Ads by Google Ads by Google

Fesiligia Asiasi Aoga ona o tulaga fa’aletonu o faleaoga i Manu’a


Saini a le aoga tulaga muamua i Olosega, Manu’a. [ata AF]
ausage@samoanews.com

O tulaga fa’aletonu e pei ona i ai faleaoga i Manu’a a o lea ua toe amata aoga a le fanau mo le tausaga aoga fou lenei 2017/2018, ua fesiligia ai e le ali’i Faipule mai Manu’a #2, afioga Toeaina Faufano Autele galuega a i latou ua taua o Asiasi Aoga a le malo o lo o faia, a o lea o lo o tula’i mai pea fa’aletonu i aoga a le itumalo.

 

Saunoa Toeaina i le taimi o folafolaga a le maota o sui i le taeao ananafi e fa’apea, o se vaaiga fa’anoanoa sa ia molimauina i le taimi o lana asiasiga i le vaiaso na te’a nei, i le tele o fa’aletonu o lo o tula’i mai i faleaoga i Manu’a.

 

“Sa ou maitauina i la’u asiasiga, pe tusa ma le 10 potu aoga e leai ma ni loka, ona ua talepe ma fa’aleaga e tagata, e o o i fale taele mo faiaoga, e leai ni faitoto’a ae fa’aaoga ie e fai ma faitoto’a, o foliga o faleaoga e matua mataga lava, e le i toe oo ai lava se vali, ae o lea o lo o i ai Asiasi Aoga ua uma ona tofia e le malo e gafa ma le asia lelei o faleaoga,” o le saunoaga lea a Toeaina, o ia fo’i o se ali’i faiaoga.

 

Sa ia taua fo’i e fa’apea, “Ua ou fa’alogo e fai lava si tetele o totogi o tagata nei o lo o tofia e fai ma Asiasi Aoga, ae foliga mai e leai ma se galuega o faia. E le gata latou te asiasia aoga i Tutuila nei, ae tatau fo’i ona oo atu la latou vaai i aoga i Manu’a.”

 

Saunoa atili le afioga i le ali’i faipule e fa’apea, e tatau ona asia muamua e le Ofisa o Aoga ma i latou ua faaigoaina o Asiasi Aoga faleaoga uma lava i le taimi a o tuua aoga, ina ia lava ma totoe le taimi e fa’atino ai galuega e manaomia le fia faia, nai lo le fa’atalitali lava seia oo i le aso e toe a’e ai aoga, ona fa’atoa toe tulioso atu lea ae ua tuai.

 

Na fa’ai’u le saunoaga a le ali’i Faipule i lona talosagaina lea o le Komiti o Aoga a le maota o sui, ina ia silasila toto’a i fa’aletonu e pei ona tula’i mai i aoga i Manu’a, ona o tulaga fa’aletonu e pei ona maitauina e lagona ai le momomo o le loto ma le alofa, pe a vaavaai atu i le fa’aletonu o vaega o lo o a’oa’oina ai nai fanau aoga i le Itumalo i Manu’a.

 

Na lagolagoina e le ali’i Faipule mai le itumalo o Sale, afioga Kitara Vaiau le mataupu e pei ona saunoa i ai Toeaina, ona o tulaga fa’aletonu fo’i ia o lo o maitauina i le aoga tulaga muamua e tasi i Aunu’u.

 

Saunoa Kitara e fa’apea, o le fa’afitauli numera tasi o lo o tupu i le aoga i Aunu’u, e le o i ai se pa e si’omia ai le lotoa, ma ua avea lea ma tulaga ua faigofie ai i tagata ona ulufale i totonu o le lotoa ma faleaoga, ma latou fa’aleaga meatotino, ua oo lava i meaai o lo o fuafua e fafaga ai fanau aoga ua o atu tagata ua la’u i aiga ma ‘ai.

 

O lana fautuaga e pei ona tuuina atu i luma o le maota o sui, e tatau ona fautuaina le Faatonusili o aoga ina ia fausia ni pa e siomia ai lotoa a aoga.

 

Na faafetaia e le taitai o le Komiti o Aoga a le maota o sui, afioga Vaetasi Tuumolimoli Saena Moliga finagalo fa’aalia a afioga i faipule e to’alua, ona o iina e atagia mai ai le faipule o lo o fai lana galuega e asiasi i faleaoga a lona itumalo.

 

Sa ia toe faamanatu i le maota le iloiloga ma le Faatonusili o Aoga i le taeao o le aso Tofi o le vaiaso nei, lea o le a mafai ona tali ai uma fesili ma atugaluga e pei ona saunoa i ai afioga i Faipule.

 

I le mataupu e pei ona talosagaina e Kitara mo se pa e siomia ai le aoga i Aunu’u, o le vaiaso na te’a nei na pasia ai e le maota maualuga sa latou pili e fa’asala ai se tagata e maua i totonu o lotoa o aoga a le malo, mai le taimi o le 10:00 i le po e oo atu i le 5:00 i le vaveao.

 

O le agaga o lenei tulafono, ia ia taofia ai le tula’i soo mai o fa’aletonu i le fa’aleagaina lea o faleaoga a le malo ma ave fa’agaoi meatotino i totonu.