Ads by Google Ads by Google

Fesiligia Fono fa’afitauli tula’i mai i lisi a pisinisi ma le malo

Le Faatonusili o le Matagaluega o Fefa’atauaiga ma Alamanuia, afioga Fuiavailiili Keniseli Lafaele.  [ata AF]
ausage@samoanews.com

O se tasi o mataupu na fesiligia e afioga i Senatoa ma Faipule, i le taimi na iloilo ai e le Komiti So’ofa’atasi o le Paketi a le Fono Faitulafono le paketi a le Matagaluega o Fefa’atauaiga ma Alamanuia i le vaiaso na nei, o fa’afitauli o lo o tula’i mai i lisi a pisinisi ma le malo, ina ua toe lisi atu e pisinisi fanua o le malo i isi fo’i pisinisi, ona penefiti ai loa lea o pisinisi i tupe o lo o maua mai i lisi ua latou toe sainia ma isi pisinisi, ae gau ai le malo.

 

Saunoa le afioga i le ali’i senatoa ia Uti Petelo e fa’apea, e le sa’o le tulaga lea o loo faia e le tele o pisinisi o lo o latou lisiina fanua o le malo i le “Industrial Park”, o le maua uma e i latou o tupe o lo o maua mai i lisi ua latou toe faia ma isi pisinisi (sub lease), ae leai ma se tupe e alu aga’i i le malo e ana fanua ma meatotino.

 

Na ioe le Fa’atonusili o le Ofisa ia Fuiavailiili Keniseli Lafaele i le finagalo o Uti, ma ia ta’utino ai e fa’apea, o le mea tonu lena ua tele tausaga o tula’i mai i fanua a le malo o lo o lisi atu i pisinisi tua, ae o lo o latou taumafai e saili se auala e foia ai.

 

Na lagolagoina e le afioga i le ali’i peresetene o le Senate ia Gaoteote Palaie Tofau le finagalo o Uti, ma ia fautauina ai le ali’i Fa’atonusili ina ia silasila toto’a i fa’afitauli e pei ona atugalu i ai le Fono Faitulafono.

 

Saunoa Gaoteote e fa’apea, e i ai le isi mataupu i tulaga o lisi ua oo atu i lona ofisa, e fa’atatau i se stand taxi i Tafuna, lea o lo o totogi ai e tagata fai taxi ia tupe i le tagata e ana le stand taxi.

 

O fa’asea mai ni isi o ave taxi o lo o tutu ai a latou taxi i le stand taxi lea e pei ona fa’ailoa e Gaoteote ia Keniseli, e silia i le $5,000 le tupe o lo o maua e le tagata e ana le stand taxi i le masina, lona uiga afai o le tausaga, ua matua tele lava le tupe o lo o maua e le tagata lenei, ae laititi le tupe o lo o totogi aga’i i le malo mo le lisi o le fanua o lo o fa’atu ai lana stand taxi.

 

“O le fautuaga i lau afioga i le ali’i fa’atonusili, se’i toe silasila toto’a i le mataupu lenei, ua tatau ona fai vave loa nei se fa’aiuga e taofia ai le penefiti o pisinisi mai fanua a le malo o lo o latou lisiina atu i si tagata, aua afai e fa’aauau pea ona tula’i mai lenei fa’afitauli, lona uiga la e le o i ai se galuega a lou ofisa o faia i le mataupu lenei”, o le saunoaga tu’u sa’o lea a Gaoteote ia Fuiavailiili.

 

Ae na fa’amanino e le ali’i fa’atonusili e fa’apea, o lo o taumafai malosi pea lona Ofisa e saili se auala e foia ai lenei fa’afitauli, ma o se tasi o ia auala, o le si’i lea i luga o le tau o lisi mo pisinisi, mai le .05sene i le sikuea futu (sq-ft) sa i ai talu mai le tausaga e 2013 i le .54sene lea ua i ai nei.

 

Na taua atili e le ali’i fa’atonu e fa’apea, afai e i ai ni pisinisi fou mai fafo e fia ulufale mai e lisi fanua o le malo e fa’atutu ai a latou pisinisi fou, aemaise lava i pisinisi tetele e tele galuega e mafai ona maua mai ai mo nai o tatou tagata, e mafai ona fa’apau i lalo i le .24sene le totogi o le ‘sq ft’ e amata ai le lisi, ae a mae’a loa le tausaga e tasi pe lua fo’i e fa’atosina ai i latou i le tau lea, ona si’i loa lea i luga i le tau fou e pei ona i ai i le taimi nei.

 

Na fa’ailoa e Fuiavailiili i luma o le Komiti Soofaatasi le tele o pisinisi fou o lo o fuafua e ulufale mai i le atunu’u, ma ua fa’amoemoe fo’i e ave i ai le avanoa e tatala ai a latou pisinisi i Amerika Samoa.