Ads by Google Ads by Google

Fesiligia mafua’aga ua fa’atolu ai ona fai tauofoga mo le School Lunch


Faatonusili o le Ofisa o Fa’atoaga ia Filifaatali Michael Fuiava ma le Faatonusili o le Ofisa Pulea Oloa a le malo ia Dr. Oreta Mapu Crichton. [ata AF]

Ni isi o sui o le aufai fa’atoaga a le atunu’u. [ata AF]
ausage@samoanews.com

Na tau le gagana le Fa’atonusili o le Ofisa e Pulea Oloa a le malo ina ua fesiligia o ia i luma o le maota o sui i le vaiaso nei, i le mafua’aga ua fa’atolu ai ona faia tauofoga mo le polokalame o le School Lunch i totonu o le tausaga aoga lenei e tasi.

 

Na taua e le afioga i le ali’i faipule mai le Itumalo o Ituau ia Sataua Dr. Mataese Samuelu, o se tasi fo’i o sui o le aufai fa’atoaga a le atunu’u e fa’apea, ao taumafai ai faipule e tau saili le mafua’aga ua tele ai fa’asea ma lagona le fiafia o le to’atele o le aufai fa’atoaga fa’asaga i tauofoga mo le School Lunch, e tasi lava le mafua’aga o nei mau fa’asea, o loo tu’u fesili le aufai fa’atoaga pe aisea ua fa’atolu ai ona faia tauofoga mo le polokalame a le School Lunch.

 

“O le tulaga tonu lena o loo mafua ai ona fa’asea ma tu’u fesili le aufai fa’atoaga, o a’u fo’i o le isi fai fa’atoaga a le atunu’u o loo galue i lalo o le Asosi a le “Farmers Co--op”, o loo fia malamalama le to’atele i le mafua’aga ua fa’atolu ai ona fai tauofoga i totonu o le tausaga e tasi, aua i lo’u talitonuga, e le tatau ona faia lena tulaga”, o le saunoaga lea a Sataua na mafua ai ona taumafai mai le Faatonu o le Ofisa o Procurement e tau fa’amalamalama le mataupu.

 

Saunoa Dr. Oreta Mapu-Crichton e fa’apea, ua mafua ona fai fa’atolu tauofoga i lenei tausaga, ona eseese lava mafua’aga o loo fautua mai ai le polokalame e tatau ona fa’amalieina.

 

“O isi taimi e mafua ona toe fai ona o loo fa’atalitali fa’aiuga i tauofoga e tatau ona maua mai, ae fa’amalulu atu ai”, o le saunoaga lea a Dr. Crichton.

 

Ae na toe tuli tatao e le afioga a Sataua lana fesili ma ia saunoa ai e fa’apea, “E ofo lo’u sui i le mafua’aga ua fa’atolu ai ona faia tauofoga mo le School Lunch e pei ona e taumafai e fa’amalamalama mai, e atagia mai fo’i i lau tali e tele naua mafua’aga ua ala ai ona tula’i mai lea tulaga, ae i lo’u taofi e le sa’o lena tulaga, o le mafua’aga tonu lena o loo tele ai fesili ma fa’asea a le aufai fa’atoaga, ae o le a fa’amuta mai i i a’u fesili, ae ou te fiamalamalama atili pea i lenei mataupu, atoa ai ma la’u talosaga ina ia aami ni sui o le aufai fa’atoaga i se isi iloiloga i le lumana’i e fa’atatau i lenei mataupu”, o le saunoaga lea a Sataua.

 

I tulaga i vailaau ma fa’alelei eleele o loo fa’aaoga e le aufai fa’atoaga e tausi ma fa’atupu lelei ai le ola o a latou fa’atoaga, o se tasi lea o mataupu na fesiligia e afioga i Faipule, e pei ona fesiligia ai e Timusa Tini Lam Yuen le tulaga ua i ai fa’atoaga sa tapunia i le tausaga ua mavae, ina ua fa’amaonia lo latou fa’aaogaina o vailaau e le o fa’atagaina i lalo o tulafono a le Ofisa o Fa’atoaga a le Feterale.

 

Saunoa le Faatonusili o le Ofisa o Fa’atoaga ia Filifa’atali Michael Fuiava e fa’apea, o loo fa’aauau pea suesuega i fa’atoaga e pe ona taua, ae o vailaau ma fa’alelei eleele o loo fesiligia, ua mae’a ona faia i ai a latou su’esu’ega ina ia mautinoa e agava’a i lalo o tulafono lo latou aumaia atoa ai ma le fa’aaogaina.

 

“O le mea moni lava, soo se vailaau lava ma fa’alelei eleele e le pasia e le Ofisa o Fa’atoaga a le Feterale, e le mafai fo’i ona taliaina i Amerika Samoa, ma o le tele o nei vailaau ma fa’alelei eleele sa aumai i taimi ae lei tofia a’u e avea ma Faatonu o le Ofisa o Fa’atoaga, e le o tusa ma ala o le tulafono, o le mafua’aga lea ua ou fa’aaogaina ai le malosi o loo tuuina mai e le tulafono ia te a’u, ou te taofia ai le toe aumaia o vailaau nei ma fa’alelei eleele i le atunu’u”, o le saunoaga lea a Filifa’atali.

 

Saunoa atili Filifa’atali e fa’apea, o le agaga atoa o le kovana ma le faigamalo, ia fa’amuamua le tulaga o le saogalemu o le atunu’u lautele, aemaise lava i fanau aoga o loo agava’a i lalo o le polokalame a le School Lunch o loo sapalai e le aufai fa’atoaga.

 

Na taua e ni isi o afioga i faipule popolega o loo i ai, i le to’atele lea o le aufai fa’atoaga Asia o loo masalomia lo latou faia o gaioiga e le tusa ma le tulafono, e aumai fa’anana ai vailaau nei i le atunu’u, ae a’afia ai le soifua maloloina o tagata.

 

Saunoa le faipule mai Saole ia Kitara Vaiau e fa’apea, o se tasi o tulaga ua maitauina i le taimi nei, ua naunau tele le isi fai fa’atoaga e auai vailaau e fa’avave ai le tupu o le kapisi ma le kukama, ae galo ai le malosi o le vailaau o loo i totonu o le tino o le fualaau’aina e ono a’afia ai le saogalemu o le atunu’u.

 

Na talosagaina e le afioga i le ali’i faipule mai Fofo ia Fagaoatua Dorian T. Salave’a le afioga a Filifa’atali, ina ia silasila toto’a lona Ofisa i ni isi o tagata fai fa’atoaga mai Asia ua vaaia le faatau solo i tafatafa o le alatele o a latou fa’atoaga.

 

Mo se fa’ata’ita’iga e pei ona saunoa le ali’i faipule, o le vaiaso nei na molimau ai e tagata o le afioaga o Leone se fai fa’atoaga Asia ua fa’atu lana laulau i tafatafa o se fale fa’atali pasi i totonu o le afioaga, ae fa’atau ai ana fualaau’aina, ae le o mautinoa poo pasia lana fa’atoaga e le Ofisa o Fa’atoaga.