Fesoasoani a le Koluse Mumu mo Amerika Samoa
FA'ASOLO ASIASIGA & TUFATUFA MEA UA AGAVA'A AI AIGA
Ua toa'i taunu'u le Koluse Mumu mai San Diego, ua amata fo'i ona faia asiasiga i fale ma aiga ta'itasi ua mae'a tusia o latou suafa ma talosaga mo ni fesoasoani, peita'i, pe na tusia lou suafa pe leai, ae afai e va'aia le pagatia o lou aiga, e asia lava oe i taimi e fa'agasolo atu ai asiasiga i afio'aga o alaala ai i tatou uma.
E o'o mai i le taeao ananafi o lo'o fa'asolo pea asiasiga, ua fa'auluulu nei i le Aumalaga a le Koluse Mumu mai San Diego galuega uma o totoe a'o le'i tatalaina pusaoloa o lo'o la'u mai ma fa'aputu lelei i le faleteuolo a le Army Reserve.
Ona e tatau lava ona mua'i fa'avasegaina uma mea ua o'o mai ma le ala e tufatufaina atu ai, o lea ua fa'ailoa mai ai, e matua leai lava se vaega e faia a le tatou vasega o aufaigaluega Koluse Mumu iinei i lea tulaga, ae tu'u tasi lava i le fa'aiuga e faia e sui iloga ua to'ai taunu'u mai a le Koluse Mumu.
E to'a 22 i latou ua o'o mai, fa'atasi ai ma le ta'ita'i po'o le CEO San Diego Red Cross, le susuga Sean Mahoney.
O lo'o gasolo atu pea aiga mo talosaga e fa'amauina i le Ofisa a le Koluse Mumu i Tafuna.
I le vasega o asiasiga a le Koluse Mumu o lo'o malaga fa'atasi atu ai ma sui o le Koluse Mumu Amerika Samoa, ina ia iloa lelei afio'aga o lo'o aga'i i ai, suafa o aiga ia sa'o ona sipela ma tulaga fo'i o fa'atalanoaga ma aiga ta'itasi.
E i ai fo’i sui fa'amaumau a le koluse mumu mai San Diego e fa'amautu lava i le Ofisa autu i Tafuna, ma o i latou nei o lo'o nafa ma le toe fa'amauina uma o mea ua mae'a tusitusia mai e le vasega o savalia nu'u ma aiga.
"Ua aoga tele le galulue fa'atasi ma nei sui, e moni lava e tele lo latou iloa i le fa'atautaiga o galuega foa'i ma le alofa a le Koluse Mumu, ma e matua aoga ia i matou o tatou tagata iinei, ina ia mautu fo'i ona fa'atautaia tatou galuega pe a toe fo'i i latou nei,” o se tala lea a Tu'uga Tinoisamoa, o se tasi ua tele tausaga o galulue fa'atasi pea ma sui mai fafo a le koluse mumu.
"I asiasiga nei e faia, e mana'omia lava ona i ai o tatou sui e mafai ona talanoa sa'o i le to'atele o tagata ma fa'amalamalama fo'i mea o mana'omia e i latou i le vasega o uso nei e matou te o atu fa'atasi a le Koluse Mumu mai San Diego. O lea so'otaga e mafai ai ona fefa'amalamalama'i itu na lua o le tautua,” o se fa'amatalaga lea a Tinoisamoa.
O le tama'ita'i o lo'o avea ma sui e fa'amaumauina le aotelega o mea e auina atu i aiga pe afai o le a tatala le pusa 'oa a le Koluse Mumu ma amata tufatufaina atu, o ia lea o Barbara Riester, ma o le fa'alua ai lenei o malaga mai o ia i nei galuega fesoasoani i le tatou atunu'u. O lona fa'ato'a o'o mai o le masina o Setema 2009 ona o le galulolo.
"O le toe maua ai o lo'u avanoa, o se mea na matua ou fiafia ai. Ua foliga mai o a'u lea ua matua masani i so'o se vaipanoa o Amerika Samoa i la'u fa'asoa i le to'atele o i matou na o mai, o lea fa'ato'a o'o mai la i Amerika Samoa nei,” o se tala mimita lea a Riester.
