Ads by Google Ads by Google

Filifili Senatoa fa’amuamua alofa tulaga pagatia o le malo


[ata: SN]
ausage@samoanews.com

O le pasia ai e Senatoa o pili tupe e 2 i le taeao ananafi ma le fa’amoemoe e fesoasoani ai i le tulaga pagatia ua i ai le itu tau tupe a le malo, ua ataglia mai ai le finagalo o Tama o le atunu’u, ina ia ave le fa’amuamua e fesoasoani ai i le malo, e ui fo’i o lo o tagi alao mai le atunu’u ma pisinisi i le tulaga pagatia o le a o o i ai le tau o le soifuaga, pe afai aes si’i lafoga o oloa ma pisinisi.

 

Mo le pili tupe e si’i ai le tau o totogi o uta i luga o le uafu, e 12-2 le aofa’i o le palota na pasia ai e le Senate le tulafono a le maota o sui. O afioga i Senatoa na palota leai e aofia ai Fonoti F. Aufata ma Levu Solaita.

 

Ae mo le pili tupe e fa’atulafono 1% mo pisinisi, e 13-1 le palota na pasia ai fo’i e le Senate lenei tulafono. E na o le afioga i le tama’ita’i Senatoa ia Fonoti na palota lenei i lenei tulafono.

 

I le aso Lulu na te’a nei ina ua fetufaa’i finagalo o afioga i Senatoa poo fea e tatau ona ave i ai le fa’amuamua, poo le alofa i le tagi ma le oi mai o le atunu’u ma le aufai pisinisi, i le tulaga pagatia o le a o o i ai le tau o le soifuaga, poo le vaai alofa i le faigamalo ma le tulaga pagatia ua i ai le tamaoaiga, na atagia mai ai i finagalo fa’aalia o afioga i Senatoa le taua uma o ia itu i la latou silafia.

 

Ae mo le afioga i le tama’ita’i Senatoa ia Fonoti, sa ia matua talosagaina afioga i Senatoa ina ia aua ne’i i ai se isi e palota ioe i pili tupe uma nei pe a oo i le taimi e faitau fa’atolu ai.

 

Saunoa Fonoti e fa’apea, e tatau i Tama o le atunu’u ona silasila toto’a i molimau a le aufai pisinisi, i le tulaga pagatia o le a oo i ai pisinisi ma tagata fa’atau pe afai ae si’i i luga tau o tautua a le malo ma lafoga. E le gata i lea, o lo o manino fo’i i le molimau a le aufai pisinisi, e ui sa faia iloiloga e fa’ailoa atu ai e le malo fuafuaga mo siitaga i tau o a latou tautua, peita’i latou te lei fa’ailoaina atu pe fia sa’o le aofa’i o si’itaga o le a faia.

 

E talitonu le aufai pisinisi, ua matua maoa’e tele le maualuga o si’itaga i totogi o tautua i luga o le uafu e pei ona fuafuaina e le faigamalo.

 

Sa ia tuuina atu fo’i i luma o le maota se fa’ata’ita’iga, i se tagata faipisinisi e maua lana tupe mama e $10,000 mai lana pisinisi, ona alu lea ua nana le $8,000 i lalo o lona moega, ae fa’ailoa i le ripoti o lo o ave i le Ofisa o Lafoga a le malo, e na o le $2,000 lana tupe mama sa maua.

 

Na vave ona fa’auilavea le afioga i le ali’i Peresetene o le Senate, Gaoteote Tofau Palaie ma saunoa e fa’apea, e le tatau ia Fonoti ona ia faia ni saunoaga e le fa’amaonia i luma o le maota, ina ne’i ta’ita’i sese ai finagalo o afioga i Senatoa. Sa ia taua atili fo’i e fa’apea, e leai ni ripoti poo ni fa’amaumauga e fa’amaonia ai tu’uaiga ma fa’atamaga e pei ona saunoa i ai le tama’ita’i Senatoa.

 

Na fa’amanino e Gaoteote i luma o le maota e fa’apea, e o o lava fo’i i le Fono Faitulafono ma afioga i Senatoa, latou te lagonaina uma le manatu alofa i pisinisi, aemaise lava le atunu’u ma nai aiga lima vaivai, ona o le latou tagialao mai mo se fesoasonai.

 

“Ae tatau fo’i ona silasila toto’a le Fono Faitulafono i le mafatiaga ua i ai le malo, ona ua fa’aletoenu le itu tau tupe. O le mea moni, e le mafai ona fa’atino e le malo lana tautua mo le atunu’u ma aiga, pe afai ae fa’aletonu tulaga o ana tupe maua, ae afai e malosi ma lelei le tamaoaiga o le malo, e le gata o le a lelei le tautuaina o tagata, ae sili ai fo’i ona manuia pisinisi ma le atunu’u atoa,” o le saunoaga lea a Gaoteote.

 

Na taua e ni isi o afioga i Senatoa e fa’apea, e mafua lava ona tele faaletonu tau tupe i le malo, ona o le le fa’amaoni o le faigamalo i le fa’atinoina o ana tiute tauave, e pei o le soona fa’a faigaluega o tagata ma fa’atino atina’e tetele, ae le o i ai ma se tupe e fa’atino ai nei galuega uma.