Ads by Google Ads by Google

Feau fa’apitoa mai le Fa’amasinoga mo le Komesina o Leoleo


Le afioga i le Komesina o Leoleo, tofa Le’i Sonny Thompson. [ata AF]
ausage@samoanews.com

O le taeao ananafi na tu’uina atu ai e le afioga i le ali’i Fa’amasino ia Fiti Sunia se feau taua mo le Komesina o Leoleo, i auala e fa’atinoina ai e leoleo a latou tiute i lalo o le tulafono.

 

Afai e silafia e le Leoleo e le lava mau e lagolagoina ai se moliaga fa’asaga i so o se tagatanu’u, e le tatau ona taofia lena tagata i totonu o le falepuipui, aua a malama ane le taeao ae auina atu lea tagata i le fale fa’amasino, o le a fa’aulu e le malo le talosaga e tatala ai lea tagata i tua e aunoa ma se tagi e faia fa’asaga ia te ia, ona alu ai lea o le taimi o le fa’amasinoga ma ana meatotino, ae o lo o i ai lava auala e mafai ai ona foia tulaga fa’apenei i tua.

 

Na pau le tulaga e o o  ai, o le i’u ina tu’uina atu ai se samania i le Komesina e o o atu ai i le fa’amasinoga mo le fa’amaninoina atili o nei ituaiga mataupu.

 

O ia saunoaga mai le afioga a Sunia, na tu’u sa’o atu lea i le loia a le malo ia Woodrow Bengelly i le taeao ananafi, i le taimi na iloiloina ai e le fa’amasinoga le mataupu a le ali’i o Henry Nomura.

 

O Nomura na taofia fa’apagota e Leoleo mai Lauli’i i le po o le aso Lulu, ona o tu’uaiga i lona save’uina lea o le filemu i totonu o lona aiga, ma taofia ai loa o ia i le toese i Tafuna e fa’atali ai taualumaga a le fa’amasinoga fa’aitumalo i le taeao ananafi.

 

Ae ina ua valaau le mataupu a Nomura i luma o le fa’amasinoga, na fa’ailoa ai e le ali’i fa’amasino ia Sunia i lenei ali’i, le leai o se tagi a le malo fa’asaga ia te ia, ae o le a toe tatala o ia i tua, sei vagana ai lana sala tuai e $35 e le i totogiina i le fa’amasinoga, e mafua mai i lona le usitaia o tulafono o le alatele na fautuaina o ia e le ali’i fa’amasino e totogi.

 

A o aga’i atu Nomura i fafo ma le potu fa’amasino, na fa’aaoga ai loa e Sunia le taimi lea e fa’ailoa ai i le loia a le malo atugaluga o le fa’amasinoga e uiga i ituaiga mataupu fa’apenei, o le loka lea e leoleo o le tagatanu’u i le falepuipui i le po atoa, e ui o lo o iloa lelei lava e le leoleo e le o lava mau e lagolagoina ai le tagi fa’asaga i lea tagata.

 

E talitonu le Samoa News, o le leoleo sa ia taulimaina le mataupu a Nomura, o se tasi lea o leoleo fou fa’atoa fa’au’u mai i le Vasega lona 25 a Leoleo lea na fa’atautoina i le amataga o le masina nei.

 

O le vaiaso foi na te’a nei na tula’i mai ai se isi mataupu faapea i luma o le fa’amasinoga fa’aitumalo, lea fo’i na momoli ai e Sunia se feau faapitoa i le ali’i Komesina, e mafua mai i pepa sala (tickets) o lo o saini e leoleo ma tu’u i luma o tioata o ta’avale a ni isi o tagatanu’u o le atunu’u..

 

Mai lea mataupu, na fa’ailoa ai e Sunia i le ali’i leoleo sa ia tusia pepa sala e 5 sa fesiligia, ona e le o i ai se igoa o le ave ta’avale i luga o le pepa sala poo se saini fo’i a le ave ta’avale, susuga a Amani Fatuesi, ina ia fa’ailoa i lona pule, e tatau ona tu’uina atu pepa sala nei i ave ta’avale ae le o luma o tioata o a latou ta’avale.

 

Na manino foi i le saunoaga a Sunia le leai o se tulafono e tu’uina atu ai ni pepa sala ma fa’ata’atitia i luma o tioata o ta’avale a tagatanu’u, e aunoa ma le silafia e le ave ta’avale sa ia fa’afoeina lea ta’avale.