Fesiligia le agava’a pea Gafatasi avea ma totino Komiti Femalagaaiga


Afioga i ali’i Faipule ia Gafatasi Afalava ma le afioga Lavea Fatulegae’e P. Mauga. [ata AF]
ausage@samoanews.com

Ua fesiligia e le afioga i le ali’i faipule ia Lavea Fatulegae’e P. Mauga le agava’a pea lea o le afioga i le ali’i faipule ia Gafatasi Afalava, e avea ai pea o ia ma totino o le Komiti Fa’afoe a le Ofisa o Femalagaaiga a le malo.

 

O le taimi o folafolaga a le maota o sui i le aso Lua o le vaiaso nei, na tula’i ai le afioga Lavea ma fesiligia le Fofoga Fetalai e tusa ai o le mataupu e fa’atatau i le ali’i faipule, a o fa’afofoga atu i ai ma le toto’a le afioga a Gafatasi, lea o lo o soso’o lava o la nofoa i totonu o le nofoaga le tumau o lo o faia ai tauaofiaga a le maota o sui, i le fale o loo i le itu i sasa’e o le Fale Laumei i Utulei.

 

O le afioga i le ali’i faipule mai le itumalo o Atiulagi/Leasina, o ia lea o le sui o le maota o sui i totonu o le Komiti Fa’afoe a le Ofisa o Femalagaaiga, ae o le afioga i le ali’i senatoa ia Fa’amausili Mau Jr, o ia lea o le sui o le Senate.

 

Talu ai e le i fa’amaonia e le Senate le suafa o Gafatasi e avea ma totino o le Komiti Fa’afoe o Femalagaaiga, o le mafua’aga lea e talitonu ai Lavea, e le o tusa ma le tulafono le auai o le sui mamalu i fonotaga a le Komiti Fa’afoe.

 

“Talu ai e le i pasia e le maota maualuga le suafa o le afioga i le ali’i faipule, e le tatau ai fo’i la ona nofo o ia i soo se taimi e fono ai le Komiti Fa’afoe,” o le saunoaga lea a Lavea.

 

“O le fa’aauau ai pea la ona auai o le sui mamalu i fonotaga a le Komiti Fa’afoe, ua atagia mai ai lona soli o le tulafono,” o le saunoaga lea a Lavea.

 

“I lo’u la taofi, o fa’aiuga uma a le Komiti Fa’afoe sa aofia ai le palota a le sui mamalu, e tatau ona fa’aleaoga uma,” o le saunoaga lea a Lavea na fa’afuase’i ai loa ona taofi mai e le Fofoga Fetalai.

 

“Fa’apea lava a’u e te tula’i mai o se mataupu taua ma le aoga mo le faigamalo o le a e saunoa mai ai, aemaise ai fo’i o tulaga i pili tupe ia o lo o tau fuafua atu i ai a tatou galuega,” o le saunoaga lea a Savali Talavou Ale ia Lavea, ma ia fautuaina ai o ia e soia le taumafai e talanoa i mataupu e leai se aoga.

 

Na lagolagoina e le afioga i le tama’ita’i faipule ia Vui Florence Saulo le fautuaga a le Fofoga Fetalai, ma ia fautuaina ai le ali’i faipule e aua le talanoaina mataupu fa’aletagata i totonu o le maota, ae aumai mataupu e ‘anoa ma aoga mo le lumana’i o le atunu’u ma le malo.

 

O le fa’aiuga o folafolaga a le maota o sui, na tula’i ai le afioga a Gafatasi ma saunoa e fa’atatau i le mataupu na laga e le afioga a Lavea, ma ia taua ai lona fa’anoanoa ona o le agaga na mafua ai ona fesiligia e le sui mamalu le mataupu e fa’atatau ia te ia.

 

Na faamanaino e Gafatasi i luma o le maota, e le o i ai lava se iugafono a le Komiti Fa’afoe o ia sainia, ona o lea na te silafia e le i fa’amaoniaina o ia e le Senate. Ae o lona auai i fonotaga o lo o usuia a le Komiti Fa’afoe, o se tulaga taua tele lea mo fa’aiuga fai, ona e leai lava se fono na ia auai e ova atu ai le aofa’i o le kalama a le Komiti Fa’afoe.

 

A o le i mae’a le tauaofiaga a le maota, na toe tula’i Lavea ma fa’amalulu ia Gafatasi ona o le mataupu sa ia fa’aleoina, ona o le manatu lava e puipui i le paia o le maota. Sa ia taua fo’i e fa’apea, o ia e le o se sui e fiafia e talanoa i mataupu e fa’aletagata, se’i vagana ai lava mataupu e taua mo le fono ma le atunu’u.

 

I isi tala mai le Fono, ua fesiligia e le afioga i le ali’i faipule ia Sataua Dr. Samuelu Mataese le mafua’aga ua aveese mai ai le Van na avatu e fa’aaoga mo le aoga Tulaga Muamua i Faleasao, ae tuu i le nofoaga o lo o i ai le Aoga Maualuga i Ta’u.

 

O le taeao ananafi na fa’atoa tula’i ai le Taitai o le Komiti o Aoga al e maota o sui, afioga Vaetasi S. Moliga ma ia fa’amanino le mafu’aaga o le fa’aiuga. Saunoa Vaetasi e fa’apea, o ta’avale uma lava a le Ofisa o Aoga o lo o fa’aaoga i Manu’a, e tatau ona i lalo uma o le aoga maualuga, o iina e aumai ai le fa’atonuga atoa ai ma le fa’asoasoaina mai o le fa’aaogaina o ta’avale.

Comment Here