Fesiligia mafua’aga fa’amuta fa’afuase’i tautua Fotu-o-Samoa II mo Manu’a

Le va’a mai le malo o Samoa, le Fotu-o-Samoa II ina ua sauni na malaga mulimuli mo Manu’a i le vaiaso na te’a nei.  [ata AF]
ausage@samoanews.com

O le fa’amuta fa’afuase’i o le tautua a le va’a mai le malo o Samoa mo Manu’a, le Fotu-o-Samoa II i le vaiaso na te’a nei, ua fesiligia ai e ni isi o le itumalo le mafua’aga ua ala ai ona fa’amuta aloaia le auaunaga mo le itumalo, a o lea o lo o tele pea manaoga mo le la’uina atu o uta mo Manu’a, e aofia ai ma sapalai mo fanau aoga fa’apea ai le falema’i.

 

E to’atele ni isi o le itumalo o Manu’a sa latou feso’ota’i mai i le Samoa News i le amataga o le vaiaso nei, mo le sailiina o ni fa’amatalaga e uiga i lenei fa’afitauli.

 

“O le fa’aiuga o le vaiaso na te’a nei na fa’atoa maua ai e le itumalo se fa’amatalaga mai le ofisa o le Pulega o Uafu ma Malaeva’alele, ua fa’amuta aloaia le tautua a le Fotu-o-Samoa II mo Manu’a, ae o le M.V Sili fo’i lea ua toe toso i luga o le vaega toso va’a i Satala, ona o ni isi o vaega e moomia le toe fa’aleleia mo le va’a, ua le iloa nei e le itumalo se gaioiga o le a faia mo lenei vaiaso, a o lea e tele uta e fia momoli i le itumalo”, o le saunoaga lea a le susuga ia Ta’avili Mapu i le Samoa News.

 

I luma o le maota o sui i le taeao ananafi, na fa’aleoina ai e afioga i ali’i faipule mai Manu’a ia Vesi Talalelei Fautanu Jr ma Toeaina Faufano Autele le mataupu lava fo’i lea e tasi, e tusa ai o le taofia fa’afuase’i o malaga a le Fotu-o-Samoa II mo Manu’a.

 

Na fa’amanino e le afioga a Vesi i luma o le maota o sui e fa’apea, sa ia taumafai e saili se fa’amaoniga o lenei mataupu i le fa’aiuga o le vaiaso na te’a nei, ma ia maua mai ai se ripoti e fa’amaonia ai le fa’amuta aloaia o le tautua a le va’a mai Samoa mo le itumalo, atoa ai ma le toe toso atu o le MV Sili i luga o le vaega toso va’a mo le fa’aleleia o ni vaega laiti o lo o mo’omia le fia fa’aleleia.

 

“E taua tele le tautua a le va’a mai Samoa mo le itumalo, e le gata o lo o momoli ai uta ma sapalai mo aiga, aoga, falema’i ma pisinisi, ae o lo o mafai ai fo’i ona la’u ni isi o uta tetele mo galuega o atina’e i Manu’a a le malo o lo o fa’agasolo i le taimi nei, ae afai o lea ua fa’amuta fa’afuase’i lenei auaunaga, toe tula’i mai ma le fa’aletonu i le va’a a le malo, le M.V Sili, lona uiga o le a toe pagatia fo’i le Itumalo”, o le saunoaga lea a Vesi, ma ia talosagaina ai loa se iloiloga se’i fesiligia ai le Fa’atonusili o le Ofisa o Pulega o Uafu ma Malaeva’alele i le taeao o le aso Tofi o le vaiaso nei, mo le fa’amaninoina o lenei mataupu.

 

Na lagolagoina e le afioga i le ali’i faipule ia Toeaina le talosaga a Vesi mo se fesoasoani, ina ia mafai ai ona malamalama le itumalo i le mafua’aga o lenei suiga fa’afuase’i.

