Fesiligia to’atele tagata faigaluega Fono tulaga fausiaina o le Fale Fono fou


Foliga matagofie o le maota fono a le atunu’u ua silia i le 40 tausaga talu ona fausia, e le o toe umi se taimi ae tatalaina loa i lalo ma le fa’amoemoe e fausia ai le maota fou fono a le atunu’u. [ata AF]
ausage@samoanews.com

Ua fa’aalia e ni isi o tagata faigaluega a le Fono Faitulafono lo latou fesiligia o le tulaga tonu o lo o taoto i ai fuafuaga a Ta’ita’i o le Fono, mo le fausiaina lea o le maota fono a le atunu’u ua tele masina o taulagi mai.

 

E mafua lea tulaga ona sa taua e ni isi o i latou i le Samoa News i le masina na te’a nei, le mae’a lea ona tu’uina atu o le fa’aiuga a le Komiti e iloiloina pemita mo galuega fou a le malo (PNRS), e fa’aalia ai le le pasiaina o le galuega mo se fale fono fou i le nofoaga tuai o lo o i ai le maota fono tuai i le taimi nei, ona o ni isi o tulaga e fesootai i le saogalemu ma le malu puipuia o le galuega.

 

E lei manuia taumafaiga a le Samoa News mo le sailia mai lea o ni fa’amatalaga ma ta’ita’i o le fono faitulafono e uiga i lenei mataupu.

 

Na taua e ni isi o tagata faigaluega a le Fono i le Samoa News e fa’apea, e ui o lea ua taoto le fautuaga mai le PNRS e fa’aalia ai le le pasia o le fausiaina o le galuega, ae o lo o vaaia pea lava taumafaiga ina ia fa’aauauina pea le fausiaina o le galuega.

 

O le aso Faraile na te’a nei na molimauina e tagata faigaluega a le Fono ma le atunu’u le masini a le Pulega o le Eletise ma le Suavai (ASPA), o fa’aaoga e vili ai le palapala mo taumafaiga e saili le mafiafia o le palapala ina ia mautinoa e malosi ma mautu le fa’avae o le fale.

 

Sa molimauina e le Samoa News le pa mai i luga o le suasami ina ua vili le u’amea o le masini i lalo, ma taua ai e se tasi o ali’i faigaluega a le ASPA e le fa’atagaina ona ia talanoa i mataupu faapea sa i ai i lea taimi i le Samoa News, le le saogalemu o le nofoaga mo le fausiaina ai o se galuega tele e pei o le maota fono fou o lo o fuafua a le atunu’u, ona e le o malosi le palapala na te lagolagoina le fa’avae o se fale fou.

 

Na fa’amaonia mai e se sui o le Komiti a le PNRS i le Samoa News le mae’a lea ona iloiloina o le talosaga mo le fausiaina o le maota fono fou, ma ua faia fo’i le fa’aiuga e teena ai lea galuega, ona e le saogalemu le nofoaga o lo o fuafua e fausia ai le galuega.

 

O le pine fa’amau o le tulaga le saogalemu o le nofoaga mo le fausia ai o se fale fono fou e pei ona fa’aalia e ni isi o tagata faigaluega a le Fono i le Samoa News, o le fa’avae o le Fale Fogafalelua a le Fono lea e le i leva ona tatala, o lo o vaaia ai se tulaga fa’aletonu i le taimi nei, i le ta’e uma lea o le isi vaega o le sima o le fa’avae.

 

O molimau sa tu’uina mai e tagata faigaluega a le Fono i le taimi na fausia ai lea galuega, sa maitauina ai le puna mai o le suasami i luga i le taimi a o fa’agasolo galuega mo le tu’iina o le fa’avae o le fale.

 

Na taua e se sui sinia o le Fono Faitulafono i le Samoa News e fa’apea, o le la’asaga lea ua i ai le galuega, o le taumafai lea e fua le mafiafia o le palapala mo le fausiaina ai o le fa’avae o le galuega.

 

Ae ina ua fesiligia lea sui sinia pe ua maua se konekerate e fausiaina le galuega, na ia taua ai e fa’apea, “e le o mautinoa le tulaga lena i le taimi nei, pau le tulaga lea o lo o matou galulue i ai ma Ta’ita’i o le Fono, o le fa’atino lea o la’asaga ta’itasi mo le galuega”.

 

Ina ua fesiligia e le Samoa News le sui sinia pe moni ua teena e le PNRS le fausiaina o le maota fono, na soisoi lea ali’i ma toe fesili mai e fa’apea, “O ai na faia na tala ..”.

 

Na fa’aalia e le afioga i le ali’i Kovana ia Lolo Matalasi Moliga i se tasi o fonotaga a le Kapeneta e le i mamao atu, o le fa’aiuga o le masina o Novema o le tausaga nei o lo o fa’amoemoe e sua ai le palapala ma fa’apaia ai loa le amataina o le galuega mo le fausiaina lea o le maota fono.

 

O le masina na te’a nei o Me na amata ai ona fa’agasolo galuega mo le tatalaina o vaega o le fale fono tuai o lo o i ai, lea ua silia i le 40 tausaga talu ona fausia, e sauni ai mo le amataina o le galuega fou, lea ua fuafua e fa’aaoga i ai le $1.5 miliona le tupe mai le Pone a le malo e fausia ai.

Comment Here