Ads by Google Ads by Google

Fautuaina Ofisa OPAD fa’amalosia Faleoloa ma Pisinisi usita’i tulafono


Ni isi o afioga i Faipule o le maota o sui. [ata AF]
ausage@samoanews.com

O le taimi o le iloiloga e fa’amaonia ai tofiga a le kovana mo le ali’i foma’i ia Dr. Peter Tinitali e toe avea ai o ia ma Fa’atonusili o le Ofisa e Puipuia aia tatau o i latou e i ai manaoga fa’apitoa o le tino ma le mafaufau (OPAD), na fautuaina ai e afioga i Faipule o le maota o sui le ali’i foma’i ma lona Ofisa, ina ia latou fa’amalosia le tulafono e fa’atonu ai faleoloa ma pisinisi uma i le atunu’u e usita’i ma tausisi i le tulafono, ina ia mafai ona latou saunia ni auala poo vaega e paka ai ta’avale ina ia fa’a faigofie ai ia i latou o loo i ai manaoga fa’apitoa o le tino ma le mafaufau ona aga’i atu i ia nofoaga.

 

Na taua e ni isi o afioga i Faipule  i le taimi o le iloiloga e fa’apea, o le tele o faleoloa i totonu o le atunu’u i le taimi nei, latou te le o usitaia lea vaega o le tulafono e aofia ai le fausia o ni auala e mafai ai ona savavali ai i latou o loo feoa’i i nofoa fa’ata’avalevale, poo vaega fo’i e mafai ai ona paka ta’avale a tagata.

 

Saunoa le afioga i le ali’i faipule ia Fagaoatua Dorian T. Salavea, o se tasi sa tautua i le galuega fa’a faiaoga i tausaga ua mavae e aofia ai ma le taimi na avea ai ma puleaoga mo le aoga maualuga a Leone e fa’apea, o loo i ai pea lava faleaoga e le o mafai ona latou tausisia le tulafono e pei ona fa’amalosia e le Ofisa o le OPAD.

 

“I lo’u talitonuga, e tatau ona galulue fa’atasi le Ofisa o le OPAD ma le Matagaluega o Aoga a le malo mo le faia o asiasiga i faleaoga ina ia mautinoa e aofia ai i galuega o loo fuafuaina mo faleaoga tulaga e pei ona fautua mai ai le tulafono”, o le saunoaga lea a Fagaoatua.

 

“E le gata i faleaoga ae faapea fo’i i le tele o faleoloa ma pisinisi, e tatau lava ona fa’amalosia i ai tulafono e pei ona moomia e le tulafono, ina ia fa’a faigofie ona uia e nai o tatou tagata o loo i ai manaoga fa’apitoa o le tino ma le mafaufau”, o le isi lea saunoaga a le ali’i faipule.

 

Saunoa le afioga i le ali’i faipule ia Kitara Vaiau e fa’apea, e i ai fo’i tagata i lona itumalo i Saole aemaise lava i le motu o Aunu’u e moomia le auaunaga lea, o le mafua’aga fo’i lena e tatau ai ona i ai se tulaga fa’apena i luga o le uafu i Auasi.

 

“E le gata i nai tagata o le motu i Aunu’u, ae o loo to’atele lava fo’i tagata turisi e feoa’i i nofoa fa’ata’avalevale e naunau e fia asia Aunu’u, ae o le faigata e leai ni auala e faigofie ai ona feoa’i a latou nofoa fa’ata’avalevale, o se tulaga lelei tele pe afai e galulue le Ofisa o le OPAD ma le Ofisa o Galuega Lautele a le malo o loo fuafuaina galuega tetele, ina ia mautinoa e aofia ai tulaga o auala e pei ona talosagaina”, o le saunoaga lea a Vaiau.

 

Na taua e le ali’i foma’i ia Dr. Tinitali e fa’apea, o loo galulue pea lona Ofisa i le fa’amalosia o le tulafono, ae o le mea moni e tatau ona silafia e le Fono, o loo to’atele pea le atunu’u e le o usitaia le tulafono i tulaga o paka, e tiga lava ona iloa e le tatau ona paka a latou ta’avale e vaega e paka ai ta’avale a i latou e i ai manaoga faapitoa o le tino ma le mafaufau, ae paka ai lava.

 

O loo galulue fo’i le latou ofisa ma le ofisa o Leoleo i le fa’amalosia o le tulafono ua pasia, ina ia mautinoa e le toe i ai se isi e vaai fa’atauva’a i le tulafono.