Ads by Google Ads by Google

Fesoasoani Faiaoga mai Amerika atina’eina ta’aloga Handball i AS


Sui o le Asosi o Ta’aloga a le Olimipeka i Amerika Samoa (ASNOC), susuga J. Victor Langkilde ma Ken Tupua, fa’apea sui o le Ta’aloga Handball i Amerika Samoa, susuga Carl Floor Jr ma Clayton “Boom” Mahuka, fa’atasi ai ma le sui o le Asosi Handball a Amerika o loo i ai i le atunu’u i le taimi nei, susuga Julio Sainz (lona lua mai itu agavale) i se feiloaiga sa faia i Fagatogo i le aso Lua na te’a nei. [ata AF]
ausage@samoanews.com

O le fa’amaninoina o tulafono atoa ai ma metotia e si’itia ai le silafia e fanau aoga o le ta’aloga o le Handball, o le autu lea na mafua ai ona malaga mai se ali’i Faiaoga i le ta’aloga o le Handball mai Amerika i le vaiaso nei, susuga Julio Sainz.

 

Na taua e le susuga Sainz i le Samoa News lona agaga fiafia ina ua maua le avanoa e fa’atasi mai ai i Amerika Samoa nei, mo le ofoina mai o lana fesoasoani i soo se auala e atina’e ma fa’aleleia atili ai le ta’aloga Handball i le atunu’u.

 

“O le agaga autu o lo’u malaga mai, e le gata ia fesoasoani i fanau aoga ina ia si’itia lo latou iloa i auala e fa’atino ai le ta’aloga, ae fesoasoani fo’i i Faiaoga o le Asosi Handball a Amerika Samoa ia si’itia lo latou malamalama i le tomai ma metotia fa’a faiaoga o le ta’aloga”,  o le saunoaga lea a Sainz.

 

E ui e lei to’atele le atunu’u ua latou silafia lenei ta’aloga, peita’i na valaoia e Sainz le tele o le lumana’i o fanau a Amerika Samoa e maua i le ta’aloga lenei, pe a fuafua atu i le televave o lo latou iloa i le fa’atinoina o le ta’aloga i le taimi nei.

 

“Ua ou molimauina le to’atele o fanau aoga e fiafia i le ta’aloga, o le to’atele fo’i o i latou ua silia i le tausaga talu ona ta’aalo i lenei ta’aloga, ma o la’u valoaga, e tele le avanoa e mafai ai e se au Handball mai Amerika Samoa ona tausinio ma isi ‘au mai atunu’u eseese o le lalolagi e aofia ai ma le Pasefika ma latou manumalo ai, pe afai e sa’o le auala e mulimuli ma a’oa’o ai fanau i tulafono ma metotia o le ta’aloga”, o le saunoaga lea a Sainz.

 

Na taua e le Peresetene o le Asosi Handball i Amerika Samoa ia Carl Floor Jr le taua tele o le mafuta mai o Sainz i lenei vaiaso, e fesoasoani i le fa’amalamalamaina o tulafono atoa ai ma isi metotia e siitia ai le iloa o fanau i le ta’aloga.

 

“O se tasi o itu taua ua mafai ona matou maua mai i le susuga a Sainz, o le fesoasoani mai lea i le tapenaina o la matou ‘au mo le isi ta’amilosaga a le Oceania lea ua fuafua mo le masina o Mati 2017. E le gata ua ia fa’amanino mai ni isi o tulafono, ae ua tele fo’i metotia fou ua mafai ona matou maua mai i le susuga a Sainz”, o le saunoaga lea a Floor Jr i le Samoa News.

 

A o le i toe tu’uva’a ese atu le susuga Sainz mo Amerika i le po o le aso Faraile nei, sa faafetaia e Floor Jr le fesoasoani ua mafai ona ofo mai e le Asosi Handball a Amerika, atoa ai ma le lagolago malosi mai a le Asosi o Ta’aloga a le Olimipeka i Amerika Samoa (ASNOC), fa’apea ai ma le Matagaluega o Tupulaga Talavou. Tina ma Tama’ita’i (DYWA), e ala i le fa’aavanoaina o le latou fale taalo e fa’atino ai polokalame a le fanau aoga.