Ua fa’aalia e ni isi o le aufai fa’atoaga a le atunu’u lo latou lagolagoina o ni isi o suiga ua faia e le Ofisa o Fa’atoaga, i le taumafai lea ina ia toe pasia fa’atoaga mo le sapalaiina o taumafa i le polokalame o Taumafa a fanau aoga a le malo.

O ni isi o suiga e pei ona taua e ni isi o le aufai fa’atoaga, ua mafai ona pasia ni isi o fa’atoaga o lo o galulue ai le aufai fa’atoaga i le taimi nei, ina ua mae’a ona asia e le Ofisa a latou fa’atoaga.

Na taua e le sui sinia o le Ofisa o Fa’atoaga a le malo ia Arona Palamo i le Samoa News i le vaiaso na tea nei e fa’apea, o le tele o faatoaga ua mae’a ona latou asia, ua mautinoa le lelei ma ua taliaina fo’i i latou mai le toe fa’aauau ona toto o fualaau’aina o lo o latou galulue ai.

Ina ua fesiligia e le Samoa News le susuga a Palamo pe ua i ai ni suiga ua faia e le Ofisa o Fa’atoaga e tusa ai o le fa’afitauli na mafua ai ona taofia le toe fa’atauina atu o fualaau’aina i le polokalame a le School Lunch, na saunoa ai le sui o le Ofisa o Fa’atoaga e fa’apea, e laiti lava nai suiga o lo o galulue i ai le Ofisa ina ia mautinoa e le toe tula’i mai fa’afitauli na mafua ai ona a’afia se vaega e to’atele o le aufai fa’atoaga i ni nai masina e le’i mamao atu.

Ae na taua e le susuga a Amato Leilua o Pava’ia’i e fa’apea, o se tasi o suiga fou e mafai ona fa’atinoina i le taimi nei, o le fa’aauauina pea lea o asiasiga a le Ofisa o Fa’atoaga atoa ai ma isi Ofisa a le malo i fa’atoaga eseese, ina ia mautinoa e le o fa’aaogaina ai vailaau oona ia o lo o masalomia le fa’aaoga e tausi ai fa’atoaga.

“E taua tele le soifua maloloina o le atunu’u, atonu fo’i sa i ai sina faaletonu i nai masina ua tuana’i atu, i le le lava o asiasiga a le Ofisa o Fa’atoaga e asia ai fa’atoaga a le atunu’u, aemaise lava i fa’atoaga o lo o galulue ai tagata Asia, ae mo le taimi nei, ua ou lagolagoina le tatau lea ona asia fa’atoaga i taimi uma ina ia mautinoa e le toe i ai ni faaitauli e alia’e mai ai”, o le saunoaga lea a Leilua.

Ae na taua e le susuga a Vili Taumaloto o Tafuna lona fiafia ina ua mafai ona toe pasia lana fa’atoaga e fa’aauau lana tautua mo le totoina lea o fua o fa’atoaga ma fa’atau atu i le atunu’u.

“Na pau le tulaga lea o loo faatalitali i ai, o le maua lea o le avanoa e toe sapalai ai a’u fualaau’aina atoa ai ma isi fua o la’u fa’atoaga i le polokalame a le School Lunch, ae o lo’u talitonuga i lenei taumafaiga, ia fa’aauau pea ona asia e le Ofisa o Faatoaga faapea ai Ofisa uma o le malo o loo galulue i lenei mataupu faatoaga uma i Amerika Samoa, ina ia mautinoa o loo tulaga lelei pea meaai e fa’aaoga e le atunu’u mo latou soifua maloloina”, o le saunoaga lea a Taumaloto.

Talu mai le taimi na taofia ai le toe sapalai atu o fualaauaina i le polokalame a le School Lunch, o le to’atele lava o le aufai fa’atoaga sa la’u a latou fualaau’aina e fa’atau i le maketi, aemaise lava ituaiga fualaau’aina e le o masalomia le a’afia i vailaau e le fa’atagaina ona fa’aaoga.

Na taua e Taumaloto le fa’aauau pea ona sapalai o lana fa’atoaga e fa’atau i le maketi, ina ia fesoasoani ai i se tupe maua mo le aiga, a o fa’atalitali ai se avanoa mo le polokalame a le School Lunch.