isi 4 tausaga o lo o lumana’i nei, ua filifilia ai le afioga ia Tilo Vasaga Tilo e avea ma Senatoa fou mo le falelua i Aua ma Leloaloa, e atoa i ai Senatoa e tolu a le Itumalo o le Maoputasi i totonu o le maota maualuga a le Senate.

 

E ui e le i faigofie le auala na fa’atinoina e sailia mai ai se senatoa o le Falelua, ina ua tele fonotaga sa faia ae le i maua lava se tasi po o ai e seei i le nofoa, peita’i na malilie uma itu e lua ina ua tu’uina mai le fa’aiuga o le se’i sa faia, o le afioaga i Aua o le a see atu i ai le tofi mo le isi 4 tausaga o lo o lumana’i nei, ina ua faia le se’i ma manino ai, o le igoa o Aua na se’i e le afioga i le Fa’alupega ia Mailo, o i latou lea ua see atu i ai le nofoa mo le isi 4 tausaga.

 

Ina ua le maua se tasi i le va o Aua ma Leloaloa, po o ai o le a tauaveina le tofi Senatoa, na tofu atu ai loa le mataupu i luma o le fonotaga a le Itumalo o le Maoputasi sa faia i le aso Gafua o le vaiaso na te’a nei, mo se fautuaga mai le afioga i le Maoputasi ia Mauga Tasi Asuega, peita’i na fautuaina e le Itumalo ia Aua ma Leloaloa, e sili pe a toe fono e fa’amautu mai ai so latou sui filifilia.

 

E pei ona taua e sui o Aua i luma o le ulua’i fonotaga a le Itumalo i le aso Gafua, e tele fonotaga sa faia a Aua ma Leloaloa e saili ai so latou sui senatoa, peita’i e le i maua lava se tasi.

 

O le fonotaga lona lua lea na usuia i le aso Lulu o le vaiaso na te’a nei, na fesili ail oa le afioga i le Maoputasi ia Mauga ia Tuaolo ma le Itumalo, pe ua maua se tonu o le mataupu ia Aua ma Leloaloa, ae na saunoa Tuaolo, e le i maua lava se tasi, ae sili pe a taoto atu pea ia Aua ma Leloaloa e fa’amanino le tulaga o le latou mataupu.

 

Na taua e se tasi o sui o Leloaloa e fa’apea, ua fiu lava e taumafai se auala e foia ai le fa’afitauli ae ua le mafai lava. O lo o tumau pea le talitonuga a Aua o i latou lea ua o o atu i ai le tofi, ma o le afioga a Tilo lea ua latou filifilia e fai ma o latou sui, ae o lo o tumau fo’i ona finau atu Uti, e taoto atu le tofi na te toe fa’aauauina mo le isi 4 tausaga.

 

Na taua e Iulogologo J. Pereira i luma o le Itumalo le talosaga o le afioga i le Maopu ia Uti mai Leloaloa e toe fia tautua i le tofi senatoa mo le isi 4 tausaga, peita’i na taua fo’i e Aua le mae’a lea o le latou filifiliga, ma ua tasi ai Ali’i o le Faleono i le afioga a Tilo e avea ma o latou sui.

 

Ina ua toe fesiligia e le Itumalo ia Aua ma Leloaloa i le fonotaga lona lua i le aso Lulu na te’a nei, pe ua maua sa latou sui senatoa fou, na fa’ailoa ai e le tofa Iulogologo le tumau lea o le leai o se latou fa’aiuga mautu ua maua, ma ia tu’u atu ai loa le avanoa i le afioga a Uti  mo sana saunoaga.

 

Na saunoa Uti e fa’apea, e le o malamalama lona loto pe aisea ua oo mai ai le latou mataupu i luma o le Itumalo, aua o lea ua mae’a ona faia lana saunoaga i le afioga a Tilo ma ali’i o le Faleono, o ia (Uti) lea o le a toe fa’aauauina le nofoa, ina ua le maua lava se latou tasi i le tele o a latou fonotaga sa faia.

 

“O le itu ou te mana’o e malamalama i ai le Falelua i Aua ma Leloaloa, o le tofi Senatoa lea o lo o tatou vavao ai nei, e le o se tofi o Aua po o Leloaloa, e leai, o le tofi o le Itumalo, e pule ai fo’i le Itumalo po o ai latou te filifilia e nofoia le nofoa, pe afai e le lagolagoina e le Itumalo le sui o le a tatou filifilia”, o le saunoaga lea a Uti.

