Ads by Google Ads by Google

Fautuaina Komesina o Palota ina ia fa’amalosia tulafono palota

ausage@samoanews.com

Ua tu’uina atu e le afioga i le alii Faipule ia Maugaoali’i Leapai Tusipa Anoa’i sana fautuaga i le Komesina o Palota a le malo, ina ia silasila toto’a i auala e fa’amalosia ai tulafono tau palota mo isi faiga palota a le atunu’u i le lumana’i.

 

O lea fautuaga mai le afioga i le ali’i Faipule, na auala atu lea i sana tusi ia Uiagalelei Dr. Lealofi Uiagalelei i le aso 14 Novema 2016, i le mae’a ai lea ona ia maitauina o ni isi o tulaga fa’aletonu sa tula’i mai i le sailiga tofi a le Itumalo #8 o le Maoputasi #2 i le aso 8 Novema na te’a nei mo le afioaga i Fagatogo.

 

E pei ona silafia e le atunu’u, o le fa’aiuga o le palota mo le Itumalo o le Maoputasi #2, ua manumalo ai le afioga ia Vailiuama Steve Leasiolagi mo le nofoa o le itumalo mo le isi lua tausaga o lo o lumana’i nei, ma ua le manuia ai le taumafaiga a le afioga ia Maugaoali’i, peita’i na taua e Maugaoali’i i lana tusi ia Uiagalelei e fa’apea, o se tasi o tulaga sa maitauina e ni isi o le aufai palota sa galulue i Fagatogo, o se tasi o pepa palota na maua mai lea i totonu o le pusa mo sui tauva i le Konekeresi, ma tula’i mai ai loa le aofa’i atoa o palota e 486 ae le 485 e pei ona i ai.

 

O se tasi o tulaga na taua e Maugaoali’i i lana tusi, o tulafono ma ta’iala e fa’afoe ai le fa’atautaiga o palota, o le toe taliaina lea o isi tagata palota e fa’aopoopo i le lisi palota, i le mae’a ai lea ona fa’amaonia e le Komesina o Palota o le lisi o tagata ua palota ua mae’a ona lesitala mo le palota.

 

Ma le vaega mulimuli e pei ona taua e Maugaoali’i i lana tusi, o le maitauina pea lea o faiga fa’atosina i tafatafa o le fale fai palota, e ui o lea ua pasia le tulafono e tapui ai le toe fa’atautaia ai o nei ituaiga gaioiga i tafatafa o le nofoaga e faia ai le palota i le aso o le palota.

 

Na si’itia e Maugaoali’i i lana tusi le vaega o le tulafono o lo o fa’amanino mai ai gaioiga ma vaega e le tatau ona fa’atinoina i tafatafa o le fale palota i le aso o le palota, e aofia ai gaioiga fa’atosina atoa ai ma isi taumafaiga ina ia fa’atosina ai manatu o le au palota i le aso o le palota.

 

“O gaioiga uma e pei ona taua i le tulafono e le tatau ona fa’atinoina i le aso o le palota, sa mafai ona fa’atinoina i le nofoaga sa faatinoina ai le palota i le aso o le palota na mavae atu nei. E taua aia tatau sa’oloto o tagata palota e filifili tatau ai i le sui ua latou filifilia, e aunoa ma le fa’alavelaveina i gaioiga fa’atosina”, o se vaega lea o le tusi a Maugaoali’i.

 

Sa ia taua atili fo’i e fa’apea, i le avea ai o ia ma se tasi o sui tauva mo le Itumalo #8 o le Maoputasi #2, na te fesiligia ai le agava’a o nei gaioiga i lalo o le tulafono tau palota ua mae’a ona pasia ma aloaia e le malo.

 

I se fa’atalatalanoaga a le Samoa News ma le afioga a Maugaoali’i i le vaiaso na te’a nei, sa ia fa’aalia manino ai le mafua’aga o lona naunau e tu’u atu lenei fautuaga i le Komesina o le Ofisa o Palota, ina ia fesoasoani ai i le fa’atautaiga o faiga palota a le atunu’u mo le lumana’i.

 

“Ua mae’a ona fa’ailoa so’u taofi i lo matou afioaga i Fagatogo i le po na mae’a ai le sailiga tofi a le atunu’u, ma ou fa’amanuia aloaia atu ai i le afioga ia Vailiuama e tusa ai o lona manumalo i le nofoaga a le itumalo, ou te le manatu fo’i e faila sa’u fa’asea fa’asaga i tulaga fa’aletonu sa maitauina i le aso o le palota, ae o le agaga mama i lo’u loto, ia avea fa’afitauli o lo o tutupu i faiga palota a le atunu’u ma auala e fa’autagia ai le Komesina o Palota ma lona Ofisa, ina ia mataa’a ai i auala e fa’amalosia faiga palota a le atunu’u i le lumana’i”, o le saunoaga lea a Maugaoali’i.

 

I le fa’aiuga o lana saunoaga, sa ia toe fa’afetaia ai le itumalo e tusa ai o lo latou lagolagoina o lona tula’i mai i le tofi a le itumalo i tausaga ua mavae, aemaise ai o le latou toe lagolagoina o lona fa’amoemoe i le faiga palota ua mavae atu, e ui ua le manuia.