Ads by Google Ads by Google

Fia malamalama atili Faipule i le mataupu va malo ma le NOAA


Afioga i Faipule i le taimi o a latou galuega fa’atino i aso ta’itasi. [ata AF]
ausage@samoanews.com

O le iloiloga lea ua valaauina e le maota o sui i le vaiaso fou ma le Loia Sili a le malo ia Talauega Eleasalo Ale, fa’apea ai ma le Fa’atonusili o le Matagaluega o le Puipuiga o le Vaomatua ma le Sami, o le a mafai ai ona fa’amanino atili i le maota o sui le fa’aiuga lea ua tu’uina mai e le Fa’amasinoga Feterale, e lagolagoina ai le tagi a Amerika Samoa fa’asaga i le NOAA ma le Komiti o Faiga Faiva a le Feterale i le Pasefika, e teena ai suiga ua fuafua vaega ia e lua a le feterale e faia i ogasami fagota a le atunu’u.

 

E pei ona silafia e le atunu’u, o le vaiaso na te’a nei na tu’uina atu ai e le afioga i le ali’i kovana ia Lolo Matalasi Moliga sana tusitusiga i le Fono Faitulafono, e fa’ailoa atu ai le manumalo o Amerika Samoa i le tagi sa fa’aulu fa’asaga i le Komiti Fa’afoe o Faiga Faiva a le feterale ma le NOAA, ina ua manatu le Fa’amasinoga Feterale sa iloiiloina lenei mataupu, o le fa’aiuga ua faia e lala ia o le Feterale e faia faamalosi ai suiga i ogasami fagota i le atunu’u, ua atagia mai ai lo latou le amanaiaina o vaega o le Feagaiga sa osia e Amerika ma Tutuila ma Aunu’u i le 1900, ina ia puipuia e le Iunaite Setete ogasami ma faiga faiva a le teritori.

 

Na taua e le to’atele o faipule i le vaiaso nei lo latou fa’afetaia o le afioga i le ali’i kovana ia Lolo Matalasi Moliga ma lana tapulega, i lo latou naunau e finau malosi lenei mataupu mo le manuia o le atunu’u atoa.

 

“O le fa’aiuga a le fa’amasinoga lea ua tuuina mai, ua vavala mai ai lo tatou tulaga manumalo i ni isi o mataupu e tele o loo tu’u fesili ai le malo i fa’aiuga a le feterale, peita’i o le itu e tatau ona fa’amalamalama atili mai i le Fono ma le atunu’u, poo le a le isi la’asaga lea o le a la’a atu nei i ai Amerika Samoa e tusa ai o le fa’aiuga lea ua tuuina mai e le fa’emasinga feterale”, o le saunoaga lea a le afioga i le ali’i faipule mai Saole ia Kitara Vaiau, o ia fo’i le isi faipule sa lagolagoina le tatau lea ona faia se iloiloga e fa’amanino atili ai lenei mataupu.

 

Saunoa atili Kitara e fa’apea, afai o lea ua manumalo Amerika Samoa i le mataupu lenei, o le avanoa lelei lea e tatau ai loa ona finau atili le malo ina ia toe fa’afo’i mai isi vaega o ogasami ma fanua ua ave fa’amalosi e le feterale e aunoa ma so tatou leo, e aofia ai ma le motu o Manu, le Rose Island.

 

“O fa’aiuga e pei ona avea ai Rose Island ma vaega o fanua fa’asao a le malo tele, sa faia fa’anatinati e le peresetene a Amerika ua mavae atu, e aunoa ma le fesiligia o se finagalo autasi o tagata Tutuila, Aunu’u ma Manu’a, ma o se tulaga lea e lagona ai le fa’anoanoa”, o le saunoaga lea a Kitara.

 

Na lagaolagoina e le afioga i le ali’i faipule matua ia Gafatasi Afalava le tulaga e pei ona fa’amanuiaina ai le malo i le fa’amasinoga sa faia, ma ia lagolagoina ai le tatau lea ona aami molimau a le malo e oo mai i luma o le maota ina ia fa’amalamalama atili le uiga o le fa’aiuga a le fa’amasinoga.

 

“E le laiti le tulaga lea ua tula’i mai i le fa’aiuga a le fa’amasinoga, o se taimi muamua fo’i lenei ua tula’i mai ai se fa’aiuga fa’apenei e lagolagoina ai e le fa’amasinoga feterale se tagi a le malo fa’asaga i fa’aiuga o loo faia, ae pei ona tatou silafia, o le isi lava lenei mataupu o loo fai ma to’atuga i atina’e a le malo, o le tele o tulafono a le feterale ua fete’ena’i ma le atina’eina o le soifuaga o le atunu’u”, o le saunoaga lea a Gafatasi.

 

O ni isi o faipule sa fa’aalia o latou lagona e lagolagoina ai lenei fa’amoemoe e aofia ai le afioga ia Vesi Talalelei Fautanu Jr, Lavea Fatulegae’e Palepoi Mauga, ma le afioga a Faimealelei Anthony Fu’e Allen.

 

E ui o lea ua tulaga manuia le talosaga a le malo e pei ona taua i fa’amaumauga a le fa’amasinoga, ae o le popolega e pei ona saunoa Faimealelei, ua maua i ripoti o loo i ai tagatanu’u o le atunuu ua latou lagolagoina le fuafuaga e toe apili ai e le NOAA ma le Komiti o Faiga Faiva a le feterale le fa’aiuga ua mae’a ona tu’uina mai.

 

“O popolega o lo’u sui, afai ae vaavaai mai le malo feterale o loo fetotoa’i Amerika Samoa ma ona tagatanu’u ona o mataupu fa’apenei, o le a fa’a faigofie ai fo’i ona toe suia ni isi ana fa’aiuga e faia i le lumana’i, ae tatau ona fautuaina o tatou tagata ina ia lagolagoina fuafuaga uma e taumafai atu i ai le malo”, o le fautauga lea a Faimealelei.

 

E pei ona manino i le tagi a le malo o Amerika Samoa sa fa’aulu i le fa’amasinoga feterale i Honolulu, o le talosagaina lea o se poloaiga e fa’aleaoga ai suiga ua faia e le NOAA ma le Komiti o Faiga Faiva a le feterale, e fa’ataga ai ona fagogota va’a fagota lapopo’a i totonu mai o le umi e 50 maila o ogasami fa’asao, ma fa’aitiitia ai le tele o ogasami fa’asao mo Amerika Samoa mai le 50 maila o loo i ai i le 12 maila.

 

Saunoa Kitara e fa’apea, o le fa’aiuga ua tuuina mai e le fa’amasinoga feterale, e le gata o se tala fiafia mo le malo o Amerika Samoa, ae sili atu ona avea o se tala fiafia mo le au fai va’a fagota alia, ona o lea ua manino i le fa’aiuga le taofia lea o va’a fagota tetele mai lo latou fagogota i ogasami fa’asao a Amerika Samoa.