 

Na fa’ailoa e Toeaina i luma o le maota o sui e fa’apea, o le fa’aiuga o le vaiaso na te’a nei na tula’i mai ai se manaoga taua ma le fa’anatinati i Manu’a, mo le fia momoli vave ina atu i le Itumalo o sapalai mo aoga, ae o le fa’afitauli na tula’i mai, ua leai se va’a e ave ai sapalai.

 

O le malaga a le va’a mai se tasi o tagata faipisinisi i le atunu’u sa malaga i Manu’a i le vaiaso na te’a nei, na totogi ai loa e le afioga ia Toeaina le momolina atu o sapalai mo faiaoga, lea fo’i na la’u fa’atasi ai ma uta a ni isi o tagata o le itumalo.

 

Na fa’ailoa e Toeaina i luma o le maota e fa’apea, so o se taimi lava e tula’i mai ai fa’afitauli fa’apenei mo femalagaaiga i Manu’a, e fa’aalu ai e tagata o le itumalo a latou tupe e totogi ai va’a a tagata faipisinisi, e momoli ai a latou uta i le itumalo.

 

Na taua e se sui sinia o le Ofisa o le Pulega o Uafu ma Malaeva’alele i le Samoa News e fa’apea, o le fa’aiuga e fa’amuta fa’afuase’i ai le tautua a le Fotu-o-Samoa II mo Manu’a, na fa’avae lea i luga o se manaoga mai le Ofisa o va’a mai le malo o Samoa, e mana’omia ai le vave fo’i atu o le Fotu-o-Samoa II mo le fa’atinoina o lana tautua i Samoa.

 

E le i mafai e lea sui sinia ona fa’amanino auiliili po o le a tonu le mafua’aga fa’anatinati ua mafua ai ona toe fo’i le va’a i Samoa.

 

Ae na taua e le susuga a Filimaua Ale e fa’apea, e tatau lava ona i ai se isi fuafuaga fa’aleoleo a le malo mo tagata o le itumalo o Manu’a, i soo se taimi e tula’i mai ai fa’afitauli le ma’alofia fa’apenei i soo se taimi, ina ia taofia ai le toe pau o le mamafa o le avega i tagatanu’u o Manu’a latou te totogiina ai le auina atu o a latou uta i Manu’a.

 

“E le o se taimi muamua lenei ua tula’i mai ai nei fa’afitaui i tulaga tau femalagaaiga i le itumalo, ae talu lava ona tutupu nei mau fa’afitauli talu mai le tele o nofoaiga ua mavae atu seia oo mai lava i le taimi lenei, o lo o fa’atamala pea lava le malo i le fa’atinoina o le latou tiute, i le faia lea o gaioiga uma ina ia fa’aleleia ai tulaga tau femalagaaiga i le sami ma le ea mo Manu’a, o lo o fa’aaua pea ona alu le tele o tupe a tagata e totogi ai a latou uta, ae o gaioiga ia e tatau ona ave fua e aunoa ma se totogi, aua i lo’u talitonuga, o mea uma e lelei mo Tutuila ma Aunu’u,” o le saunoaga lea a le susuga ia Filimaua.

 

O le fa’aiuga o le masina fou o Oketopa lea ua fa’amoemoe e taunu’u mai ai i le atunu’u le va’a fou mo le itumalo o Manu’a. Na fa’amaonia e Vesi i le Samoa News i le vaiaso na te’a nei, o le aso Faraile nei na te tuua ai le atunu’u ae malaga atu i Amerika faatasi ai ma ni isi ua fa’amoemoe latou te fa’aauva’aina le momoliina mai o le va’a fou a le itumalo.

 

O molimau ua fa’amoemoe e auai i le iloiloga e aofia ai le Faatonusili o le Ofisa o Pulega o Uafu ma Malaeva’alele, fa’apea ai ma le Pulesili o le Ofisa Tosova’a a le malo i Satala.

Comment Here