Ua fautuaina e afioga i senatoa totino o le Komiti Fa’afoe a le Ofisa o Femalagaaiga sa tofia e le ali’i kovana ia Lolo Matalasi Moliga, ina ia silasila toto’a i le tulafono o loo fa’amalosia ai le fa’atonutonu lea o le ulufale mai o tagata mai fafo i le atunu’u, aemaise lava i tagata Asia.

Na taua e afioga i Senatoa i totino o le Komiti e to’alima sa iloiloina o latou agava’a i le taeao ananafi e fa’apea, o se tulaga mataga tele le tele o fa’aletonu o loo alia’e mai i le Ofisa o Femalagaaiga atoa ai ma le Komiti Fa’afoe ua mavae atu, ae o loo i ai tulafono e puipuia ma lima ta’ita’iina ai galuega a le Ofisa ma le Komiti.

A o fa’agasolo ai le ulua’i fono fa’apitoa a le kovana mo le umi e 5 aso i le vaiaso lenei, na pasia ai e le maota maota maualuga totino e to’alima o le Komiti Fa’afoe o le Ofisa o Femalagaaiga, i le mae’a ai lea o se iloiloga sa fa’atautaia e le Komiti o Mataupu Tau Tulafono a le maota maualuga, lea na ta’ita’ia e le afioga i le ali’i senatoa ia Tuiagamoa Tavai.

Na fautuaina e le afioga i le ali’i senatoa ia Tuaolo M. Fruean sui o le Komiti Fa’afoe ina ia silasila toto’a i le fa’afitauli lea ua maitauina i le taimi nei, o le saoasaoa lea o le ulufale mai o tagata mai fafo i le atunu’u, aemaise lava i tagata mai Asia.

“E mata’utia le saoasaoa o le ulufale mai o tagata Asia nei i le atunu’u, ua ou le malamalama pe fa’apefea ona ofi mai le to’atele ua vaaia i le atunu’u, pau le fautuaga, vaai lo tatou atunu’u ne’i taunu’u ai le tala e fai ia Matu’u ma Faganeanea, e toe poto ane Leaeno ua pe Kegikegi, ina ne’i tatou toe tulioso atu ae ua tuai tatou. A tatou le fa’aeteete i le tulaga lea, ua amata ona fanafanau Saina ma Kolea i lo tatou atunu’u, e i ai le taimi e matutua uma ai fanau nei ona uma atu lea o tatou ae talepe e tagata nei le Fa’avae o le atunu’u, aua o lea o le a matua tele la latou palota e maua mai i tagata ua fananau i lo tatou atunu’u, o fautauga ia e silasila toto’a i ai la outou Komiti”, o le fautuaga lea a Tuaolo na lagolagoina e Tuiagamoa.

Saunoa Tuiagamoe e fa’apea, o le isi fa’afitauli lea ua fai ma tulaga e mataga i le fa’afofoga a le atunu’u, o tagata e poloaina le toe fa’afo’i o latou atunu’u ma tu’u igoa i le Lisi o tagata e fa’asa ona toe ulufale mai, ae oo atu i le isi vaiaso ua toe vaaia fo’i le fealualua’i i totonu o le atunu’u e pei lava e leai se mea na tupu.

“Ua sau soo i le nusipepa tulaga o mataupu fa’apenei, e matua mataga lava i le maitau atu, pei lo tatou atunu’u o se mea ula i le maitau mai a tagata mai fafo, ona o tulaga le fa’amaoni o loo fa’atinoina e ni isi o tagata faigaluega, o le fautuaga i la outou Komiti silasila toto’a i tulaga mataga ia ina ia aua ne’i toe tula’i mai i le lumana’i”, o le fautuaga lea a Tuiagamoa.

E ta’i 16-0 palota na pasia ai suafa o Gloria Ausage, Ativalu Tago, Togotogo Sotoa ma Fanene Edda Wybrski, se’i vagana ai le afioga i le ali’i senatoa ia Fa’amausili Mau Mau Jr e 15-1 le palota na pasia ai o ia.

