Ads by Google Ads by Google

Fesiligia Komesina i tulafono fa’atautaia ai faiga palota 2016


[ata: foa'i]
ausage@samoanews.com

E le na o le to’atasi se sui tauva na tausinino mo nofoa a le atunu’u i le faiga palota tele na fa’atoa mae’a atu i le aso 8 Novema 2016, na te le o fesiligia tulafono ma ta’iala e ao ona fa’aaoga e le Ofisa o Palota e fa’atautaia ai faiga palota a le atunu’u.

 

O le 2 vaiaso talu ai na lomia ai fo’i i le Samoa News se fa’asea a le afioga i le ali’i faipule mai Fagatogo ia Maugaoali’i Leapai Tusipa Anoa’i fa’asaga i le Ofisa o Palota, ma ia fesiligia ai tulafono o lo o fa’atautaia ai palotaga a le atunu’u, ona o ni isi o tulaga sa ia molimauina i le Fale Palota i Fagatogo e soli ai le tulafono i le taimi o le palota.

 

O le vaiaso na te’a nei na fa’atoa maua ai e le Samoa News le tusi sa tu’uina atu e Rossie Fualaau Tago Lancaster, o se tasi lea o sui o le Komiti sa lagolagoina le fa’amoemoe a Paepaetele Mapu S. Jamias, sa tu’uina atu i le Komesina o le Ofisa o Palota, afioga Uiagalelei Dr. Lealofi Uiagalelei lea sa tu’uina atu i le aso 10 Novema, ma ia fesiligia ai tulafono ma ta’iala mo le fa’aaogaina o pepa palota ua totoe.

 

Na taua e Lancaster i lana tusi ia Uiagalelei e fa’apea, talu ai o ia sa fai mai sui o le Komiti a Paepaetele i le Fale Palota #29 i Nu’uuli, sa ia molimauina ai le auala sa faia mo pepa palota na totoe e le i fa’aaogaina, lea sa lolomi i ai le fa’ailoga (stamped) e fa’ailoa ai e le i fa’aaogaina pepa palota nei.

 

Na taua e Lancaster i lana tusi e fa’apea, na te fia mauaina se tali mai le Komesina ma le Ofisa o Palota, i le tulafono ma auala e tatau ona faia i pepa palota ua le mafai ona fa’aaogaina i le taimi e mae’a ai le palota.

 

“O lo’u atugaluga atoa ai ma le mau fesili ua tula’i mai, e fa’avae lea i luga o le faia o le mea amiotonu i pepa palota ua le fa’aaogaina, i le po sa fa’atautaia ai le faiga palota tele a le atunu’u na fa’atoa mavae atu nei. E fia manino po o ai ta’iala sa’o e fa’ataga ma fa’aaoga i lalo o le tulafono, mo le fa’aleagaina o pepa palota uma e totoe mai i le aso o le palota mai soo se Fale Palota”, o se vaega lea o le tusi a Lancaster.

 

Na taua atili e le Lancaster i lana tusi ia Uiagalelei e fa’apea, ina ua ia fesiligia le Ta’ita’i o le Vaega fai palota i Nuuuli i le aso na tula’i mai ai lenei mataupu, i le tulafono e fa’aaoga mo pepa palota totoe, sa taua ai e le ta’ita’i ia te ia e fa’apea, o pepa palota uma e totoe ma ua le fa’aaogaina, o le a faitauina e lana vaega i le mae’a ai lea o le fa’atinoina o le faitauga aloaia o palota, ona toe fa’afo’i atu loa lea i le Ofisa o Palota.

 

“Sa ou fesiligia le tali a le ta’ita’i o le vaega fai palota sa tu’uina mai i lea po, ma ou fesiligia ai le tulaga lea, pe o le tulafono sa’o le fa’aleagaina o pepa palota ua totoe, ae le o le toe fa’afo’i atu i le Ofisa o Palota i le taimi ma le aso lava lea”, o le saunoaga lea a Lancaster.

 

“Sa fa’aalia fo’i e le sui o le vaega tauva ia Faoa ma Sanitoa le lagona lava lea e tasi, peita’i, o pepa palota uma e 393 sa totoe e le i fa’aaogaina, sa lolomi i ai le fa’ailoga (stamped) ao lei tatalaina na o pusa palota mo le faia o le faitauga aloaia o le palota”, o se vaega lea o le tusi a Lancaster.

 

Mo faiga palota i le lumana’i, na taua ai e Lancaster le tatau lea ona fa’atumauina tulaga o le faia o le amiotonu atoa ai ma le puipuia o le mamalu atoa ai ma le saogalemu o faiga palota a le atunu’u.

 

“So o se gaioiga tatou te faia, e tatau ona faia ina ia puipuia ai tulaga mamalu atoa ai ma le fa’atuatuaina o faiga fa’apalota, aemaise lava le tulaga lea o le momoliina atu lea o pepa palota ua le fa’aaogaina i le mae’a ai lea ona faitauina o palota mai nofoaga ta’itasi sa fa’atinoina ai faiga palota a le atunu’u”, o le vaega lea o le tusi a Lancaster.

 

I lona talitonuga, a o le i tatalaina pusa palota mo le faitauina, e tatau lava ona muamua fa’aleaga ma fa’atamaia pepa palota e le i fa’aaogaina i nofoaga ta’itasi uma sa fa’atino ai le palota, ina ia mautinoa ai le tulaga o le faia o le amiotonu e pei ona naunau i ai le to’atele, ina ia puipuia ai le tele o faiga le fa’amaoni e ono alia’e mai, aemaise i lava o le saogalemu o le faitauina aloaia o palota ma sui tauva.

 

I le fa’aiuga o le tusi a Lancaster, sa ia fa’ailoa ai ia Uiagalelei le tatau lea ona fa’aaoga e lona Ofisa masini e fa’afaigofie ai palotaga a le atunu’u mo le isi palota o lo o sosoo ai nei.

 

Sa ia taua atili fo’i i lana tusi e fa’apea, talu ai o Amerika Samoa lea ua silafia i le Senituri #21, o le tulaga fo’i lea e tatau ai lava ona fa’atino tulaga eseese uma ina ia fa’afaigofie tulafono tau palota i le lumana’i.