Ads by Google Ads by Google

Fesiligia Senatoa mafua’aga ona tuai ona tali atu malae va’alele ise fa’alavelave


[ata: foa'i]
ausage@samoanews.com

O le fa’alavelave lea na tula’i mai i le malae va’alele fa’avaomalo i Tafuna i le vaiaso na te’a nei, ina ua fa’aletonu le va’alele a le Talofa Airways i le taimi na taunu’u mai ai mai lana malaga i Fagali’i, na mafua ai ona valaau e le Komiti o Fela’uaiga a le Senate se iloiloga ma le Fa’atonusili o le Pulega o Uafu ma Malaeva’alele, mo le fa’amaninoina o le mafua’aga na tula’i mai ai lea fa’alavelave, ae aisea fo’i na tuai ai ona tali atu le aufaigaluega a le malae va’alele i le fa’alavelave.

 

O le afioga a Taimalelagi Dr. Claire Poumele ma ni isi o Ta’ita’i o Vaega eseese o lana matagaluega i le malae va’alele sa auai i le iloiloga.

 

O le fesili sa naunau i ai afioga i Senatoa e fia malamalama i ai, o fea sa i ai le aufaigaluega a le malae va’alele i le taimi na tula’i mai ai le fa’alavelave, ae aisea fo’i na tuai ai se fesoasoani i le taimi na tula’i mai ai le fa’alavelave.

 

I lana folasaga i luma o le Komiti, na fa’ailoa ai e Taimalelagi le ripoti sa tusia e le ali’i Pailate sa fa’afoeina le va’alele i le taimi o le fa’alavelave, lea o lo o taua ai e le pailate, na te lei fa’afesootaiina le aufaigaluega a le malae vaalele i le taimi na tula’i mai ai le fa’alavelave.

 

O le fa’alavelave na tula’i mai ina ua tulaueleele le va’alele a le Talofa Airways i le malae va’alele Faavaomalo i Tafuna, ma tula’i mai ai se fa’aletonu i se tasi o kia ao aga’i lemu mai le va’alele i le vaega e tu ai.

 

Saunoa Taimalelagi e fa’apea, e ui o lo o taua i le ripoti a le au fa’asalalau se fa’amatalaga mai le Ofisa e Pulea Malaeva’alele a le malo tele (FAA), e le o se fa’alavelave matuia na tula’i mai, ae i lona talitonuga, e matua matuia lava le fa’alavelave sa tula’i mai, aemaise o lea sa i ai le pasese i totonu i le taimi na tula’i mai ai le fa’alavelave.

 

O aoaoga e pei ona fa’atinoina e le FAA ma le aufaigaluega a le malae va’alele i soo se taimi e faia ai a latou fa’ata’ita’iga, e 3 minute e tatau ona tali atu ai le aufaigaluega a le malae va’alele, talu mai le taimi e logoina ai e le pailate le aufaigaluega mo le fa’alavelave.

 

Saunoa Taimalelagi e fa’apea, e tusa ai ma le ripoti a le pailate ua ia taulimaina e tusa ai o le fa’alavelave sa tula’i mai, e 10 minute talu ona tuana’i le fa’alavelave ae fa’atoa taunu’u atu le aufaigaluega a le malae va’alele mo se fesoasoani. Ae tusa ai o le molimau a le afioga i le ali’i Senatoa ia Magalei Logovi’i, o se tasi lea sa i ai i totonu o le va’alele ma lona aiga i le taimi o le fa’alavelave, e tusa ma le 20 minute le umi na mae’a ai le fa’alavelave ma le taimi na taunu’u ai le aufaigaluega a le malae va’alele mo le ofoina atu o se fesoasoani.

 

Na faamaonia i ripoti, e leai se tasi o le pasese poo le pailate fo’i na a’afia pe na manu’a i lenei fa’alavelave.

 

A o taumafai Taimalelagi e fa’amanino le mafua’aga autu o le fa’alavelave, na fa’auilavea le afioga i le sui peresetene o le senate, le afioga i le ali’i Senatoa ia Nuanuaolefeagaiga S. Nua ma ia saunoa e fa’apea, e tasi lava le manatu autu o lo o fia malamalama i ai afioga i Senatoa, poo fea sa i ai le aufaigaluega a le malae va’alele i le taimi na tula’i mai ai le fa’alavelave.

 

“O fea sa i ai le aufaigaluega i le taimi na tupu ai le fa’alavelave. Aisea na le fa’atinoina ai galuega a le aufaigaluega i le aso lea”, o le saunoaga lea a Nua. Saunoa Taimalelagi e fa’apea, e tupu le fa’alavelave o lo o galulue le aufaigaluega e fa’atino a latou galuega i nofoaga eseese e galulue ai i latou. E le o se tiute a le aufaigaluega le o e tutu i le vaega e sese’e mai ai le va’alele ma tau vaavaai pe i ai se faalavelave e tula’i mai.

 

Sa ia taua atili fo’i e fa’apea, faatoa tali atu le aufaigaluega pe afai e valaau mai le pailate ua mana’omia se fesoasoani, pe faapea mai fo’i ua i ai le fa’alavelave ua tupu.

 

Na lagolagoina e le afioga i le ali’i Senatoa ia Tuaolo M. Fruean le saunoaga a Nua, ma ia taua ai le taua tele o le mataupu ua talanoaina, ina ia malamalama ai le atunuu poo fea tonu e sulu i ai i le taimi e tutupu mai ai fa’alavelave faapenei.

 

Saunoa le afioga i le ali’i senatoa ia Fa’amausili Mau Jr e fa’apea, e le aoga le tele o aoaoga e fa’atino i le tele o taimi, ae a tutupu faalavelave ona leai lea o se gaioiga a le aufaigaluega a le malae va’alele e fa’atinoina mo le atunu’u, aemaise lava i le pasese ma le au va’a.