Fautuaina Loia Sili le Kapeneta ina ia tausisi tulafono aso o le palota

 Le Loia Sili o le malo, Talauega Eleasalo Ale i le taimi o le fonotaga a le Kapeneta ananafi  [ata AF]
ausage@samoanews.com

Ua fauatuaina e le Loia Sili a le malo ia Talauega Eleasalo Ale sui uma o le Kapeneta a le ali’i kovana ananafi, ina ia tau solomua ia te i latou ona tausisi i le tulafono o palota i le aso tonu o le palota, ma ia tausi le filemu pe afai e i ai ni fa’aletonu e molimauina i le aso o le palota.

 

“O le fautuaga e fia avatu i le tatou kapeneta, afai tou te molimauina ni uiga po o ni gaioiga e fa’atinoina e ni isi o le atunu’u, e ono fete’ena’i ma le tulafono o palota i le aso o le palota tele a le atunu’u, o le fautuaga fa’amolemole, aua e te taumafai e fa’aaoga lou malosi e fa’afetaui ai le tagata o lo o ia faia uiga e le tusa ma le tulafono, a ia taumafai e tausi le filemu e ala i lou fa’afeso’ota’iina o Leoleo. Afai fo’i e i ai ni tagata o lou Ofisa e te vaaia o lo o tutu ma saini a isi sui tauva i luga o le alatele i taimi o fa’atosina o lo o fa’agasolo i le taimi nei, o la’u fautuaga, aua e te fa’alavelave ia te i latou, ae tu’u pea i latou e fa’aali lo latou aia faaletulafono e palota ai, ina ia tusa ai ma le Fa’avae o le malo o Amerika Samoa, lea o lo o fa’ataua mai ai aia tatau o tagata atoa ai ma tulafono o palota”, o le saunoaga fa’aumiumi lea a le Loia Sili o le malo.

 

O le afioga i le ali’i kovana ia Lolo Matalasi Moliga na ia lagaina le mataupu e fa’atatau i faiga palota i le taimi o le fonotaga a le Kapenate, lea na usuia i le potufono a le Ofisa o Fa’atoaga a le malo i le taeao ananafi.

 

“O le tiute a tatou o ta’ita’i o le faigamalo, ia mautinoa e lelei atoatoa le tapenaina o le faiga palota a le atunu’u ma ia puipuia aia tatau o tagata Amerika Samoa e palota ai, aua o nisi o taimi, e le sa’o ai le fa’auigaina e le au fa’asalalau o galuega o lo o tatou faia, fai mai e fa’a polokiki galuega o lo o tatou faia, ae o le galuega a outou fa’atonusili o le puipuia lea o aia tatau o tagata palota atoa ai ma tagata faigaluega ina ia mautinoa e lelei le fa’atinoina o le palota”, o le saunoaga lea a Lolo.

 

Sa ia taua fo’i e fa’apea, e pule lava le au fa’asalalau i le auala latou te fa’aupuina ai galuega e fa’atinoina i tua e le malo, ae o le itu taua e tatau i le malo ona silafia, e i ai lona tiute i lalo o le tulafono e faia ai gaioiga uma ina ia mautinoa e lelei ma saogalemu le fa’atinoina o le palotaga a le atunu’u.

 

Na fesili ni isi o sui o le kapeneta i le Loia Sili, e fa’amanino atu ni isi o tulafono e fa’atatau i le aso o le palota ina ia mafai ai ona latou malamalama atili i le suiga fou o le tulafono lea e lei leva ona pasia e le Fono Faitulafono, aemaise ai o isi vaega o le tulafono tau palota e le tatau ona fa’atinoina i gaioiga fa’atosina i taimi ao lumana’i ai le aso o le palota.

 

“I tulaga o fa’atosina, e le fa’atagaina se tagata faigaluega a le malo ona ia faia ni gaioiga faatosina i taimi faigaluega a le malo, totonu o ofisa o le malo, pe fa’aaoga ai fo’i meatotino a le malo, o lou taumafai e faaleaga le aia o le isi tagata e palota ai, ua atagia mai ai lou soli o le tulafono”, o le saunoaga lea a Talauega.

 

Mo le aso o le palota, na toe faamamafa e le loia sili le le fa’atagaina lea ona faia o ni BBQ i le aso tonu o le palota, pe toe faia ai fo’i ni isi gaioiga e fa’atosina ai tagata palota e ala i le taumafai e fa’alauiloa ata o sui tauva i le nofoaga tonu o lo o i ai le fale palota.

 

“O le nofoaga e faia ai le palota i le aso tonu o le palota, e na o le filemu ma uiga fa’aaloalo e tatau ona vaaia ai, e le mana’omia se vevesi poo se taumafai e fa’alavelave i le isi tagata palota”, o le saunoaga lea a Talauega.

 

O le folasaga na folasia e le Komesina o le Ofisa o Palota i luma o le kapeneta, na manino ai le lava tapena o le Ofisa mo le fa’atautaiga o le palota tele a le atunu’u, lea ua fa’atulaga mo le aso 8 Novema 2016.

 

Na fa’aaoga e le afioga ia Uiagalelei Dr. Lealofi ia Faatonusili o le tele o Ofisa ma Matagaluega a le malo o lo o mana’omia la latou fesoasoani i le aso o le palota, ina ia latou galulue fa’atasi mo le fa’atinoina o lenei auaunaga taua.

 

O le vaiaso na te’a nei na faia ai se fonotaga faapitoa a le Ofisa o Palota ma le Ofisa o Mataupu Tau Samoa, mo le faamaninoina o tiute tauave a ali’i mautofi e tatau ona fa’atinoina i le aso o le palota.

 

Saunoa Uiagalelei e fa’apea, o Pulenu’u le fa’amoemoega autu mo le tausiaina o le filemu i le aso o le palota, o i latou fo’i ia e fesoasoani i le aufaigaluega mo le fa’atautaiina o le palota.

 

Talu ai tulaga i le tulafono e fa’atatau i gaioiga e le tatau ona fa’atinoina i le aso tonu o le palota, na fautuaina ai loa e le afioga i le Maoputasi Tasi Asuega le Loia Sili ma le Komesina o Palota, ina ia saili so la avanoa e fa’amanino ai i luma o le atunu’u i luga o le KVZK-TV gaioiga e le tatau ona fa’atinoina i le aso o le palota, ina ia mautinoa e maua e le atunu’u se faiga palota filemu ma le manuia i lenei tausaga.

Comment Here