Fesiligia tupe o le Pone i le iloiloga o le Paketi a le malo


[ata: foa'i]
ausage@samoanews.com

I le amata aloaia ai o le Iloiloga Tuufaatasi a le Komiti o le Paketi a le Fono Faitulafono i le taeao ananafi, mo le talanoaina o le tupe fa’asoasoa a le malo mo le tausaga tupe fou 2018, na fesiligia ai e senatoa ma faipule molimau a le malo e fa’atatau i tulaga o tupe o le Pone.

 

O le iloiloga a le Komiti Soofaatasi o le Paketi a maota e lua, o lo o taitaia e taitaifono o Komiti o le Paketi a maota taitasi, le afioga i le ali’i senatoa ia Magalei Logovi’i, ma le afioga i le faipule ia Vailiuama S. Leasiolagi.

 

O molimau sa fesiligia e aofia ai le Teutupe a le malo ia Ueligitone Tonumaipea, ma le Faatonusili o le Ofisa o le Paketi, le faletua ia Catherine Saelua, lea sa la fa’ailoa i le Komiti Soofaatasi alagatupe ua fuafua le malo e fa’atupe mai ai le paketi e $395.2 miliona mo le tausaga tupe fou.

 

Na fesiligia e Magalei le tulaga o tupe o lo o fa’aagaga e totogi ai le aitalafu a le Pone, ae na tali le Teutupe, ua i ai lava le teugatupe fa’apitoa o lo o teu ai tupe ua uma ona fa’atulaga e totogi ai le aitalafu o le Pone.

 

Saunoa Magalei e fa’apea, o le mafua’aga na ia fesiligia ai le mataupu lea, ona o le taimi lava e tofu ai tupe maua i le Teugatupe Tele a le malo, ona le mafai loa lea ona maua i ai se tonu, ae o le a fa’aaoga i soo se manaoga lava o le malo e tula’i mai.

 

I le talanoaina ai o atina’e na faatupe mai le aitalafu o le Pone, na fa’afetaia ai e Gafatasi Afalava masini e 3 o lo o fa’aaoga i le malaeva’alele e su’e ai ato ma uta mai fafo. Saunoa Afalava e fa’apea, ina ua fuafua le malo e fa’atau mai masini e su’e ai uta mai fafo, sa i ai lona manatu o le a avea le tulaga lea e fa’aitiitia ai tagata faigaluega, toe vave ai ma faigofie le su’eina o ato ma uta i le malae va’alele.

 

Ae ina ua toe fo’i mai i le atunu’u mai se tasi o ana malaga e lei mamao atu, na fa’atoa ia iloaina ai loa, e le sa’o lona manatu sa i ai, ina ua ia molimauina le auala o lo o fa’aaoga i ai masini nei e su’e ai uta ma ato a tagata.

 

E ese na ave ato i totonu o le masini e su’e ai, ae a uma, ona toe fa’asolo atu fo’i lea i le aufaigaluega e lata i le to’a 8 alii mo le toe su’eina o ato, ma atili ai lava ona poloka le laina ma tuai ai ona o i fafo tagata malaga.

 

Saunoa le Teutupe e fa’apea, o lona fo’i lea manatu o lo o i ai i le fa’aaogaina o masini, ae o le a toe sailiili le mafu’aaga o le fa’aletonu.

 

O se tasi o itu na faamanino e le Teutupe i lana molimau, o tagata o lo o fa’a konekarate mai fafo e galulue mo le fa’aleleia o masini (scanner) na aumai pe a tula’i mai se faaletonu, ona o lo o fa’aauau pea ona totogi i latou i le taimi nei i tupe o le Pone, e tusa ai ma le konekarate sa faia ma le malo, i lalo o tuutuuga, a mae’a loa le tausaga lenei, ona le toe totogiina loa lea o i latou nei i tupe o le Pone, ae o le a se’e mai e totogi e le malo i lalo o tupe fa’alotoifale.

 

Saunoa le alii faipule ia Veevalu M. Mageo e fa’apea, o se tasi lenei o lu’itau taua mo le malo e tatau ona silasila mamao i ai, o le saili lea o ni tama fanau a le atunu’u e aoaoina i ituaiga galuega ia o lo o faia e tagata mai fafo mo le fa’aleleia o masini e su’e ai uta, ina ia fa’a faigofie ai e le malo ona fa’atino ana galuega ma laititi ai le tupe alu, nai lo le tupu o se fa’aletonu i masini ona sau saili mai fo’i lea o ni inisinia mai fafo latou te fa’aleleia.

 

O se tasi o mataupu na fesiligia i le taimi o le iloiloga, o le mafua’aga na faaitiitia ai itula faigaluega a tagata faigaluega a le malo, atoa ai ma siitaga i totogi o tagata faigaluega a le malo.

 

Na faamanino e Saelua e fa’apea, e le i leva atu nei lava na faia ai le polokalame fou a le ali’i Kovana, e sii ai totogi o tagata faigaluega ua i’u mai ma fa’ailoga BA ma le MA, ona o le manatu ina ia fetaui le totogi ma le fa’ailoga ua ausia.

 

Saunoa le afioga i le ali’i senatoa ia Faiivae Iuli e fa’apea, e tatau fo’i ona silasila le malo i nai tagata faigaluega ua lata i le ta’i 20 tausaga o tautua, ae o lo o tumau pea i le ta’i $10,000 ma ona tupu o latou totogi i le tausaga, ina ia tau fuafua i ai se siitaga, e fesoasoani ai i a latou tupe maua i le taimi e litaea ai ma malolo mai galuega.

 

Ina ua fesiligia le paketi a le Ofisa o le Teutupe, na fesiligia ai e Magalei le mafu’aaga ua leai ai se vaega tupe e fa’atupe ai sapalai mo vaega e fa’atino ai galuega, ae na saunoa le Teutupe e fa’apea, o le mafua’aga tonu lena o pili tupe ma le paketi faaopoopo (supplemental) lea ua i luma o le Fono Faitulafono, ona o le fa’anaunauga o le faiga malo ia pasia uma tulafono ia, e fesoasoani ai i le atina’e o le malo.

 

Na liua fa’afuase’i le fa’afofoga a le Komiti Soofaatasi ma molimau ina ua taua e le afioga i le tamaitai senatoa ia Fonoti A. Tafaifa i lana saunoaga e fa’apea, e tumu lona loto i le fa’anoanoa, ona o lea ua vaavaai atu i le paketi a le malo, e na o numera lava o lo o ta’u mai ai ae leai ni tupe o i ai.

 

I lona talitonuga, o le mafu’aaga tonu lea na ala ai ona ta tipi itula faigaluega a tagata faigaluega a le malo.

 

O le itula e 9:30 i le taeao nei lea ua fa’atulaga e toe fa’aauau ai le iloiloga o le paketi a le Komiti Soofaatasi.

Comment Here