O isi sui e to’alua o le Komiti Fa’afoe e lei pasia e le maota maualuga e aofia ai le susuga ia Frank Gaisoa ma le afioga i le ali’i faipule ia Gafatasi Afalava.

Ae o le vaiaso na te’a nei na pasia ai e le maota o sui suafa e to’afa o le Komiti Fa’afoe lenei, lea e aofia ai Ausage, Fanene Sotoa ma Tago, ina ua mae’a se iloiloga sa fesiligia ai e le Komiti a le maota o sui a latou agava’a, lea na ta’ita’ia e le afioga i le ali’i faipule ia Toeaina Faufano Autele, ae o isi sui e to’atolu e lei auai i lea iloiloga e aofia ai le afioga i le ali’i faipule ia Gafatasi, o le afioga i le ali’i senatoa ia Fa’amausili ma le susuga ia Gaisoa.

E pei ona manino i ripoti sa tu’uina atu i luma o le Fono Faitulafono i le taeao ananafi, o le afioga i le ali’i faipule ia Gafatasi ma le susuga ia Gaisoa o loo malaga i laua i fafo ona o ni isi o tuatuano’a fa’aleaiga, ma ua fa’amoemoe e toe taliu mai i laua i le atunu’u i le vaiaso fou, ae o le taimi lea ua tapunia le fono fa’apitoa o loo nofoia nei.

O le itula e 8:00 i le taeao nei lea ua fa’atulaga e faia ai le iloiloga a le Komiti o Tulafono a le maota o sui, mo le fa’amaoniaina o le suafa o le afioga i le ali’i senatoa ia Fa’amausili. I le mae’a ai o le tauaofiaga a le maota o sui i le taeao ananafi, na fulisia ai afioga i faipule e lagolago se fautauga sa fa’atula’i e le sui fofoga fetalai ia Fetu Fetui Jr, i le mae’a ai lea ona la feutana’i ma le fofoga fetalai ia Savali Talavou Ale, mo se avanoa e fa’aagafua ai tulafono a le maota o sui, ae tu’uina atu suafa o Gafatasi ma Gaisoa e palota mo le faapasiaina, ina ia fa’a faigofie ai ona fa’ataunu’u galuega a le Komiti Fa’afoe.

Saunoa Fetui Jr e fa’apea, e le tau fesiligia le tautua a afioga i le ali’i faipule ia Gafatasi i le silasila a le maota, o se tasi o Tama o le atunu’u ua loa lana tautua i le Fono ma le malo, ua silafia fo’i o ia e le to’atele, ae o le susuga ia Gaisoa, e le fou o ia i le avea ma totino o le Komiti Fa’afoe o Femalagaaiga.

O le to’atele o faipule na maua le avanoa e tulei saunoa ai i lenei mataupu, sa fa’aalia lo latou lagolagoina o le fautuaga a le sui fofoga fetalai, peita’i na saunoa le afioga i le ali’i faipule ia Veevalu L. Mageo e fa’apea, na pau lona popolega o lo o i ai, ona o Gaisoa le isi sui tuai o le Komiti Fa’afoe o Femalagaaiga, ao lea sa manino i ripoti le tele o fa’aletonu sa fetaia’i ma le Komiti i tausaga ua mavae, i le taumafai lea e fa’aatoa le Kalama e fa’atino ai ana galuega, ina ne’i avea le toesea o Gaisoa ona o gasegase o le tino ma auala e toe fa’aauau ai pea lea fa’afitauli pe a toe pasia o ia.

O le taimi o le tauaofiaga a le maota o sui i le taeao nei lea ua fa’amoemoe e tauaao atu ai loa suafa o Fa’amausili, Gafatasi ma Gaisoa e fai i ai se finagalo o le maota.