Ads by Google Ads by Google

Fautuaina le Ofisa CJPA ina ia fesoasoani i Ofisa malo

ausage@samoanews.com

Talu ai le tele o vaega tupe fesoasoani mai le malo feterale o lo o fa’amanuiaina ai le Ofisa e Puipuia Solitulafono i le atunu’u (CJPA), ua fautuaina ai e le Komiti o Mataupu Tau Fa’amasinoga a le maota o sui le Fa’atonusili o lea Ofisa a le malo, ina ia fa’asafua fa’amanuiaga tau tupe o lo o maua e lona Ofisa e fesoasoani ai i manaoga o lo o fetaia’i ma le tele o Ofisa o le malo.

 

O ni isi o ia Ofisa e aofia ai le Vaega o le Falepuipui i Tafuna, lea o lo o i lalo o le Matagaluega o le Puipuiga o le Saogalemu Lautele, Vaega o le EMS lea o lo o i lalo o le vaavaaiga a le Falema’i o le LBJ i Faga’au, fa’apea ai ma le Ofisa o le Loia Fautua mo tagata lautele o le atunu’u.

 

A o le i malolo le Fono Faitulafono mo lana malologa puupuu e tasi ma le afa vaiaso e pei ona fa’agasolo i le vaiaso nei, na maua le avanoa e faataunu’uina ai se iloiloga i le va o le Komiti a le maota o sui ma le afioga i le ali’i Fa’atonusili ia Keith Gebauer, mo se avanoa e faamanino ai ituaiga alagatupe fesoasoani o lo o maua mai e lona Ofisa mai le feterale e mafai ona fesoasoani ai mo ni isi o Ofisa o le malo atoa ai ma fesoasoani talafeagai mo nu’u ma afioaga i le atunu’u.

 

Na fa’amanino e Gebauer i lana molimau i luma o le Komiti a le maota o sui e na o le to’a 3 sui na auai i le iloiloga, e na o le 3 lava Ofisa o le malo o lo o agava’a i alagatupe fesoasoani mai le feterale o lo o maua mai e lona Ofisa, ma o ia Ofisa e 3 a le malo e aofia ai le Ofisa o Leoleo, Ofisa o le Loia Sili fa’apea ai ma le Vaega o Fa’amasinoga.

 

Na fesili le afioga i le ali’i faipule mai Aua ia Faimealelei Anthony Fu’e Allen i le ali’i Fa’atonusili, pe agava’a ai ma le Falema’i o le LBJ i Faga’alu i alagatupe fesoasoani a lona Ofisa, ae na tali le ali’i Fa’atonusili, “e leai, ae se’i vagaa ua i ai ni polokalame e fa’atalosagaina ona mafai ona matou vaavaai i ai pe talafeagai ma ta’iala o le fa’aaogaina o vaega tupe o lo o maua mai”.

 

Saunoa le afioga ia Faimealelei, o ia fo’i o se totino o le Komiti Fa’afoe a le Falema’i i Fagaalu e fa’apea, o se tasi o manaoga tupito o lo o fetaia’i ma le vaega o le EMS o lo o i lalo o le vaavaaiga a le Falema’i, o le fia maua lea o ni ta’avale EMS e fa’aopoopo i a latou ta’avale tuai o lo o i ai, ina ia fa’afaigofie ai le fa’atinoina o le latou tautua.

 

“O le isi lea tautua e pito sili ona taua i totonu o le atunu’u i le taimi nei, o le auaunaga lea a le aufaigaluega a le EMS, lea o lo o tali atu i soo se taimi e tula’i mai ai ni fa’alavelave fa’afuase’i i totonu o le atunu’u, po o ni nisi fo’i e a’afia i gasegase tuga ma fa’afuase’i, peita’i o le fa’afitauli o lo o i ai, e leai se tupe a le EMS po o le falema’i e fa’atau mai ai ni ta’avale fou, e le o i ai fo’i se tupe a le malo e mafai ona fesoasoani ai i lea manaoga ae o se tasi lenei o fa’afitauli ua leva na tatau ona maua se fofo”, o le saunoaga lea a Faimealelei, ma ia fautuaina ai loa le susuga ia Gebauer ina ia fesoasoani lona Ofisa i le vaega a le EMS, e ala i le fa’asoa atu i ai o ni isi o alagatupe o lo o maua mai i le feterale, po o le tusi fo’i e lona Ofisa o ni alagatupe fesoasoani mo le EMS.

 

E ui na taua e Gebauer le mafai ona fesoasoani o lona Ofisa i ni manaoga e tula’i mai i le EMS, peita’i sa ia fa’ailoa i le luma o le Komiti le le mafai lea ona tusi e lona Ofisa o se talosaga mo ni alagatupe fesoasoani mo le EMS.

 

“E le fa’agataina lo’u Ofisa i lalo o le tulafono ona matou tusia pe failaina fo’i ni talosaga e fai ai ma sui o le EMS, i ofisa o le feterale o lo o maua mai ai alagatupe fesoasoani ina ia mafai ai ona maua e le EMS ni fesoasoani tau tupe, afai o lo o manaomia e le EMS se fesoasoani, e mafai lava e lona Ofisa ona faila sa’o a latou talosaga i le feterale, pe auala atu fo’i le talosaga i Ofisa o lo o pulea i latou, e pei o le  LBJ po o le Matagaluega fo’i o le Soifua Maloloina a le malo”, o le fautuaga lea a Gebauer i luma o le Komiti.

 

E fa’aleo e Faimealelei lana talosaga i luma o le Komiti i le aso Lulu o le vaiaso na te’a nei, ae o le taimi fo’i lea ua taunu’u ai i le atunu’u ta’avale EMS e 5 na foa’i fa’ameaalofa mai e le Ofisa o le EMS a Honolulu mo le Vaega o le EMS a Amerika Samoa, e aunoa ma se tupe a le malo o Amerika Samoa po o le Falema’i o le LBJ na alu ai.

 

I se fa’atalatalanoaga a le Samoa News ma le Pulesili o le Vaega a le EMS, afioga Galumalemana Popo Avegalio, na ia fa’ailoa ai le fa’aauau pea lea ona maua mai o fesoasoani a le EMS a le atunu’u mai le Ofisa o le EMS a Honolulu, e ala i ta’avale EMS ua le toe mana’omia e Honolulu, ona auina mai loa lea e fa’aaoga i Amerika Samoa nei.

 

Saunoa atili Galumalemana e fa’apea, e silia i le $200,000 le tau o le ta’avale fou EMS e tasi, ma e le mafai e le LBJ ona maua lea ituaiga tupe tele e fa’atau mai ai se ta’avale se tasi mo Amerika Samoa.

 

Na taua atili e Gebauer i luma o le Komiti a le maota o sui e fa’apea, o le tele lava o vaega tupe o lo o fa’amanuiaina ai lona Ofisa, e fa’aaoga lea e fesoasoani ai i le puipuiga o solitulafono eseese i Amerika Samoa.