Ua mae’a nei le sailiga tofa a le Itumalo o Ituau mo le sailia o ni o latou sui se to’alua i le maota maualuga a le Senate, ma tasi ai le fa’afitiga o aleaga, o le afioga i le Maopu ia Levu Solaita e fai ma sui o le afioaga o Nu’uuli, ae o le afioga ia Alo Fa’auuga o le a toe filifilia e fai ma sui o Fagasa, Matu’u ma Faganeanea.

O le aso To’ona’i, Novema 12 na fono ai le afioaga i Nu’uuli mo le sailia o sa latou sui i le maota maualuga mo le isi 4 tausaga o lo o lumana’i nei, ma filifilia ai loa le afioga i le Maopu ia Levu.

Ae o le aso Faraile nei, Novema 18 i le itula e 10:00 i le taeao na feiloa’i ai loa le Itumalo o Ituau i le afioaga i Fagasa mo le fa’amautuina o a latou sui filifilia, ma aloaia ai loa le avea o le afioga ia Levu e fai ma sui o Nu’uuli, ma le afioga ia Alo o le a toe fa’aauau le avea o ia e fai ma sui o Fagasa, Matu’u ma Faganeanea.

Ina ua fesiligia e le Samoa News le afioga i le Maopu ia Levu e tusa ai o le filifilia o ia i le nofoa o le itumalo i le maota maualuga, sa ia taua ai lona agaga fa’afetai, ina ua filifilia o ia e avea ma senatoa i le maota maualuga.

“E muamua ona momoli le fa’afetai i le Itumalo ona o lenei fa’aeaea maualuga ua tu’uina mai mo a’u, o lo’u agaga atoa lava, ia faia mea uma e manuia ai le atunu’u atoa, fa’aauau fo’i ona faia mea lelei mo Tutuila ma Manu’a”, o le saunoaga lea a Levu.

O le afioga ia Levu sa tautua muamua fo’i o ia i le tofi Faipule o le itumalo mo le maota o sui i le Fono Faitulafono a le atunu’u mo le 14 tausaga, sa galue fo’i o ia i le Ofisa o le tofa ia Faleomavaega Eni Hunkin ao avea o ia ma sui o Amerika Samoa i le Konekeresi, sosoo ai loa ma lana auaunaga i le Ofisa o Mataupu Tau Samoa, mulimuli ane ai tofia o ia e galue i le Matagaluega o Leoleo seia o o mai i le taimi nei.

O le afioga ia Alo, lea sa avea ma senatoa i le nofoaiga lona 34 a le Fono Faitulafono ua mavae atu, o le a ia toe nofoia fo’i le nofoa o le itumalo mo le isi 4 tausaga. A o tautua ai o ia i le Senate, sa avea o ia ma Ta’ita’i o le Komiti o Galuega Lautele a le malo.