Fesiligia Faipule mafua’aga e tuai ai ona maua siaki o lafoga a tagata


Molimau a le malo sa fesiligia e faipule i le iloiloina o le pili e sui ai le tusi lafoga a le malo. [ata AF]

Afioga i Faipule i le taimi o le iloiloga [ata AF]
ausage@samoanews.com

O se tasi o fesili sa umi se taimi o fetufaa’i ai afioga i Faipule ma molimau a le malo i le vaiaso na te’a nei, ina ua iloilo le pili a le faigamalo e fa’afou ai le fua o lafoga a Amerika Samoa ina ia tutusa ma le fua o lafoga a le malo tele, o le mafua’aga e tuai ai ona maua siaki o lafoga a tagata faila lafoga a le atunu’u.

 

O molimau a le malo sa fesiligia e aofia ai le Teutupe ia Ueligitone Tonumaipe’a, sui o le Ofisa o Lafoga ia Vaaimamao Poufa, ma le sui teutupe ia Keith Gebauer.

 

Na fesili le afioga i le ali’i faipule ia Vailiuama S. Leasiolagi i le mafua’aga e ala ai ona tuai ona maua siaki o lafoga toe fa’afo’i a tagata, ae na tali le Teutupe, e fuafua lava i le maua o le tupe a le malo, ona fa’atoa siani ai loa lea o siaki mo lafoga toe fa’afo’i.

 

Saunoa Vailiuama e fa’apea, e le sa’o le saunoaga a le Teutupe, aua o tupe ia e maua e tagata mai le lafoga, o a latou lava tupe ua ova ona totogi i le malo mo le lafoga, lea ua ua tatau ona toe fa’afo’i mai e le malo.

 

“A tu’u i se isi fa’aupuga faigofie, o tupe uma a tagata faila lafoga o lo o totogi atu i le malo, e tatau ona i ai se teugatupe e fa’aputu ai, a oo la i le taimi e toe fa’afo’i mai ai, ae o lo o i ai pea lava le vaega tupe lea e le o fa’aaogaina, e le tatau la ona tau o fua le malo e saili mai ni isi alagatupe e fa’atupe ai lafoga toe fa’afo’i a tagata,” o le saunoaga lea a Vailiuama.

 

Na ioe le Teutupe i le saunoaga a Vailiuama, peita’i sa ia taua e fa’apea, o pili tupe ia ua fa’aulu e le malo i luma o le Fono Faitulafono, o lo o fa’amoemoe e fa’atupe ai le tele o atina’e ma gaioiga a le malo i le lumana’i, ae aofia ai ma le fa’atupeina o lafoga toe fa’afo’i a tagata, pe afai ae pasia le pili e toe fa’afou ai le fua o lafoga a le malo ina ia tutusa ma le fua o lafoga a le malo tele lea ua i ai nei.

 

Afai ae pasia lenei tulafono, o lafoga uma lava sa totogi i le tausaga fou 2018, o le a maua le fa’aopoopoga i siaki pe a faila i le 2019.

 

Na talosagaina e le afioga i le tama’ita’i faipule ia Vui Florence Saulo le tatau lea ona sui le taimi e amata aloaia ai le tulafono lenei mai le 2018 i le 2017.

 

O le agaga o le tama’ita’i faipule, afai ae sui mai i le 2017 le tausaga e amata ai le suiga o le lafoga, lona uiga o lafoga uma lava o lo o totogi i le tausaga lenei, o le a i ai le fa’aopoopoga i siaki o lafoga toe fa’afo’i pe afai ae faila i le tausaga fou.

 

Saunoa le afioga a Toeaina Faufano Autele e fa’apea, e tataui le malo ona mulimuli ta’i i le tulafono o lo o i ai, e i ai le vaega tupe e $1 miliona e tu’u ese e le malo e fa’atupe mai ai lafoga toe fa’afo’i a le atunu’u, ina ia taofia ai le fiu o tagata e fa’atali a latou lafoga.

 

Saunoa le afioga a Fatulegae’e Palepoi Mauga, o ia fo’i lea o le ta’ita’ifono o le Komiti o le Sailiga o le Tamaoaiga o le malo sa fa’atautaia le iloiloga e fa’apea, e tele naua tupe o lo o i fafo e le o mafai e le malo ona ao mai i totonu, mo se fa’ata’ita’iga o pisinisi o fale mautotogi.

 

Sa ia taua le tatau lea ona i ai ni isi tagata faigaluega e fa’aopoopo i le Ofisa o Lafoga, ina ia galulue e ao mai lafoga i vaega e le o mafai ona maua e le malo, ina ia fesoasoani ai i le atina’e o le malo i le lumana’i.

 

O le agaga o le tulafono e pei ona tu’uina mai e le faigamalo, ia oo atu i le tausaga e 2022 ua tutusa le fua o lafoga a Amerika Samoa ma le fua o lafoga a le malo feterale. O le taimi nei, o lo o fa’aaogaina pea e le malo le fua o lafoga o le 2000, ae o le tulafono e pei ona iloiloina nei, o le tausaga e 2018 ua fa’amoemoe e fa’aaoga ai le fua o lafoga a le feterale e 2004.

 

O le tausaga e 2019 e fa’aaoga ai le fua o lafoga e 2008. O le tausaga e 2020 e fa’aaoga ai le fua o lafoga e 2012. O le tausaga e 2021 e fa’aaoga ai le fua o lafoga e 2016.

 

Na fautuaina e le afioga i le ali’i faipule ia Fagaoatua D. Salave’a le le tatau lea ona tamau e le malo i totonu o le tulafono tausaga e fa’aopoopo i fua o lafoga, ae tatau lava ona fua i le tulaga lelei ma le mautu o le tamaoaiga o le malo i tausaga ta’itasi.

Comment Here