Ads by Google Ads by Google

Fautuaina Faatonusili le tumau ina ia taofia lo latou faia o ni suiga fou


Le afioga i le ali’i Kovana ia Lolo Matalasi Moliga, ma le Lutena Kovana ia Lemanu Peleti Mauga. [ata AF]
ausage@samoanews.com

O le fonotaga mulimuli a le afioga i le ali’i kovana ia Lolo Matalasi Moliga ma lana Kapeneta mo lenei tausaga, lea sa usuia i le aso Tofi o le vaiaso na te’a nei i le potu fono a le Ofisa o Fa’atoaga a le malo i Tafuna, na fautuaina malosi ai e le ali’i kovana i latou uma ua tofia e avea ma Fa’atonusili le tumau o Matagaluega ma Ofisa uma a le malo, i le le tatau lea ona latou faia o ni suiga i totonu o Ofisa i le taimi nei, se’i vagana ua mae’a ona tofia aloaia le kapeneta fou i le masina fou.

 

“O lo o fa’aauau pea ona fetaia’i le malo ma tulaga fa’aletonu atoa ai ma lu’itau i le itu tau tupe ma le tamaoaiga, peita’i e le avea ia fa’aletonu ma auala tatou te fa’avaivai ai e fa’atino la tatou pito laau i le fa’aleleia lea o le malo, ae i le tulaga o fesuiaiga i totonu o le faigamalo, ou te manatu e fa’ailoa atu ia te outou uma ua tofia e avea ma Faatonusili le tumau o Matagaluega ma Ofisa uma a le malo, e leai ni suiga e faia i totonu o le faigamalo, se’i vagana ua mautu i latou o le a tofia e tauaveina le galuega ona fa’atoa mafai lea ona faia ni suiga”, o le saunoaga lea a le ali’i kovana i le Kapeneta.

 

Na fa’atumulia le fonotaga mulimuli a le kapeneta i le vaiaso na te’a nei i afioga i Fa’atonusili fa’apea ai ma o latou sui lagolago, lea sa poloaina e le ali’i kovana ina ia auai uma atu i le fonotaga fa’ai’u o lenei tausaga, ina ia maua ai le avanoa latou te fetufaa’i ai.

 

“Talu ai o lea ua mae’a ona ma tauaaoina tusi fa’amavae mai afioga i Fa’atonusili e tusa ai o le poloaiga sa tu’uina atu, o le mafua’aga lea e taua ai le auai o a outou afioga i Faatonusili le tumau, ina ia outou silafia vaega taua e tatau ona aga’i ia i le malo i nai vaiaso o loo totoe ao lumana’i ai le fa’alauiloaina o le kapaneta fou i le aso 3 Ianauri o le tausaga fou”, o le saunoaga lea a le ali’i kovana.

 

O ni isi o tulaga sa toe fa’amanatu e le ali’i kovana i lana saunoaga, o ni isi o tulafono ma ta’iala ua mae’a ona pasia e le faigamalo e tatau ona fa’amalosia, ae o lo o maitauina lava le i ai o ni isi o tagata faigaluega a le malo latou te le o aloaia ia tulaga.

 

“O loo maitauina pea ma le fa’anoanoa ni isi o tagata faigaluega a le malo e le o usita’i i le tulafono mo le fa’aaogaina o ta’avale i le tuana’i ai o taimi faigaluega a le malo, ma ua foliga mai o se tasi lenei o faiga ua masani ai ni isi o tagata faiglauega ma ta’ita’i, o le taumafai lea e saili auala eseese e soli ai le tulafono a le malo, o le mafua’aga lea e talosaga atu ai ia outou afioga i Faatonusili le tumau, ia toto’a la outou silasila i le soona fa’aaoga e tagata faigaluega o ta’avale a le malo i taimi le tatau”.

 

“Ou te talosaga atu fo’i i lau afioga i le Komesina o Leoleo ma lou Ofisa, ina ia fesoasoani i le fa’amalosia o le tulafono i le fa’aaoga le tatau o ta’avale a le malo i taimi o aso fiafia ma le fa’aiuga o le tausaga”.

 

Na faamaonia mai e le Sui Komesina o le Matagaluega o Leoleo ia Vaimaga Maiava i le Samoa News e fa’apea, o se tasi o matafaioi a le Ofisa o Leoleo i le fa’amalosia o le tulafono i aso malolo o le kerisimasi ma le tausaga fou, o le fa’amalosia atu ai lea ma le tulafono e fa’asa ai ona fa’aaoga e tagata faigaluega a le malo ta’avale a le malo i le mae’a ai o taimi faigaluega, se’i vagana ua i ai se pemita e fa’amaonia ai le fa’aaogaina o se ta’avale.

 

Sa fautuaina fo’i e le ali’i kovana Faatonusili le tumau ua tofia e ta’itaia Ofisa ta’itasi o le malo, ao lumana’i ai le fa’alauiloaina o lana kapeneta fou ina ia tu’u fa’atasi fa’amaumauga i le aofa’i o tagata faigaluega a Ofisa ma Matagaluega ta’itasi o loo latou galulue ai ma fa’ao’o atu i le Ofisa o Tagata Faigaluega a le malo (DHR), mo le tu’u fa’atasia o fa’amaumauga i le aofa’i o tagata faigaluega uma a le malo o loo i ai i le taimi nei.

 

“E taua tele le mautu o fa’amaumauga a le malo i le aofa’i o ana tagata faigaluega atoa ai ma le aofa’i o ana meatotino o loo i ai, ina ia ulufale atu le malo i le isi nofoaiga fou ae o loo mautu ana fa’amaumauga”, o le saunoaga fa’ai’u lea a le ali’i kovana.