Ads by Google Ads by Google

Fesiligia mafua’aga ua leai ai ni ta’avale EMS Falelima i Sasa’e

ausage@samoanews.com

O le toe tatalaina ai o galuega fa’atino a le Fono Faitulafono i le aso Luan a te’a nei, na tula’i ai le afioga i le ali’i Faipule ia Fatulegae’e P. Mauga i luma o le maota o sui, ma ia fesiligia le mafua’aga ua ala ai ona leai se ta’avale EMS ua tofia mo le Falelima i Sasa’e, e ui o lea ua mae’a ona fa’asoa ta’avale EMS e lei leva ona taunu’u mai, e le o i ai se ta’avale ua fa’apitoa mo le Falelima i Sasa’e.

 

Saunoa Fatulegae’e fa’apea, e le o se taimi muamua lenei ua ia tula’i ai ma fesiligia tulaga o atina’e mo le Falelima i Sasa’e, aemaise lava i le tautua a se ta’avale falema’i.

 

I lona talitonuga, afai o lea ua mae’a ona fa’asoasoa ta’avale falema’i sa foa’i mai e Hawai’i mo Amerika Samoa, e tatau fo’i la ona tofu ta’avale uma Falema’i a le atunu’u e aofia ai ma le Ofisa o le EMS i Fagaitua, ina ia mautinoa e le atunu’u o lo o i ai se ta’avale e mafai ona tautuaina ai i latou i taimi e tula’i mai ai ni fa’alavelave fa’afuase’i.

 

“E taua tele tagata o le Falelima i Sasa’e ia te a’u, o le mafua’aga lena o lo’u tula’i soo e fa’aleo lenei mataupu, ina ia mautinoa e agava’a fo’i tagatanu’u o le Falelima i Sasa’e i lenei tautua”, o le saunoaga lea a Legae’ee.

 

Saunoa le taitaifono o le Komiti o le Falema’i ia Vesi Talalelei Fautanu Jr e fa’apea, o le tufatufaina o ta’avale EMS, ua taoto atu lava i le pulega a le falema’i i Fagaalu ma le EMS, pau le vaega o lo o ia manatuaina, o le taimi lava e avanoa ai se va’a mo Manu’a, o le taimi fo’i lena e toe fa’afo’i ai le ta’avale a le itumalo o Manu’a sa aumai e fesoasoani i le tautuaina o le atunu’u ina ua le lava ni ta’avale sa vaiaso.

 

Na fa’amanino e le afioga ia Faimealelei A. F. Allen, o se totino o le Komiti Fa’afoe a le Falema’i e fa’apea, o lo o tofu ta’avale uma falema’i eseese i le atunu’u e pei o Tafuna, Leone, Fagaalu, Manu’a fa’apea ai ma Fagaitua, pau le mafua’aga ua ala ai ona tuai le tu’uina atu o le ta’avale EMS i le Falelima i Sasa’e, ona o lo o tau saili ni isi o le aufaigaluega e fa’atinoina le galuega, ona e le o lava le aufaigaluega i le taimi nei.

 

Na taua e le Pulesili o le EMS ia Galumalemana Popo Avegalio i le Samoa News, i le aso na fa’apaiaina ai ta’avale falema’i e 5 sa foa’i mai e le Ofisa o le EMS a Honolulu e fa’apea, ua laki Amerika Samoa i le fesoasoani mai a le vaega o le EMS a Honolulu, ua mafai ai ona maua mai nei ta’avale EMS tatou te fa’aaogaina.

 

Saunoa atili Galumalemana e fa’apea, e ui o ta’avale ua uma ona fa’aaoga ia o lo o foa’i mai e le vaega o le EMS a Honolulu mo Amerika Samoa, o le itu e fa’afetai ai, o lo o maua mai ni ta’avale e tautuaina le atunu’u, ona o ituaiga ta’avale nei, e fai lava si taugata, e silia ma le $200,000 le tau o le ta’avale e tasi.

 

Na taua atili e le afioga a Galumalemana lona fiafia tele e galulue fa’atasi ma faipule o le Fono Faitulafono, i le sailiina lea o ni isi alagatupe e mafai ai ona fa’atupe le fa’atauina mai o ni ta’avale fou mo le EMS, nai lo le latou fiafia pea o ni isi o Faipule e fa’aleo lagona fa’asea fa’asaga i le tautua a le aufaigaluega a le EMS, e aunoa ma lo latou malamalama i le faigata o le fa’atinoina e le aufaigaluega o le galuega.