Fautuaina Toeaina tatau lea ona fa’avae se Komiti Su’esu’e a le Fono


Le va’a a le malo, le Fo’isia sa goto i le uafu o va’a faila, lea ua na toe toso a’e i luga i le vaiaso na te’a nei i le silia ai i le 3 masina o goto i le sami. [ata AF]

 

O tulaga fa’aletonu e pei ona molimauina i ni isi o meatotino a le malo sa fa’aalu ai le faitau afe ma afe tupe a le malo e fa’atau mai ai i tausaga ua mavae, a o lea ua fa’atau tia’i ina ua leaga ma le toe aoga, ma ua atagia mai ai le gau o le malo ona o nei tulaga, na talosagaina ai e le afioga i le ali’i Faipule mai Manu’a #2 le alaga tatau ona fa’avae le Komiti Su’esu’e a le Fono, e galulue i le su’esu’eina o nei mataupu.

 

Na taua e le afioga a Toeaina Faufano Autele lona vaai ma le fa’anoanoa i le tulaga ua o o i ai le va’a a le malo o le Fo’isia, lea ua ia maua tala sa fa’atau i le $2 i le taimi o le fa’atau tu’i a le malo e le i leva atu, ae o le va’a sa fa’aalu ai e le malo tupe e tele e fa’atau mai ai.

 

“Ua ma’imau lenei va’a ma tupe na fa’aalu ai ae leai ma se aoga i le malo aemaise ai le itumalo o Manu’a na ala ai ona fa’atau mai lenei va’a,” o le saunoaga lea a Toeaina.

 

“Ua ou maua fo’i tala ua mae’a fo’i ona fa’atau ese atu lagisi a le malo sa i ai i le fa’atau tu’i lea na fa’atoa mae’a atu, i le tau e $500, ae o lagisi na fa’atau mai i le $500,000. Ou te iloa o isi nei tulaga ua tatau ona silasila toto’a i ai le Fono, ae i lo’u lava taofi, ua o o i le taimi ua tatau ai ona fa’avae le Komiti Suesue a le Fono, sei tau saili nai tulaga ua mafua ai nei fa’aletonu.”.

 

Na lagolagoina e ni isi o Faipule le tatau lea ona faia se sailiiliga i le mafua’aga ua fa’aletonu ai meatotino sa fa’atau mai e le malo i nofoaiga ua mavae atu.

 

I le silia ai i le 3 masina o goto le va’a o le Fo’isia i le uafu o va’a faila i le Malaloa Marina, o le vaiaso na te’a nei na toe toso a’e ai i luga le va’a, e le pule a le kamupani a le PJ Corporation, susuga Iupeli Kava.

 

Na taua e Iupeli i le Samoa News le mae’a lea ona ia fa’atauina mai o le va’a o le Fo’isia i le fa’atau tu’i a le malo sa faia i le masina na te’a nei.

 

O le va’a o le Fo’isia na fa’atau mai i le tausaga e 2009 i le taimi o le nofoaiga a Kovana Togiola Tulafono i le tau e silia i le $300,000.

 

O lagisi e 2 e pei ona fesiligia e Toeaina, sa fa’atauina mai fo’i i le taimi o le nofoaiga a Togiola. E le o iloa i le taimi nei po o fea lea ua toso aga’i i ai lagisi.

 

O le maota maualuga a le Senate e fa’atautaia le Komiti Su’esu’e (Senate Investigating Committee - SIC), lea e su’esu’eina ai mataupu o lo o fa’aletonu i totonu o le faigamalo.

 

O le tausaga e 2012 i le fa’aiuga o le nofoaiga lona 32 a le Fono Faitulafono na gata mai ai le tofiaina o le Komiti Su’esu’e a le Senate, e le afioga i le ali’i Peresetene ia Gaoteote Palaie Tofau.

 

O lea Komiti sa ta’ita’ia lea e le afioga a Lualemaga E. Faoa, atoa ai ma totino e to’a 6 sa filifilia e galulue i le Komiti Su’esu’e.

 

Saunoa Toeaina e fa’apea, e ui i le pisi o le Fono Faitulafono i le taimi nei i le iloiloina o le tele o galuega, e aofia ai le paketi a le malo mo le tausaga tupe fou 2018, atoa ai ma pili tupe a le malo o lo o fa’agasolo i le taimi nei iloiloga, ae tatau lava ona silasila toto’a ta’ita’i o le Fono i le fa’avaeina loa lea o se Komiti Su’esu’e e gafa ma le sailiina mai o tali i le tele o mataupu o lo o tu’u fesili ai le atunu’u.

Comment Here