Fesiligia e ni isi o Faipule pili fa’atulafono ai tautua Tausima’i i AS

ausage@samoanews.com

Na avea le tele o fesili na tu’u fesili ai ni isi o afioga i Faipule i le taeao ananafi ma itu na toe suia ai loa le fa’aiuga, ina ia toe taoto le Pili taufa’aofi e fa’atulafono ai galuega fa’atino a Vaega o Tausima’i seia aulia se isi taimi, ae fa’amae’a muamua iloiloga o loo totoe ina ia mafai ai ona fa’amanino vaega o loo tu’u fesili i ai ni isi o afioga i Faipule.

 

O le taeao ananafi na fa’atulaga e faitau fa’alua ai le pili taufa’aofi e Faatulafono ai galuega a Tausima’i i Amerika Samoa, fa’atasi ai ma suiga ua mae’a ona pasia e le Komiti, peita’i ua toe taoto uma nei fuafuaga seia mae’a le iloiloga lea ua toe fa’atulaga i le vaiaso nei, lea o le a molimau ai le Pulesili o le LBJ ia Taufete’e John Faumuina ma sui o le Komiti Fa’afoe o loo iloiloina agava’a o foma’i (Health Regulatory Board) mo le tuuina mai o so latou lagona e uiga i lenei tulafono.

 

O iloiloga e lua ua mae’a ona fa’ataunu’uina e le Komiti o le Soifua Maloloina o loo taitai ai le afioga i le ali’i faipule ia Vesi Talalelei Fautanu Jr, sa molimau ai sui o Tausima’i i le atunu’u, e aunoa ma se sui o le Komiti Fa’afoe poo se sui o le LBJ na fa’atasi atu i ai, e ui sa tu’uina atu i ai le valaaulia e pei ona fa’amaonia e Vesi i luma o le maota.

 

O le afioga i le faipule ia Vaetasi Tuumolimoli Saena Moliga na tula’i ma talosagaina le pili ina ia toe taoto atu i le komiti, ona o loo i ai molimau e tatau ona fesiligia muamua, latou te fa’amaninoina ni isi o mataupu e tatau ona fa’amalamalama.

 

O ia molimau e pei ona saunoa Vaetasi e aofia ai le Pulesili o le LBJ, Foma’i Sili, atoa ai ma le Komiti Faafoe latou te iloiloina agava’a o foma’i mai fafo, mo le tuuina mai o se latou fautuaga e tusa ai o le pili taufa’aofi, ona o loo i ai ni isi o vaega e le o manino lelei mai i totonu o le pili.

 

O ni isi o ia vaega e pei ona saunoa Vaetasi, o loo taua i le pili le mafai e le Asosi o Tausima’i ona fa’a faigaluega tagata faigaluega, peita’i o le isi fo’i lena tiute o le Komiti Fa’afoe, o le fa’a faigaluegaina lea o foma’i, ina ne’i fete’ena’i tiute a le Komiti Fa’afoe ma le Asosi o Tausima’i ona avea lea ma fa’aletonu o le tulafono.

 

O le isi tulaga na fa’amanino e Vaetasi, o tulaga i le teuina o tupe a le Asosi o Tausima’i, ona o loo atagia i le tulafono le teuina lava e i latou o a latou tupe, peita’i o lea ua manino le fautuaga a le afioga i le ali’i kovana ua tu’uina atu i Faatonusili uma o matagaluega a le malo, e tasi lava le teutupe a le malo, o ia fo’i lea na te teuina uma tupe maua a le malo.

 

Na lagolagoina e le afioga a Vailoata Eteuati Amituana’i ma Gafatasi Afalava le finagalo o Vaetasi, ma talosagaina ai le toe taoto teisi o le pili se’i fa’amae’a muamua le iloiloga o loo fautuina, ina ne’i avea tulaga o loo taua ma itu e afaina ai le taua o lenei tulafono taufa’aofi.

 

Ae na fa’amanino e le afioga a Vesi e fa’apea, o fesili uma e pei ona toe fesili ai afioga i Faipule, o fesili uma ia sa fesiligia ai sui o le Asosi o Tausima’i i iloiloga e 2 sa fa’ataunu’uina, ma ua mae’a fo’i ona tu’uina mai la latou fautuaga.

 

Na fa’amanino atili e Vesi e fa’apea, e le o i ai se tulaga e fete’ena’i ai le pili o loo i luma o le komiti ma tiute tauave a le Komiti Fa’afoe ma le falema’i o le LBJ e pei ona atugalu i ai ni isi o faipule.

 

Saunoa atili le sui fofoga fetalai ia Fetu Fetui Jr e fa’apea, o le tiute lava ia o le Fono Faitulafono, o le fausia lea o tulafono mo le manuia o le atunu’u, e le fa’alagolago le fausiaina o tulafono i ni manatu e tuuina mai i itu eseese o le malo poo ai lava, ae fa’alagolago lava le fausiaina o tulafono a le fono i fautuaga a loia atoa ai ma le silafia ua tuuina atu e le Atua ia i latou ua filifilia e avea ma faipule o itumalo taitasi.

 

E ui i le taumafai atu o Vesi ma Fetui Jr e una’i le pili ina ia fa’apasia suiga atoa ai ma le faitauga fa’alua, peita’i na manumalo le fautuaga ina ia taoto le faitauga fa’alua ae fa’atulaga le iloiloga e pei ona fautuaina, ma ua fuafua ai loa le aso Tofi o le vaiaso nei, e fa’ataunu’uina ai le iloiloga ma sui o le LBJ faapea ai totino o le Komiti Fa’afoe e fa’a faigaluegaina foma’i, mo le tuuina mai o sa latou finagalo e tusa ai o lenei tulafono taufa’aofi.

Comment Here