Fesiligia e Faipule mafua’aga taofi ai le talanoaina Paketi a le Fono

ausage@samoanews.com

Na tau tula’i mai ni lagona le fiafia o ni isi o afioga i Faipule e aofia ai ma le afioga i le Fofoga Fetalai i le vaiaso na te’a nei, ina ua maoaluma mai e auai i le iloiloga o le paketi a le Fono i le aso Faraile na te’a nei, ae taunu’u atu ua faia e le maota maualuga le faaiuga e taofi ai le iloiloina o le paketi a le Fono, se’i toe taliu mai i le atunu’u le afioga i le Peresetene o loo malaga i fafo.

 

Ona o lea tulaga, na lafo ai e le afioga i le Fofoga Fetalai ia Savali Talavou Ale sana saunoaga i afioga i Senatoa e fa’apea, “e le fai to’atasi e le maota maualuga fa’aiuga a le fono i tulaga o lana paketi.”

 

O le saunoaga lea a Savali na mafua ai ona tula’i le afioga i le ali’i Senatoa ia Faiivae Iuli Godinet i le taeao ananafi i le taimi o folafolaga a le maota maualuga, ma ia fa’aleo lona finagalo fa’anoanoa ona o le saunoaga a le fofoga fetalai.

 

Saunoa Faiivae e fa’apea, o lo o manino ma sa’o le mafua’aga ua ala ai ona tolopo le iloiloga o le paketia le fono, e le mafai ona fesiligia e le Komiti Soofaatasi na o le Fofoga Fetalai, ae tatau ona i ai ma le Peresetene o le Senate, o laua uma ia o ta’ita’i o le Fono.

 

Na taua e Faiivae e fa’apea, e le i nofo lelei ia te ia le saunoaga na lafo atu a le fofoga fetalai, ona e i ai lona talitonuga, e tatau lava ona seu le manu ae taga’i i le galu e pei o muagagana a le atunu’u, ona o lo o afifio atu i le maota maualuga tupu ma tamali’i o le atunu’u.

 

Sa taua atili fo’i e Faiivae le tatau lea ona fesootai le sui peresetene o le maota maualuga ma le fofoga fetalai, mo le saolaupule atili o le mataupu ina ia taofia ai tulaga faapenei e ono tula’i mai.

 

Na lagolagoina e le sui peresetene o le maota maualuga, afioga Nuanuaolefeagaiga S. Nua le saunoaga a Faiivae e tusa ai o lenei mataupu. Sa ia taua fo’i le le mafai ona aveese i lona manatu i le saunoaga a le fofoga fetalai na lafo atu ia te ia ma le maota i le vaiaso na te’a nei, ma ia taumafai ai lava e mafaufau i se faaiuga tonu e tatau ona faia.

 

Na taua e le afioga i le ali’i senatoa ia Magalei Logovi’i, o ia fo’i lea o le taitaifono o le Komiti Soofa’atasi o le Paketi a maota e lua e fa’apea, o loo manino ma malamalama le mafua’aga ua ala ai ona toe tolopo le iloiloina o le paketi a le Fono, ona e le o i ai le peresetene e tatau ona to’alua ma le fofoga fetalai i le taliina o fesili.

 

Na faailoa e Magalei i luma o le maota e fa’apea, ina ua faasea atu le fofoga fetalai ia te ia i le aso Faraile na te’a nei ina ua le taunuu le iloiloga, sa ia faailoa i ai, e le o se matafaioi lena a ia o le ta’ita’i komiti o le faia o ni faaiuga, o le tiute na a taitai o le fono.

 

Saunoa atili Magalei e fa’apea, na faateia o ia ina ua oo i le taeao ananafi, ae toe faaoo atu ia te ia le faaaliga fai mai, o loo mana’o le fofoga fetalai na te sainia loa le paketi ma faagasolo tulaga mo le pasiaina o le tupe faasoasoa.

 

“O la’u tali na ave i le tagata na aumaia le faaaliga, fai i le fofoga fetalai ou le sainia se pili e faapasia ai le paketi,” o le saunoaga lea a Magalei.

 

Sa ia taua atili foi i luma o le maota e faapea, “Ou te le manao e fa’atonu mai e le maota o sui galuega fa’atino a le maota lenei. Ia malamalama lelei le fofoga fetalai ma le maota o sui, o le maota lenei o Tama o le atunu’u, aua le taaia fa’a fala tulaga o galuega, ae ou te lagolagoina le faaiuga ua faia, taoto le paketi sei afio mai le peresetene o le Senate.”

 

Saunoa le afioga Fonoti T. Aufata e fa’apea, na pasia e le Fono le tulafono na ave i le Kovana, e le talia ai ni sui faatonu e oo mai e molimau i luma o le fono mo le paketi. I lona talitonuga, o le faaiuga foi lena e tatau ona aofia ai ma le paketi a le fono. E le tatau ona molimau ai fua ni sui taitai, se’i vagana ta’ita’i o le Fono, ona paleni lea ma talafeagai le tulafono ua faataoto e le fono.

 

Ae pei ona silafia, o le aso Faraile na te’a nei na fa’atulaga e faamae’a ai le iloiloga o le paketi a le malo e le Fono Faitulafono, e ala i le talanoaina ai o le paketi a maota e lua.

 

O le mae’a ai o le tauaofiaga masani a le maota o sui, na aga’i uma atu ai loa afioga i Faipule i le Fale Samoa o lo o faatino ai galuega a le Senate mo le iloiloga o le paketi.

 

Na faateia le toatele o faipule ina ua amata ona aga’i atu e saili ni o latou nofoa e alala ai mo le iloiloga o le paketi a le fono, ae latou molimauina afioga i Senatoa ua amata ona aga’i taitasi atu i o latou ta’avale o le a aga’i i o latou aiga, ma mafua ai loa ona fesiligia le tulaga o le paketi, ae fa’ailoa ane i ai e afioga i Senatoa, o le iloiloga lea ua tolopo sei taliu mai i fanua le malaga a le peresetene, le afioga Gaoteote Palaie Tofau.

 

Na taua e  ni isi o afioga i faipule i le Samoa News o latou lagona faanoanoa, ina ua fai to’atasi lava e le maota maualuga le fa’aiuga e aunoa ma le logoina atu o le maota o sui.

Comment Here