O se tasi o mataupu sa tele i ai fesili i le taimi o folafolaga a le maota o sui i lenei vaiaso, o alagatupe ua fuafua le malo e maua mai i le totogi o uta mai Manu’a, e ala lea i le fa’aaogaina o le va’a fou o le MV Manu’atele, atoa ai ma tupe o loo fuafua e maua mai i le fa’aaogaina o le Rapiscan lea ua fa’atau mai e su’e ai oloa mai fafo.

Na taua e ni isi o afioga i faipule sa lagaina nei mataupu taua e fa’apea, o alagatupe e pei ona fesiligia, ua mae’a ona fa’atulaga e le malo aitalafu ma galuega e totogi ai, ae foliga mai e le o mautu mai lava i le taimi nei tulaga o ia alagatupe mo le malo.

Saunoa le afioga i le ali’i faipule ia Kitara Vaiau e fa’apea, e tatau ona manino tulaga o le mataupu i tupe o loo fuafua le malo e maua mai i le tautua a le MV Manu’atele mo Manu’a, lea fo’i na lagolagoina e le afioga i le ali’i faipule ia Faimealelei Anthony F. Allen.

Saunoa Faimealelei e fa’apea, e tele naua isi atina’e e mafai ona fa’aaoga i ai le va’a fou a le malo mo Manu’a, e ese mai i uta o loo la’u e tagata o le itumalo, ae mafai fo’i ona fa’aaoga e la’u mai ai uta o fa’atoaga mai le aufai fa’atoaga i Manu’a, e fa’atau i faleoloa eseese i totonu o Tutuila nei, ona o lea ua maitauina le fa’atupulaia o pauna o taro mai Samoa o loo la’u mai i masina ta’itasi ma fa’atau i totonu o le atunu’u.

I le tulaga o le Rapiscan, na taua ai e Faimealelei lona lagona fa’anoanoa, ona e foliga mai ua fa’amoe e molimau a le malo sa fesiligia e le maota afioga i faipule i le mataupu e fa’atatau i le Rapiscan, ina ua fesiligia i latou i le taimi e taunu’u mai ai masini nei atoa ai ma le taimi e amata aloaia ai ona fa’aaoga.

“O le mea moni lava ina ia silafia e le atunu’u, e le o maua mai lava se tupe a le malo mai Rapiscan ia ua taunu’u mai, e le o mautinoa fo’i tulaga mo le fa’aaogaina e saili ai uta ma oloa mai fafo”, o le saunoaga lea a Faimealelei.

Sa ia taua atili e fa’apea, ua mae’a ona folafola e molimau a le malo i luma o le fono, le mae’a lea ona faia o aoaoga mo i latou o le a a’oa’oina i le fa’aaogaina o masini nei i le taimi e fa’aaoga ai, ae o ripoti ua ia maua ua taua ai, o le vaiaso nei lea fa’atoa fa’atinoina ai lea aoaoga mo tagata faigaluega.

Na umi se taimi na fa’aalu e Faimealelei e tau fa’amanino ai tulaga faafitauli o loo tula’i mai i Rapiscan ia ua mae’a ona taunu’u mai, e pei o le masini o loo fa’aaogaina i le Falemeli i Fagatogo, lea ua taua i ni isi o ripoti le fa’aaoga o le masini e su’e ai uta a isi tagata, ae le fa’aaogaina mo le su’eina o uta a isi tagata.

E oo foi i le taimi e fa’aaoga ai le masini o loo i luga o le uafu e su’e ai container, e tele naua le taimi ma tupe a le tagata faipisinisi e alu i le fa’atinoina o lenei galuega, ae foliga mai e le o mautinoa lona tulaga manuia mo le malo.

Sa ia fa’aalia i luma o le maota e fa’apea, e tele naua se vaega tupe ua fa’aalu e le malo e fa’atau mai ai masini nei, ae foliga mai e le o mautu mai lava i le taimi nei sona tulaga manuia mo le atunu’u.

Na fa’ai’u lana saunoaga i lona fa’ailoa lea i luma o le maota e fa’apea, e tele naua mataupu e fa’atatau i le atina’e o le malo ma lona tamaoaiga e tatau ona lalafo i ai le maota, ina ia mautinoa e maua i ai se tali mautu mo le fa’afofoga a le atunu’u.

Na faafetaia e le afioga i le Fofoga Fetalai ia Savali Talavou Ale le mataupu na folasia e Faimealelei, ae i lona talitonuga, e le aoga le tele o fa’amatalaga e fa’aleo ai nei mau mataupu, ae taua le aami o molimau ma fa’atulaga iloiloga, ina ia mafai ai ona maua tali mautu mai i molimau o loo fesiligia e le maota.

Na taua e le afioga i le ali’i faipule mai Manu’a ia Vesi Talalelei Fautanu Jr le fa’aauau pea lea o feutanaiga ma le Fa’atonusili o le Ofisa o Pulega o Uafu ma Malaeva’alele, e tusa ai o le mataupu e fa’atatau i le va’a o lo o tautuaina le itumalo.