Ads by Google Ads by Google

Fesiligia Sunia le malosi e oo i ai tulafono i totonu o nu’u

ausage@samoanews.com

O le fa’alavelave lea e pei ona ta’usala ai ni ali’i se to’alua i lo la fa’ao’olima lea i se ali’i na musu e aveese le ie sa pulou ai lona ulu i totonu o le nu’u, na mafua ai ona fesili le afioga i le ali’i fa’amasino ia Fiti Sunia i le loia a le malo ia Woodrow Pengelly, pe i ai se malosi o le Ofisa a le Loia Sili latou te iloiloina ai tulafono o lo o fa’amalosia i tua i nu’u ma afioaga eseese i le atunu’u.

 

E mafua lea tulaga, ona sa taua e ali’i e to’alua ua ta’usala e le fa’amasinoga i lenei mataupu e fa’apea, o le vevesi e pei ona taofia ai i laua e leoleo, na mafua mai ia ua valaau atu le matai o le nu’u i le ali’i sa savali i totonu o le nu’u ma pulou lona ulu i le ie e aveese le ie o lo o pulou ai, peita’i sa musu lea ali’i, ma mafua ai loa ona tula’i mai le fa’alavelave ina ua tulioso atu i laua ua ta’usala ma fa’ao’olima i le ali’i na a’afia.

 

O le itu sa fia malamalama i ai le ali’i Fa’amasino, pe sa fa’atonu e le matai o le nu’u ali’i ia e to’alua e fasi le ali’i na a’afia, ina ua musu o ia e aveese le ie sa pulou ai lona ulu, peita’i na fa’amaonia e ali’i ua ta’usala e to’alua e fa’apea, e lei fa’atonuina i laua e le matai o le nu’u e fasi le ali’i na a’afia, ae na mafua ona la fa’atinoina lea gaioiga, ina ua la vaai e le usita’i le ali’i na a’afia i le fa’atonuga a le matai o le nu’u.

 

O le ali’i o Reopoamo Samu ua ta’usala o ia i le moliaga mama o le fa’atupu vevesi i nofoaga faitele, ae o le ali’i o Paulo Filemoni ua ta’usala o ia i le moliaga mama o le fa’ao’olima i le tulaga tolu.

 

Na fesili Sunia ia Samu e fa’amatala i le fa’amasinoga tulafono a le latou nu’u, lea na taua ai e le ua molia e fa’apea, e le fa’atagaina ona savali se tasi i totonu o le nu’u ma pulou lona ulu i se ie.

 

“Ae fa’afefea pe afai e vevela le la, e fa’asa fo’i ona pulou le ulu o le tagata i le ie pe a savali i totonu o le nu’u”, o le fesili lea a Sunia ia Samu, ae na tali le ua molia, “ou te le iloa le tulaga lena”.

 

“E leai sau aia e te aiaina ai fua le tagata e fealua’i i totonu o le nu’u ma pulou lona ulu i le ie, e le o oe o se matai poo se pulenu’u e ala ai ona e taumafai e fa’amalosi tulafono a le nu’u, pau le mea e oo ia oe pe afai e te fia oo i le tulaga lena, o le molia o oe i le tulafono ma i’u ina faasala ai oe i le falepuipui”, o le saunoaga lea a Sunia ia Samu, o ia lea na muamua valaau lana mataupu ma tu’uina atu lana fa’asalaga, mulimuli ane fa’atoa valaau le mataupu a Filemoni ma tu’uina atu ai fo’i lana fa’asalaga.

 

Na fa’ailoa e Sunia i le loia a le malo popolega a le fa’amasinoga i ituaiga mataupu fa’apenei, ona ua maitauina le tele o mataupu e a’afia ai taumafaiga e fa’amalosia tulafono i totonu o nu’u ua oo mai i luma o le fa’amasinoga.

 

“O ni isi o nei mataupu e amata lava i le valaau, sosoo ai ma le tu’i, oo atu ai i le ta kiki o le tagata, seia oo atu lava i le tulaga matuia e aofia ai le fa’aaoga o le ma’a e fa’ao’o ai le manu’a i le tagata e le o usita’i i tulafono a le nu’u, ma i’u ina uma ai ma le ola o le tagata o lo o a’afia, ma o tulaga tonu na o lo o mafua ai ona popole le fa’amasinoga i ituaiga mataupu nei, ma mafua ai ona fia malamalama poo oo atu i le Ofisa o le Loia Sili tulafono a nu’u e iloilo mai ai”, o le saunoaga lea a Sunia.

 

E ta’i 6 masina lea ua fa’anofovaavaaia ai Filemoni ma Samu i luma o le fa’amasinoga faaitumalo, i lalo o tuutuuga e ao ona la usita’i i ai. O ni isi o ia tuutuuga e aofia ai lo la fa’atinoina o galuega mo le atunu’u lautele mo le umi e 30 itula, i lalo o le fa’amalumaluga a le Ofisa Faanofovaavaaia.

 

Ua faasa fo’i i laua ona toe auai i ni gaioiga a le aumaga pe afai e le o i laua o ni totino o le vaega o le aumaga i totonu o le nu’u, aemaise ai le matua fa’asa lea ona la toe solia se tulafono a le malo.