Fautuaina Fa’amasinoga se ali’i taofi lona faia sauaga fa’asaga lona aiga

ausage@samoanews.com

A o le i tu’uina atu le poloaiga a le Fa’amasinoga Maualuga e tatala ai i tua mai le toese i Tafuna se ali’i sa taofia ai mo le 12 masina, ona o tu’uaiga i lona faia lea sauaga fa’asaga i lona to’alua ma lana fanau, sa fautuaina malosi e le afioga i le ali’i Fa’amasino ia Elvis P. Patea lea ali’i ina ia taofia lona toe faia o sauaga fa’asaga i lona aiga.

 

Na fautuaina malosi fo’i e Patea le ali’i ua molia, ina ia auai i aoaoga fa’a faufautua o lo o fa’atautaia e le Matagaluega o Auaunaga ma Tautua Lautele a le malo (DHSS), ina ia fesoasoani ai i auala e fa’afoe ai le la ulugali’i ma lona to’alua, atoa ai ma le fesoasoani e foia le tulaga o le ita soo.

 

Talu ai e le o se taimi muamua lenei ua tula’i mai ai se faafitauli fa’apenei i totonu o lenei aiga, aemaise lava i le va o le ulugali’i, sa fautuaina ai loa fo’i e Patea le Tina o le aiga, o le to’alua lea a le ua molia, o se tulaga lelei pe afai e auai atu fo’i ma ia i aoaoga fa’a faufautua lea ua poloa’i e le Fa’amasinoga lona to’alua e auai atu i ai, ina ia fesoasoani ai i le foiaina o le fa’afitauli o lo o alia’e soo mai i lo la aiga, e ui o lea fautuaga e le o fa’amalosia e le fa’amasinoga, ona e le o ia lea e fa’asaga i ai le fa’aiuga a le fa’amasinoga, o lona to’alua.

 

Na ulua’i tu’uaia e le malo le ua molia i le moliaga mamafa o le fa’ao’olima i le tulaga lua, ae i lalo o se maliliega sa latou sainia ma le malo ma talia e le fa’amasinoga maualuga, sa malie ai le malo latou te faia se suiga i le tagi sa fa’aulu fa’asaga i le ua molia, ina ia suia ai le moliaga mamafa o le fa’aoolima i le tulaga lua i le moliaga mama o le fa’aoolima i le tulaga tolu.

 

I le tali ioe ai o le ua molia i le moliaga e pei ona ta’usala ai o ia, sa ia ta’utino ai i le fa’amasinoga i lona fa’ao’olima lea i lona to’alua, peita’i i le molimau a le fafine i luma o le fa’amasinoga ina ua maua lona avanoa e talosaga ai mo se avanoa mo lona to’alua, e le gata sa ia ta’ua ai le mana’omia e le la ulugali’i o ni aoaoga faa faufautua i auala e foia ai vevesi o loo tutupu soo mai i lo la va, ae sa ia taua fo’i e fa’apea, o lona gutu oso i lona to’alua le mafua’aga o le tula’i soo mai o le vevesi i lo la va.

 

Na augani le Tina i le fa’amasinoga mo se avanoa e toe tatala atu ai i tua lona to’alua, ona o ia o loo fa’alagolago i ai le tausiga o le aiga ma le la fanau. Na taua e le Tina e fa’apea, ua tusa ma le tausaga atoa talu ona latou nonofo i le shelter a le malo, (o le umi fo’i lea talu ona taofia lona to’alua i le falepuipui), ina ua leai se isi e tausia o ia ma lana fanau.

 

Na fa’atoese le ua molia i le fa’amasinoga e tusa ai o lana solitulafono, ma ia talosagaina ai loa se avanoa e toe fo’i atu ai e tausi lona aiga. Sa ia taua e fa’apea, mai masina e 12 na taofia ai o ia i le toese, ua ia a’oa’oina ai le tele o suiga aoga mo lona olaga, ma ua avea fo’i ia lesona aoga e fesoasoani ai i le toe fatufatuina o lona mafaufau ina ia avea ma tagata matua.

 

Na ia folafola i ali’i fa’amasinoga ina ia tu’u atu se taimi e toe fa’aleleia ai lona olaga, ina ia latou talitonuina ai le suiga o le a oo i ai o ia i totonu o lona aiga.

 

Na tutu fa’atasi loia a itu e lua e lagolago le fautuaga mo se fa’asalaga fa’anofovaavaaia, ina ia mafai ai ona maua e le ua molia le avanoa e toe fo’i atu ai i tua e tausi lona aiga, lea fo’i na talia e le fa’amasinoga.

 

E 5 tausaga lea ua fa’anofovaavaaia ai o ia i lalo o tuutuuga e ao ona ia usita’i i ai, ma o ni isi o ia tuutuuga e aofia ai le tatau lea ona auai i aoaoga fa’afaufautua e fesoasoani ai i le ita ma le faia o sauaga i totonu o le aiga. Ua poloaina fo’i o ia e aua ne’i ona toe faia ni gaioiga e sauaina ai lona aiga, a ia avea o ia ma tagatanu’u lelei e tausisi i tulafono a le malo.

 

O le mae’a ai ona tu’uina atu o le fa’asalaga a le fa’amasinoga i le aso Gafua o le vaiaso nei, na faia ai loa ma le poloaiga e tatala o ia i tua, ae ua lava le tausaga atoa lea na taofia ai o ia i le falepuipui e fai ma ana fa’asalaga i lenei mataupu.

 

O le afioga i le ali’i fa’amasino ia Patea sa iloiloina lenei mataupu, fa’atasi ai ma le lagolagosua a afioga i ali’i Fa’amasino Lagolago ia Mamea Sala Jr ma Tunupopo Faleafaga. O le ali’i loia ia Bob Pickett na tula’i mo le malo ae o Michael White na tula’i mo le sa molia.

 

Talu ai ona o le puipuiga o le Tina sa aafia o lea ua le lomia ai le suafa o le tama sa molia e le malo.

Comment Here