O Riester, ua atoa le 50 ai lenei o tausaga talu ona avea ma tagata e galue tu'utoina mo le Koluse Mumu ma lana tautua, e le totogia lava o ia. Peita'i, ina ua mae'a ona asiasi mai i le taimi o le Tsunami, sa malaga i Initonesia ina o se tasi fo'i o Tsunami sa tupu mai ai.
"O la'u tautua i le Koluse Mumu o se galuega alofa ua mafai ona ou faia i taimi e lutia ai le to'atele o tagata, e le fa'ailogaina po'o ai, i fa'afitauli ma pagatia fa'anatura, o se ala ua ou filifili e fa'aaoga i ai lo'u nei ola ma le malosi, a'o se agava'a fo'i ua ou maua e tautua ai."
O le fa’aiuga o le vaiaso ua te’a na taunuu ai se va’alele togipau e le Koluse Mumu o lo’o aumaia ai fesoasoani mo aiga mafatia i le ‘afa o Gita. O ia fesoasoani e aofia ai nofoa fa'ata'avalevale, crutches ma to'oto'o fa'apea ma walkers.
Ua fa'ailoa mai fo'i o ta'avale tetele a le CSL na latou utaina maia nei pusaoloa tetele i le nofoaga ua fa'amautu atu nei i ai e fa'atalia ai le tufaturaina atu i le lautele o aiga ua pagatia.
FOA'I KOLUSE MUMU SAN DIEGO MO TAGATA MATUTUA
O le taeao ananafi sa foa’i ai le Koluse Mumu San Diego mo tagata matutua e fa’aui atu i le Ofisa o Tagata Matutua, e TAOA.
O lea foai e aofia ai 18 nofoa fa'ata'avalevale ua mae'a taua'aoina, e 28 walkers, 10 seti o crutches, ma le 14 o to'oto'o.
Ua fa'ailoa mai e le o taitai ona tofusia ai le to'atele o matua ua amata ona fa'aletonu a latou savali, ma ua mana'omia lava nei mea e fa'aaogaina i le taimi nei.
Ona o lea talosaga, ua toe fa'ailoa mai ai e Riester, ua toe talosaga i latou i a latou pa'aga na aumai ai lea tele o nofoa fa'ata'avalevale ma to'oto'o, ina ia toe tu'ufa'atasia mai se isi uta o nei oloa taua mo le mamalu o matua matutua o Amerika Samoa.
TAUA'AOINA SIAKI I LE KOLUSE MUMU MAI LE MALO
Ua fa'ailoa mai fo'i le agaga fiafia ma le fa'afetai o le Koluse Mumu ona o le foa'i tele sa taua'aoina atu e Kovana Lolo Moliga. O lea foa’i e ala i se sailiga tupe sa faia i le tausaga ua te’a e fesoasoani ai Amerika Samoa i tagata nu’u i isi sitete ma teritori sa afatia i latou.
Na fa'ailoa e Riester na taua'ao sa'o lava nei siaki i le CEO o le koluse mumu i San Diego lea e aofia atu ai ma Amerika Samoa.
O le Fa'atonu o le Homeland Security Semo Ve'ave'a, o se tasi na avea ma taitai o lea sailiga tupe mo fa'alavelave fa'afuase'i e a'afia ai le mamalu lautele o tagata Amerika Samoa, sa ia fa'ailoa mai o siaki nei e lua, o le aofaiga e silia i le $140,000.
O lea aotelega o le seleni sa foa'i i ai tagata lautele, vasega o le aufaipisinisi, ekalesia, aoga ma faalapotopotoga i totonu o Amerika Samoa.
O le siaki muamua e $71,619.00 sa taua'aoina mo le Koluse Mumu Amerika Samoa ae o le isi siaki e $71,682.00 e mo le Koluse Mumu San Diego lea e aofia ai fo'i ma Amerika Samoa.
"Na matou fiafia tele ina ua matou o'o mai ae talisapaia i matou i le Ava Fa'atupu na tapena i ai le malo i le faletele i Utulei. O se lagona fiafia na fa'alogoina, ae maofa fo'i i le maualuga o le va'ai a Amerika Samoa ia i matou, e ui ina o lutia aiga ma le atunu'u atoa i pagatia o le Asiosio o Gita,” o se tala lea a Riester. O lea ava fa'atupu sa faia lea i le aso To'ona'i na te'a nei.