Ua tu’uina mai e le Komesina o le Ofisa o Palota se fautuaga i tagatanu’u uma o Amerika Samoa, ua mae’a ona lesitala mo le faiga palota a le atunu’u mo lenei tausaga 2016, ina ia tautuana ma i latou e tatau ona palota uma i le taeao nei.

O le itula e 6:00 i le taeao nei lea ua fa’amoemoe e tatala aloaia ai nofoaga fai palota e 44 i totonu o le atunu’u, ma tatala atu ai lava mo le isi 12 itula, fa’atoa tapunia i le itula e 6:00 i le afiafi.

Na taua e le Komesina o Palota ia Uiagalelei Dr. Lealofi Uiagalelei e fa’apea, mai le tusa i le to’a 17,339 le aofa’i o tagata ua mae’a ona lesitala mo le faiga palota o lenei tausaga, e aofia ai ma le silia i le 1,000 i latou ua mae’a ona fa’atinoina a latou palota, e ala i palota sa faia lava i le atunu’u atoa ai ma palota mai ia i latou o lo o alala i fafo atu o Amerika Samoa (absentee ballot).

E pei ona silafia, o le taeao nei, Novema 8, 2016 ua fa’atulagaina e sailia ai tofi a le atunu’u mo le kofi Kovana ma le Lutena Kovana, tofi Faipule i le Konekeresi i le laumua i Uosigitone, atoa ai ma tofi Faipule mo le maota o sui i le Fono Faitulafono a Amerika Samoa.

Na taua atili e le afioga i le ali’i Komesina o Palota e fa’apea, e tusa ma le 171 le aofa’i o palota na mafai ona maua mai e lona Ofisa mai fanau a le atunu’u o lo o tautua i vaega ‘au, atoa ai ma fanau o lo o aooga i vaega eseese o le malo tele o Amerika.

O le po anapo i le malaga a le va’alele a le Hawaiian Air na taunu’u mai ai isi pepa palota mai tagatanu’u o lo o aumau i fafo, ae talu mai le itula e 11:00 o le aso To’ona’i na te’a nei, e tusa ma le 1,231 le aofa’i o tagata palota ua mae’a ona faia a latou palota (absentee voting), e pei ona fa’amaonia mai e le afioga a Uiagalelei, lea e aofia ai ma palota a i latou o le a le mafai ona i ai i totonu o le atunu’u i le aso lenei o le palota.

O le taeao ananafi na fa’amaonia mai ai e le Faatonusili o le Pulega o Uafu ma Malaeva’alele ia Taimalelagi Dr. Claire Poumele le aga’i atu o le va’a a le malo, le Segaula mo le momoliina atu o pusa palota i Manu’a. O le pasese o le va’a e aofia ai tagata mai le Ofisa o Palota e to’a 6, atoa ai ma pusa palota, e aunoa lava ma ni isi uta o fa’amomoli poo uta a aiga o ave ai i le malaga a le va’a.

Ua i ai le fa’amoemoe o tagata fai palota uma o le a galulue i nofoaga eseese e 44 o le a avea ma nofoaga fai palota, e tatau ona taunu’u i latou i lea nofoaga a o le i taina le itula e 6:00 i le taeao, ina ia taunu’u atu tagata palota i le taimi e tatala ai fale palota ua mae’a ona sauni ma tapena mea uma e mana’omia mo le fa’atinoina o le palota.

“Ua i ai le fa’amoemoe o le a sologa lelei le faiga palota a le atunu’u i lenei tausaga, e tatalo atu fo’i i le au palota ina ia aga’i i le fale palota e fai lau palota, o lou aia tatau lena e tatau ona fa’atinoina”, o le fautuaga lea a Uiagalelei mo le au palota uma a le atunu’u.

E le fa’atagaina le fa’atauina atu i tua o le ‘ava malosi i le taimi atoa o le palota, o le a mautinoa fo’i le ta’amilo o ali’i a tama’ita’i Leoleo i vaega uma o le atunu’u i le taimi o le palota, mo le mata’ituina o le saogalemu o le atunu’u i le taimi o lana sailiga tofi.

Ia manuia le alo atu o Amerika Samoa i lana sailiga tofi i lenei aso.