Ads by Google Ads by Google

Fesiligia Faipule le fa’aletonu na tula’i mai i le malae va’alele


[ata: SN]
ausage@samoanews.com

E le i nofo lelei i finagalo o ni isi o afioga i Faipule le fa’afitauli lea na tula’i mai i le malae va’alele i le po o le aso Tofi o le vaiaso na te’a nei, ina ua le ola moli o le auala e sesee ai le va’alele i le taimi na sauni ai le Hawaiian Air e tulau eleele i le malae va’alele i Tafuna.

 

Na taua e le afioga i le ali’i Faipule mai Manu’a ia Vesi Talalelei Fautanu Jr i luma o le maota e fa’apea, ana tula’i mai se fa’alavelave i le po o le aso Tofi na te’a nei, e maliliu uma le silia i le to’a 300 o le pasese sa i luga o le va’alele.

 

“E le o se taimi muamua lenei ua tula’i mai ai ni fa’alavelave matuia faapenei i le malae va’alele. Ua tatau lava ona saili poo ai tonu o lo o mafua ai lenei fa’aletonu. E le tatau ona tatou manatu mama i le mataupu lenei, o lea e aofia ai soifua o tagata aemaise ai i latou e pele i aiga”, o le saunoaga lea a Vesi.

 

E pei ona taua e Vesi i le maota, e to’atele ni isi o lona aiga sa malaga mai ai i le va’a i le po na tula’i mai ai le fa’alavelave. O le latou fa’amatalaga ia te ia, ina ua sauni le va’alele e tulaueleele, sa vaaia e le pailate moli o le auala sese’e o loo pe pe uma. Na fa’ateia le pasese ina ua toe alu i luga le va’alele e aunoa ma se fa’aaliga na tuuina atu e faailoa ai i le pasese le fa’alavelave o lo o tupu.

 

E le i umi ona ta’amilo le va’alele i luga o le ea ae vaaia loa le ola uma o moli, ma mafai ai loa ona aga’i mai i lalo le va’alele ma sese’e loa.

 

O le mae’a ai ona faailoa e Vesi o lenei mataupu i luma o le maota i le vaiaso na te’a nei, na fa’atulaga ai loa le iloiloga ma le Fa’atonusili o le Pulega o Uafu ma Malaevaalele ia Taimalelagi Dr. Claire Poumele i le aso Gafua na te’a nei.

 

E le i taunu’u le iloiloga ina ua le auai atu le fa’atonusili, ma atili ai ona tutupu lagona le fiafia i afioga i Faipule. Na taua e le ta’ita’i o le komiti ia Kitara Vaiau, ua faailoa atu e le Failautusi o le maota o lo o malaga le fa’atonusili i ana fonotaga i fafo, ae o le sui fa’atonusili o lo o i ai i le fonotaga a le kapeneta ma le kovana i le taeao lava lea.

 

E ui o lea ua malolo le fono fa’atoa toe amata ana galuega ia Iulai, a o lea ua finagalo malilie afioga i Faipule o le a fa’aauau pea lava le latou iloiloga pe a toe fo’i mai galuega i le masina o Iulai, ina ia mafai ai ona fa’amanino atili lenei mataupu.

 

Na taua e ni isi o faipule e fa’apea, pau le auala e mafai ai ona foia faafitauli faapenei mai le fa’aauau pea ona tutupu, o le fausia lea o se “control tower” poo se nofoaga e fa’atonutonu ai malaga a va’alele i le malae va’alele i Tafuna.

 

Na toe manatua e afioga i Faipule se tasi o fa’alavelave na semanu e maliliu ai ni tagata i le 2014, ina ua toeititi lava fetoai se va’alele a le Polenisia ma se helicopter i luga tonu o le malae va’alele i Tafuna.

 

Saunoa Kitara e fa’apea, e le mama le mataupu e pei ona atugalu i ai afioga i faipule, ae tatau lava ona latou sailiili i ai ina ia mautinoa e le toe tutupu fa’afitauli faapenei i le lumana’i.