Fiafia to’atele tagata matutua i suiga fou ua fuafuaina mo i latou


[ata: SN]
ausage@samoanews.com

Ua fa’aalia e le to’atele o Tama ma Tina matutua le agaga fiafia, ona o suiga fou e pei ona fuafua le Fa’atonusili o le Ofisa e fa’atautaia ai le polokalame i le tausaga fou. O lea suiga e pei ona fa’amaonia mai e se sui sinia o le Ofisa o Tagata Matutua, o le suiga lea o taumafa vela o lo o i ai nei, i le fa’aaoga e tagata matutua o le pepa tala tupe fou (swipe-card) e fa’atau ai soo se ituaiga taumafa latou te filifili i ai.

 

Na taua e ni isi o Tagata Matutua i le Samoa News e fa’apea, o le suiga fou e pei ona fa’alauiloa e le latou Ta’ita’i o le a fuafua i ai le polokalame mo le tausaga fou, o se suiga ua leva na tatau ona fa’atino, fuafua i ituaiga taumafa e onomea ma tatau mo le soifua maloloina ua i ai tagata matutua i le atunu’u.

 

“Ua leva ona matou fa’atalosagaina le auala lea e pei ona fa’ailoa mai, o le tu’u mai lava lea o le faitalia i le Tama ma le Tina matua e filifili ai o ia i le ituaiga taumafa e mana’o i ai lona loto, nai lo le kuka ma fa’asoasoa mai e le Ofisa o taumafa eseese, ae le talafeagai ma le mana’o ua i ai le tino,” o le saunoaga lea a le Tama matua ia Lavea Filiga o Aua.

 

Ae na taua e le Tina matua ia Mareta Ifopo e faapea, o le suiga fou e pei ona faalauiloa mai e le latou Taitai, e mautinoa le to’atele o tagata matutua o le a fiafia ma latou taliaina.

 

Sa ia fa’afetaia suiga e pei ona faia i le polokalame i le tausaga ua mavae faapea ai ma lenei tausaga, peita’i i lona talitonuga, ua tatau ona la’a le polokalame a tagata matutua i le isi laasaga, ina ia mafai ai ona agavaa Tina ma Tama matutua i taumafa paleni toe fetaui ma lo latou soifua maloloina.

 

Na taua e se sui sinia o le Ofisa o Tagata Matutua e fa’apea, o le suiga fou e pei ona fuafuaina e le Ofisa mo le tausaga fou, o le a fa’a faigofie ai i tagata matutua ona filifili lava i latou i le ituaiga taumafa e finagalo i ai.

 

Sa taua fo’i e le sui sinia e fa’apea, o lenei suiga fou e pei ona fuafuaina, o le a mafai ai ona galulue fa’atasi pisinisi tua ma le Ofisa, e fa’atulaga auala ina ia mafai ai ona fa’a faigofie le fa’aaogaina e tagata matutua o pepa ai i le suiga fou o le a fa’aaogaina.

 

O le isi tulaga faigofie o lenei suiga, o le a le toe tau malaga mamao ai Tama ma Tina matutua i nofoaga e pei ona masani ai, ae o le a fa’aaoga pisinisi o le a lautogia mo lenei polokalame. E pei ona silafia, o le polokalame mo tagata matutua o lo o fa’atupeina mai e le malo tele.

 

Na faailoa e le Faatonusili o le Ofisa o tagata matutaua ia Evelyn Satele Lili’o i le fonotaga a le kovana ma le Kapeneta i le faaiuga o le masina na te’a nei, le aga’i atu o le Ofisa e fa’atino suiga fou e pei ona fuafuaina i le tausaga fou.

Comment Here