Talu ai le to’atele o tagata faigaluega mai le Pulega o Fesootaiga a Amerika Samoa (ASTCA), ua latou fa’aalia i o latou sui faipule i le Fono Faitulafono, tusi fa’ailo ua latou maua e fa’ailoa atu ai le taimi e fa’amuta ai la latou tautua mai galuega sa latou galulue ai mo le tele o tausaga, e aunoa ma ni mafua’aga tatau, ua fesiligia ai e le afioga i le ali’i Faipule mai le Itumalo o Ituau le fa’amaoni ma le amiotonu o ia fa’aiuga.

I le taimi o folafolaga a le maota o sui i le aso Lua o le vaiaso nei, na tula’i ai le afioga i le ali’i foma’i ia Sataua Dr. Mataese Samuelu ma ia fa’aleo atugaluga a tagata o lona itumalo o lo o a’afia i lenei mataupu.

O le talosaga a le afioga i le ali’i Faipule na auala atu lea i le Ta’ita’i o le maota o sui, le afioga i le Fofoga Fetalai ia Savali Talavou Ale, ona e le i auai le Ta’ita’i o le Komiti o Fesootaiga a le maota o sui e tatau ona aga’i tonu i ai le mataupu, le afioga i le Faipule ia Puleleiite Li’amatua Tufele Jr, o ia fo’i lea ua tofia e le Kovana ia Lolo Matalasi Moliga e avea ma Ta’ita’ifono ma le Pulesili le tumau o le ASTCA.

Na taua e Sataua le fia maua lea o se feiloaiga ma le Pulega o Fesootaiga a le malo, mo le fa’atalatalanoaina o le mataupu e fa’atatau i tusi fa’ailo ia ua maua e ni isi o ana tagata faigaluega, poo se tulaga tatau lea tulaga, ae pe fa’amaoni fo’i nei ituaiga fa’aiuga ua faia.

“Atonu o lo o tofu uma lava itumalo o le atunu’u ma tagata o lo o galulue i le Pulega o Fesootaiga a le malo, i latou ia ua sili ona mafatia ma loto tiga i lenei mataupu, o le mafua’aga lena e tatau ai ona maua sa tatou feiloaiga ma le Pulega o Fesootaiga mo le fa’amaninoina mai o se tali e uiga i lenei mataupu”, o le saunoaga lea a Sataua.

O le mataupu e fa’atatau i tagata faigaluega a le ASTCA e pei ona vavao ai le to’atele o le atunu’u, na alia’e mai i le masina na te’a nei ina ua tu’uina atu e le Pulesili le tumau a le ASTCA ia Puleleiite tusi fa’ailo i tagata faigaluega e to’a 10, e fautuaina ai i latou ina ia fa’amavae mai galuega sa galulue ai mo le tele o tausaga.

O ni isi o mafua’aga e pei ona taua e Puleleiite i tusi sa tu’uina atu i ni isi o tagata faigaluega ua a’afia, o lo o taua ai le tatau lea ona fa’amavae mai lana galuega, ona ua latou ausia tausaga e tatau ai ona malolo litaea.

O isi o tagata faigaluega sa latou maua tusi fa’ailo, o i latou ia o lo o galulue i lalo o konekarate pupu’u, ma ua fa’amutaina fo’i ia konekarate i le fa’aiuga o le masina o Iuni na te’a nei.

O atugaluga e pei ona fa’aalia e ni isi o tagata faigaluega ua a’afia, e le gata e lei taitai lava tausaga faigaluega, ae lei atoa fo’i tausaga faigaluega e agava’a ai mo le litaea. Mo se fa’ata’ita’iga o se tasi o tagata faigaluega e 60 tausaga le matua, ae na o le 13 tausaga talu ona galue i le ASTCA.

O le itula e 8:30 i le taeao o le aso Lua o le vaiaso fou lea ua fa’atulaga e faia ai le iloiloga o lenei mataupu, i lalo o le ta’ita’iga a le afioga i le ali’i Faipule ia Ve’evalu Meauta Mageo, o ia fo’i lea o se totino o le Komiti o Fesootaiga a le maota, ma ua fa’amoemoe e fesiligia ai le afioga a Puleleiite e uiga i lenei mataupu.