Ads by Google Ads by Google

Fesiligia Faipule mafua’aga ua le avea ai malo $4 miliona LBJ


[ata: foa'i]
ausage@samoanews.com

Na tele fesili a afioga i Faipule i le Sui Teutupe a le malo i le vaiaso na te’a nei, i le mafua’aga ua taofi ai e le malo le $4 miliona sa tatau ona tuuina atu i le falema’i o le LBJ.

 

O le tupe e $4 miliona e pei ona fesiligia, o se vaega lea o tupe na ao mai e le malo mai le lafoga o totogi e 2% i le tausaga e 2016.

 

I lalo o le tulafono na pasia a le Fono Faitulafono ma sainia e le Kovana, o le tupe uma lava e maua mai i le lafoga o totogi e 2%, e toe totogi ai le nonogatupe a le malo e $3 miliona, afai loa ae mae’a ona toe totogi le nonogatupe e $3 miliona, o le tupe e maua mai i le lafoga lea e totogi uma lava i le LBJ.

 

O le iloiloga a le Komiti o le Paketi a le maota o sui i le vaiaso ua te’a, na talanoaina ai le pili e fa’amagalo ai le nonogatupe a le LBJ e $5 miliona mai le tausaga e 2003, na fesiligia ai loa e Faipule lenei mataupu.

 

O le afioga i le ali’i Faipule ia Vailiuama Steve Leasiolagi o le ta’ita’i komiti, o ia lea sa fa’atautaia le fa’afoeina o le iloiloga. O le molimau i le iloiloga o le sui teutupe ia Tina Va’a.

 

Na taua e Va’a e fa’apea, talu ai ua le mafai e le falema’i ona toe totogi atu le aitalafu e $5 miliona i le malo, ua manatu ai le faigamalo ina ia fa’amagalo le aitalafu. Ae le mafai ona aloaia le fa’amagalo ma aveese mai i teuga tusi a le malo, se’i vagana ua pasia se tulafono e fa’amagalo ai.

 

O le mafu’aaga o le nonogatupe a le LBJ i le 2003, ina ua mana’omia e le falema’i se vaega tupe e totogi ai ni isi o ana tautua e aofia ai lafoga a tagata faigaluega, ina ua tulaga fa’aletonu le itu tau tupe.

 

Saunoa atili le Sui Teutupe e fa’apea, o le isi mafua’aga tonu lava lea e ala ai ona tuai ona totogi e le Ofisa o le Tupe a le malo tupe ua uma ona faatulafono e ave mo le LBJ, ona o aitalafu a le falema’i o loo i ai i le malo.

 

Na fesili le Fofoga Fetalai ia Savali Talavou Ale i le Sui Teutupe pe fia se tupe o le lafoga o totogi e 2% e le o totogia i le falema’i, ae na tali le molimau e silia i le $4 miliona.

 

Saunoa Savali e fa’apea, e le tusa ma le tulafono le gaioiga a le malo ua faia, o le latou taofia lea o le tupe na maua mai i le lafoga o totogi sa tatau ona totogi atu i le falema’i, ona o tupe ia ua uma ona fa’atulafono. Sa ia taua atili fo’i e fa’apea, atonu o le mafuaaga lea o le tuai ona totogi e le falema’i o lana nonogatupe.

 

E le i nofo lelei i finagalo o ni isi o Faipule le mataupu ina ua latou fa’afofoga i le molimau a le Sui Teutupe.

 

Saunoa le sui fofoga fetalai ia Fetu Fetui Jr e fa’apea, ua soli e le malo le tulafono ina ua latou le totogia le tupe ua uma ona faatulafono e totogi i le falema’i.

 

“Ua soli e le malo le tulafono, e le fesiligia le tulaga lena”, o le saunoaga lea a Fetu. “Tele naua le mau pili tupe ua tietie uma i luga o le atunu’u, e mafua mai i le le lelei ona fa’atino e le malo o galuega. Sa avatu le fa’atuatuaga e lelei lo outou fa’atinoina o la outou tautua, ae foliga mai e le o le tulaga lena o loo tupu”.

 

Saunoa Fetu e faapea, o loo tau saili ni tupe a le malo, ae o loo tele naua tupe e le o mafai ona ao mai i totonu, e pei o lisi i fanua a le malo i Tafuna, atonu o le mafua’aga lena ua fa’ae’e ai e le malo le tele o le mau lafoga ma tigaina ai tagata, e le o lelei ona ao e le malo tupe o loo maua i ana tautua.

 

Saunoa le afioga i le ali’i faipule ia Vesi Talalelei Fautanu Jr, o le taitaifono o le Komiti o le Falema’i a le maota o sui e fa’apea, e tiga lava ona tele tupe e le o totogia e le malo i le falema’i, ae o lo o fa’aauau pea le tautua a le falema’i mo le tausiaina o le soifua maloloina o le atunu’u.

 

Ae na saunoa le afioga i le ali’i faipule ia Faimealelei Anthony Fu’e Allen, o se totino o le Komiti Fa’afoe a le LBJ e faapea, ua fa’aaoga e le malo le aitalafu e $5 miliona a le falema’i e fai ma auala e pasese ai lo latou le totogia o le tupe e maua mai i le lafoga o totogi e 2%, ma ua foliga mai ai ua uu e le malo le ua o le falema’i i le tulaga o lo o tula’i mai nei.