Fesiligia itu tete’e fa’amaumauga ua aveese mai ripoti a Leoleo

ausage@samoanews.com

O ni isi o felafolafoaiga i le va o loia a le malo fa’apea ai ma loia o lo o fautuaina ali’i e to’afa, o lo o tu’uaia i le mataupu lea na tafana ai le Ofisa o Leoleo i Leone i le 2 tausaga talu ai sa faia i le aso Faraile na te’a nei, a o lumana’i ai le fa’ataunu’uina o le fa’amasinoga autu o lenei mataupu i le aso Lua o le vaiaso fou, o le fesiligia lea e le itu tete’e o itulau o le ripoti a Leoleo ua aveese mai totonu o le ripoti.

 

O le iloiloga mulimuli lea na faia i le aso Faraile na te’a nei i luma o le afioga i le ali’i fa’amasino ia Elvis P. Patea, atoa ai ma afioga i ali’i fa’amasino lagolago ia Mamea Sala Jr ma Tunupopo Faleafaga, na fa’afofoga ai ali’i fa’amasino i fa’afinauga a itu e lua e fa’atatau i le tele o le mau talosaga ua mae’a ona faila e loia a i latou e to’afa o lo o molia.

 

O i latou o lo o molia e aofia ai Manu Lefatia, Sinapati Tuufaanatu, Tuliese Taliu ma Mosegi Solia.

 

O ni isi o talosaga na finauina i luma o le fa’amasinoga, o le talosaga a le loia a Lefatia ia Sharron Rancourt mo se poloaiga a le fa’amasinoga e fa’atonu ai le malo e fa’ailoa a latou mau fa’amaonia ua sauni e tu’uina atu i luma o le fa’amasinoga.

 

Na taua e Rancourt e fa’apea, o le ripoti a Leoleo lea na tu’u atu e le loia a le malo ia te ia e fa’atatau i fa’amatalaga a molimau sa fesiligia i le fa’alavelave lea na tula’i mai i le masina o Novema 2014, o lo o atagia mai ai le tele o fa’amaumauga ua toe tape, ae o isi itulau o le ripoti e le o mafai ona maua uma atu.

 

O itula la o le ripoti a Leoleo lea ua le iloa poo fea ua ave i ai, o itula ia o lo o finau Rancourt i le fa’amasinoga ina ia poloa’i le malo e tu’u atu se’i faitau ma iloilo e le itu tete’e, a o le i oo i le aso o le fa’amasinoga.

 

Na fa’auilavea le loia a le malo ia Jerard Murphy ma ia taua i le fa’amasinoga e fa’apea, o le ripoti atoa lava a Leoleo e fa’atatau i le mataupu o lo o tu’uaia ai i latou nei e to’afa, ua mae’a ona tu’uina atu i le itu tete’e, e le malamalama la o ia poo a isi fa’amaumauga ia e finau mai i ai loia e tu’u atu.

 

Na fa’auilavea le afioga i le ali’i fa’amasino ia Patea ma ia fesiligia loia a le itu tete’e i le tulafono e fa’atautaia ai mataupu e fa’atatau i mau fa’amaonia i taimi o fa’amasinoga iloilo (Rule 16), ina ia mautinoa e leai se vaega o mau fa’amaoniae natia e le malo.

 

Na toe fa’amalamalama atili e Murphy e fa’apea, ina ua mae’a ona tu’uina atu e le malo le ulua’i ripoti a Leoleo i le itu tete’e e uiga i le mataupu lenei, na latou maua mulimuli ane ai i le tausaga lenei 2016 isi vaega o le ripoti a Leoleo i luga o le laulau a le ali’i Leoleo sa autu i ai le su’esu’eina o le mataupu, ona faia lea e le malo o kopi o ia ripoti ma tu’u atu i loia a le itu tete’e.

 

“O le taimi nei la, ua leai ma se fa’amaumuaga e fa’atatau i le mataupu o totoe i le malo, ua uma ona matou tu’uina atu i le itu tete’e, matou te le o taumafai fo’i e fa’aufiufi ni isi fa’amatalaga”, o le fa’afinauga lea a Murphy.

 

Saunoa Patea e fa’apea, o lea ua savali i le 2 tausaga o fa’agasolo mai lenei mataupu, ae foliga mai e le o i ai lava se taunuuga lelei o atagia mai ai. Sa ia saunoa atili fo’i e fa’apea, ua mafua ona faulala’i le tele o le mau talosaga (motions) a le itu tete’e i luma o le fa’amasinoga, ona e manatu le itu tete’e ia avatu uma e le malo le faila atoa a Leoleo e uiga i le mataupu atoa, ma ua foliga faigata ai ma le mataupu.

 

Na valaau e le ali’i loia ia Douglas Fiaui le afioga i le ali’i komesina o Leoleo ia Save Liuato Tuitele mo lana molimau, aua le tu’uina atu o fa’amatalaga e uiga i lenei mataupu, aemaise ai le faila a Leoleo e fa’atatau i suesuega sa faia i lenei mataupu.

 

Ina ua fesiligia le afioga i le ali’i komesina e fa’atatau i le faila o lo o i ai le ripoti a Leoleo e uiga i lenei mataupu, na saunoa ai Save e fa’apea, o le faila atoa a Leoleo o lo o i ai fa’amaumauga e uiga i le mataupu lenei, o lo o ia te ia le kopi, ae o isi kopi ua mae’a ona tu’uina atu i loia a i latou o lo o tu’uaia, e leai fo’i ni fa’amaumauga o leiloloa pe ua misi mai le ripoti.

 

I le mae’a o le iloiloga sa faia i le vaiaso na te’a nei, na teena ai e le fa’amasinoga le mau talosaga sa fa’aulu e le itu tete’e, ae ua fa’amausaliina nei le aso 6 Tesema e fa’ataunu’u aloaia ai le fa’amasinoga autu o lenei mataupu.

 

Na taua e le loia a le ali’i o Tuufaanatu ia Karen Shelly i le Samoa News lona sauni e faila sana talosaga i le fa’amasinoga maualuga i le vaiaso fou, e talosagaina ai le aveese mai o ia mai le toe avea ma loia fautua a Tuufaanatu, ae tofia e le fa’amasinoga se loia tua e fautuaina o ia i le taimi o le fa’amasinoga.

 

E talitonu le Samoa News, o le vaiaso fou e tuua ai e le tamaitai loia ia Shelly le atunu’u, i le mae’a ai lea o lana konekarate ma le Ofisa o le Loia Fautua mo Tagata Lautele a le malo.

 

Ae na taua e le loia a le malo ia Murphy e fa’apea, e le o se mataupu e faigofie lenei mataupu, ona e tele naua itu e lavelave ai ma foliga mai ai e fenumia’i vaega o le mataupu, aemaise lava i le tulaga lea, o Leoleo lea o lo o a’afia i le fa’alavelave o lo o tu’uaia ai ali’i nei e to’afa, ae o Leoleo fo’i ia o lo o su’esu’eina le mataupu.

 

O lo o i ai le fa’amoemoe o le malo e tatau ona auai mai le sui o le Vaega Su’esu’e a le Feterale (FBI) sa gafa ma le su’esu’eina o lenei mataupu e molimau i le taimi o le fa’amasinoga.

Comment Here