Fesiligia atunu’u le lelei o le aufusu a Samoa na aumai ta’amilosaga fu’a


Peresetene o le Asosi o Fusuaga a Amerika Samoa ma Samoa, afioag Toleafoa Henry Tavake (itu agavale) ma Leituala Tapusoa Fifita (itu taumatau) o Samoa. [ata AF]

Sui Palauni o Amerika Samoa ina ua manumalo i le fusu o le aupaga o le light heavyweight, fa’atasi ai ma le ali’i laufali mai Samoa sa fa’atautaia le fusuaga ia Pio Folesi ma lana faiaoga ia Toleafoa H. Tavake. [ata AF]
ausage@samoanews.com

O le tulaga fa’aletonu sa i ai taumafaiga a le aufusu mai Samoa lea na aumai e fa’afetauaia le malosi o le aufusu a Amerika Samoa, mo le ta’amilosaga o le fu’a sa tauninio ai i le Ipu a le Kovana fa’apea ai le Fusi o le aupaga o le light heavyweight, na mafua ai ona tele fesili mai le mamalu o le atunu’u i le tulaga malosi ma le lelei o le aufusu a Samoa sa filifilia mai mo lenei fa’amoemoe.

 

Na taua e ni isi o le atunu’u ua iloa i le ta’aloga o le faipele i tausaga ua mavae e faapea, o le aufusu mai Samoa lea na aumai e fa’afetauia le malosi o le aufusu a le atunu’u, e lei malaga mai ai alii fusu lelei ma lauiloa a Samoa o loo i ai i le taimi nei, ae foliga mai sa fili mai lava i le isi vaega e i lalo ifo o le vaega lelei ma malolosi o loo i ai i le taimi nei.

 

“O la’u vaai fa’a tagata fusu i le aufusu mai Samoa lea na aumai i le ta’amilosaga o le fu’a, e le o aumaia ai a latou tama fusu lelei o lo o i ai, ae o tama fusu lelei na sa tatau ona aumai e Samoa mo le ta’amilosaga lenei, e le gata ia mafai ai ona latou fa’ato’ilaloina le malosi o le aufusu a Amerika Samoa, ae fa’amalieina ai fo’i le mailoa a le atunu’u ma sikuea ai tupe a tagata o loo totogi”, o le saunoaga lea a le susuga ia Aviu Lomitusi, 54 tausaga o Nu’uuli, o se tasi o alo tuai o Samoa sa fai ma sui o le atunu’u i le tele o ta’amilosaga a le Pasefika, ao lea ua aumau i Amerika Samoa nei.

 

Na taua e Lomitusi e fa’apea, e masani ona malaga i Samoa ma maua ai le avanoa e matamata ai i le tele o tama fusu lelei o loo i ai i Samoa i le taimi nei, o tama fusu fo’i na o loo naunau Amerika Samoa e fia maimoa i ai.

 

Mai paga e 10 sa fa’agasolo i le Taamilosaga o Fusuaga Fa’avaomalo mo le fu’a i lenei tausaga, e 5 fusuaga mo paga amata (amateur), 5 fo’i paga mo fusuaga fa’apolofesa. Na faiaina uma tama fusu fa’apolofesa a Samoa na aumai e to’a 5, se’i vagana ai manumalo e 2 na maua i fusuaga amata (amateur), ma toe manumalo ai loa Amerika Samoa i le Ipu a le Kovana, toe manumalo i le Fusi o le aupaga o le light heavyweight lea sa taualuga i ai le ta’amilosaga i le va o Sui Palauni o Amerika Samoa ma Michael Fonoti o Samoa, ina ua le mafai e le susuga a Fonoti ona fa’aauau le fusuaga i le ta’amilosaga lona 4 mai ta’amilosaga e 8 o le la fusuaga, ina ua manu’a lona lima taumatau ma taofia ai loa e le ali’i laufali ia Pio Folesi o Samoa le ta’aloga, ae tu’uina atu le manumalo ia Palauni.

 

O le manumalo ai o Palauni i lana fusuaga i le vaiaso na te’a nei, ua tula’i mai ai ana manumalo e 2-0 i ana fusuaga fa’apolofesa e 2 ua mae’a.

 

Na taua e ni isi o le mamalu o le atunu’u e fa’apea, e lei fa’amalieina i latou i le tulaga sa i ai le ta’amilosaga, ona e foliga mai sa itu tasi le fa’atautaiga o le fusuaga, i le malosi lea o le aufusu a Amerika Samoa nai lo le aufusu a Samoa.

 

“O la’u vaai e foliga mai o tama fusu lona lua ia a Samoa sa aumai i le ta’amilosaga o le fu’a, ae na mafua ona fa’aalu le tupe e matamata ai lo’u aiga i lena po o le fia matamata lea i se aufusu lelei mai Samoa e fa’afetoaia le malosi o le aufusu a Amerika Samoa”, o le saunoaga lea a le susuga ia Leilua Aviata o Tafuna.

 

“E pei lava o fusuaga fa’avaomalo a le pasefika ma le lalolagi, e le filifilia i ai se tagata lona lua poo se tagata e lei lava sauni, ae filifilia i ai le tagata e sili ma lelei, ma le tagata fusu ua matua atoatoa lana tapenaga, ae o la’u vaai fa’atagata matamata i lea po, e foliga mai na malaga mai le aufusu a Samoa e fa’ataunu’u le fa’amoemoe, ma ua foliga mai ua gau le au matamata i lena po”, o lagona fa’aalia lea o le afioga a Leilua i le Samoa News.

 

O le fesili pe sa lelei ma sa’o le filiina mai o le aufusu a Samoa na aumai i le ta’amilosaga o le fu’a na mavae atu nei, na mafua ai ona fesiligia e le Samoa News le Ta’ita’i o le au malaga mai Samoa, afioga Leituala Tapusoa Fifita i sona finagalo e uiga i lenei mataupu.

 

Saunoa Leituala e faapea, o le aufusu a Samoa sa auina mai i le ta’amilosaga o le fu’a, “o le aufus pito sili lea ona lelei” sa i ai.

 

“E eseese Asosi o Fusuaga i Samoa i le taimi nei, e ese le Asosi o Fusuaga lea o loo matou galulue ai, ese fo’i le Asosi o Fusuaga a Samoa (Samoa Amateur Boxing Association - SABA) lea o loo peresetene ai le afioga ia Vaaiga Tu’igamala, atonu o loo i ai ni a latou tama fusu lelei ma sili atu nai lo la matou Asosi, ae o le matou Asosi Fusu lava ia, o le au pito sili lea ona lelei sa filifilia mai e fa’afetauia le malosi o le aufusu a Amerika Samoa”, o le saunoaga lea a Leituala.

 

Na fa’amalulu le afioga a Leituala i le tapuaiga a le atunu’u fa’apea ai Upolu ma Savaii sa maua le avanoa latou te maimoaina ai le fusuaga i lea afiafi, i se tulaga sa i ai taumafaiga a alo o le atunu’u mai Samoa.

 

“O le mea moni lava ia i la’u vaai fa’a faiaoga ma tagata fusu, na mafua ona manumalo le aufusu a Amerika Samoa, e le gata i le lelei ma lava tapena, ae sa matua sauni lava i latou e puipui le latou siamupini, ae mo Samoa, o le mea sili sa matou taumafai i ai, ae afai ua le tini le fa’amoemoe, fa’amalulu atu Samoa ua pau o se taumafaiga vaivai”..

Comment Here