 

A o le i saunoa le afioga a Mauga, na fa’ailoa e Tuaolo ia Aua ma Leloaloa le le tatau lea ona latou toe faia le faaiuga lea fo’i ua toe tula’i mai i lenei tausaga, o le aumai lea o le latou senatoa e filifili atu e le afioga i le Maoputasi.

 

“O la outou galuega lena e fai, ia saili le tofa ma le utaga loloto i se tasi e fai ma o outou sui, aua tou te fa’amoemoe mai e fai atu e Mauga ma le itumalo se fa’aiuga o la outou mataupu, e le tatau fo’i ona outou taumafai e pulea mai Mauga ma le itumalo poo ai le sui ua outou mananao i ai, o lea la ua manino le mata o le vai, ua le maua se tasi e fai ma o outou sui, o le taimi la lenei o le a taoto atu ai loa le fa’aiuga e fai e le afioga a Mauga”, o le saunoaga lea a Tuaolo, ma ia fautuaina ai loa le afioga i le Maoputasi ia Mauga ina ia aua ne’i fefe e fai le fa’aiuga amiotonu.

 

“Lau afioga i le Maoputasi  Mauga, o le fa’aiuga lena ua i ou aao, aua e te fefe e fai le mea sa’o, o ai lava o le a e filifilia e fai ma sui o Aua ma Leloaloa, fa’amoemoe i le Ali’i ma ia fai le mea amiotonu”, o le saunoaga lea a Tuaolo.

 

Na molimauina e le Itumalo le si’isi’i o le si’ufofoga o Mauga a o saunoa e fa’amanino le tulaga e uiga i le mataupu a Aua ma Leloaloa, aemaise ai o le fautuaga sa ia tu’uina atu i se taimi ua te’a, ina ua le maua se tasi e nofoia le nofoa, na mafua ai loa ona ia filifilia o ia e fai ma senatoa mo Aua ma Leloaloa, fa’atasi ai ma lana fautuaga, a uma le nofoaiga lea ua ia fa’aauauina, ona toe fa’asolo lelei lea o le tofi, amata mai ia Leloaloa ona sosoo ai loa lea ma Aua.

 

Saunoa atili Mauga e fa’apea, o lea ua mae’a le taimi na tauave ai e Leloaloa le tofi i lenei tausaga o le a mae’a atu, o Aua la lea ua o o atu i ai le fa’asologa.

 

“O le maota maualuga o le Senate, o le maota fono lena a le atunu’u e saili i ai le tofama le fa’autaga loloto, o le sui la e filifilia e le Itumalo, o ia lena e fai ma sui o le itumalo o le Maoputasi i totonu o le Fono, ae le o se sui o Aua ma Leloaloa”, o le saunoaga lea a Mauga.

 

“Ua uma ona ou avatu ia te outou le pule tou te faia ai fa’aiuga ma filifiliga, ae aisea ua outou toe o mai ai ma fai mai ua le maua se tasi, o ai la lea ua outou fa’amoemoe mai i ai e faia se faaiuga o la outou mataupu. E le sa’o lea mea lea ua outou faia, e pei ona outou silafia, o a’u o le Ta’ita’i o le malo fa’alotoifale, o lo o tele pea lava mea fa’aletonu o lo o molimauina i le itumalo, afai la e le fa’asaoa nei, o afea o le a fa’asa’o ai, afai fo’i e le o a’u e faia le fa’asaoga, o ai o le a ia faia lea tulaga i le lumana’i”, o le saunoaga lea a Mauga ma ia fa’atonu ai loa se tasi o Taule’ale’a e avatu se paketi e fai ai le se’i.

 

Na tusi e Mauga le igoa o Aua i le isi pepa ae o Leloaloa i le isi pepa, ona ia tu’u lea i totonu o le paketi, ma fa’atonu le taule’ale’a e ave le pakete i le afioga i le Fa’alupega ia Mailo na te faia le se’i, ae ina ua mae’a le se’i, na manino mai ai, o le afioaga i Aua lea o le a nofoia le nofoa o le itumalo.

 

O le taimi lava na mae’a ai le se’i, na tula’i ai le afioga a Tilo ma aga’i atu i le isi tala o le maota o lo o alala mai ai Uti ma la feiloa’i.

 

Na fa’afetaia e le afioga a Tilo le avanoa ua ia maua, e auauna ma tautua ai mo le Itumalo i totonu o le maota maualuga mo le isi 4 tausaga.

 

O isi tofiga a le itumalo o le Maoputasi e aofia ai le tofia lea o le Tofa a Tuaolo Meto e avea ma Fa’alupega fou mo le isi 4 tausaga.

Comment Here