Ads by Google Ads by Google

Fautuaina ave o avanoa sikolasipi mo fanau aooga ai Kolisi Tu’ufa’atasi


Sui o le Komiti o Sikolasipi a le malo i le taimi na molimau ai i luma o le Senate i le vaiaso na te’a nei. [ata AF]

Totino o le Komiti o Aoga Maualuluga a le malo lea fo’i na pasia e le Senate i le vaiaso na te’a nei. [ata AF]
ausage@samoanews.com

O se tasi o fautuaga na tu’uina atu e le afioga i le ali’i Senatoa ia Galea’i M. Tu’ufuli i le taimi na fesiligia ai e le Komiti o Aoga a le maota maualuga, sui o le Komiti o Aoga Maualuluga a le malo atoa ai ma le Komiti o Sikolasipi, o le manatunatu lea i se auala e fa’aaoga ai le Kolisi Tu’ufa’atasi e ave uma i ai fanau sikolasipi e i’u mai i aoga maualuluga, ina ia lava tapena ai o latou mafaufau e ulufale atu i Iunivesite i fafo i le lumana’i.

 

Saunoa Galea’i i le taimi o le iloiloga ma le Komiti o Aoga Maualuluga a le malo e fa’apea, o loo ia tau mafaufau i se auala e fausia ai se pili mo se tulafono taufa’aofi, e aua ai ne’i toe avea ni avanoa sikolasipi i fanau aoga e fa’au’u mai i Aoga Maualululuga i le atunu’u e aooga ai i Kolisi ma Iunivesite i fafo, a ia ave uma fanau aoga nei e aooga i le Kolisi Tu’ufa’atasi a le malo mo le 2 tausaga, ona fa’atoa tatala ai loa lea o le avanoa e aga’i atu ai i aoga i fafo, pe a mae’a le ulua’i 2 tausaga e aooga ai i le Kolisi Tu’ufa’atasi.

 

O le fautuaga mai le afioga i le ali’i Senatoa ia Galea’i, na fa’avae mai lea i tulaga sa latou molimauina i taimi o a latou augatupulaga, a o aooga ai i Kolisi ma Iunivesite i fafo, lea sa molimauina ai a’afiaga ma fa’afitauli e fetaia’i ma tamaiti aoga Samoa i ulua’i tausaga e ulufale atu ai i aoga i fafo.

 

Na taua e Galea’i e fa’apea, o le to’atele o fanau aoga mai Amerika Samoa e fa’au’u sa’o mai lava i aoga maualuluga ma ulufale atu loa i Kolisi ma Iunivesite i fafo, e tele ina mae’a ane le tausaga aoga muamua poo le kuata aoga muamua fo’i ua fa’avaivai ma ua le toe fia aoga, e mafua mai ona e le masani i latou i le olaga o le ola to’atasi i totonu o aoga tetele i fafo.

 

Sa ia saunoa atili e fa’apea, e ese lava le olaga e ola ai fanau aoga i totonu o aoga maualuluga i le atunu’u, ese ma le si’osi’omaga fou o loo i ai le olaga o fanau aoga i Kolisi ma Iunivesite i Amerika, ae manaomia le aooga o fanau i le Kolisi Tu’ufa’atasi i Mapusaga Fou ina ia fa’amasani ai i latou i le olaga i totonu o Kolisi, ona fa’atoa maua ai loa lea o le avanoa e aga’i atu ai i atunu’u i fafo e aooga ai.

 

Na taua e le afioga i le ali’i Senatoa ia Faiivae Godinet, o se tasi o totino o le Komiti o Sikolasipi a le malo e fa’apea, e taua tele le fautuaga a Galea’i, ma o se tulaga fo’i lea e tatau ona talatalanoa ai le latou Komiti ma le Komiti o Aoga Maualuluga a le atunu’u, ina ia saili se auala e fa’atinoina ai lenei fautuaga taua.

 

Saunoa le afioga i le ali’i senatoa ia Satele Galu Satele e fa’apea, o le isi fa’afitauli o loo maitauina i fanau aoga o loo maua sikolasipi e malaga atu ai i fafo, e taunu’u atu loa i fafo ona musu loa lea e alu i le aoga, ae alu ua tafao solo i le lalolagi pe saili fo’i sana galuega, ae gau ai tupe a le malo na totogi e alu ai e aoga, peita’i na fa’amanino e Faiivae e fa’apea, ua mae’a lava ona i ai tuutuuga i le va o matua o fanau aoga nei ma le malo i le toe totogiina mai o tupe o loo ave e aooga ai fanau i fafo, aemaise lava i nonogatupe o loo fa’amatu’u mai i le Faletupe o Atina’e.

 

O le to’atele o fanau sa aooga i fafo i lalo o nonogatupe mai le Faletupe o Atina’e, ua toe fo’i mai i latou i le atunu’u e galulue ai, ma ua amata fo’i ona toe totogi a latou aitalafu i le malo.

 

O se tasi o itu sa fesiligia i le taimi o le iloiloga a le Komiti o Sikolasipi a le malo, o fanau aoga e agava’a i fa’amanuiaga tau tupe o loo maua e fanau aoga (financial aid), fa’apea ai ma le eseesega o pili aoga mo fanau aoga mai Amerika Samoa atoa ai ma fanau aoga mai fafo.

 

Na fa’amanino e Fai’ivae e fa’apea, e $500 i le kuata le pili aoga mo fanau sa fananau i Amerika Samoa, ae mo fanau aoga mai fafo, e sili laititi atu lava i luga le totogi o le latou pili aoga mo le kuata.

 

Na pasia uma e le Senate totino o le Komiti o Sikolasipi atoa ai ma totino o le Komiti o Aoga Maualuluga a le malo i le vaiaso na te’a nei, i le palota e 18-0.

 

O sui o le Komiti o Sikolasipi e aofia ai Fai’ivae, afioga i le faipule ia Veevalu M. Mageo, Donna Gurr ma Ruth Matagi-Fa’atili. O totino o le Komiti o Aoga Maualuluga e aofia ai Mosiniolo Viane Etuale, Rev. Dr. Siulagi Solomona, Tauiliili Lauifi ma Dr. Annie Fuavai.